ކ ކުޑަގިރީގައި ސަރުކާރުން ތަރައްގީ ކުރަމުންދާ ޕިކްނިކް އައިލެންޑަށް ފެރީގެ ހިދުމަތްތައް ފޯރުކޮށްދޭނެ ފަރާތެއް ހޯދުމަށް އެޗްޑީސީއިން އިއުލާނުކޮށްފިއެވެ.
އެޗްޑީސީގެ އިއުލާނުގައިވާގޮތުން، އެ ކުންފުނިން ހޯދަމުންދަނީ ކ ކުޑަގިރިއާއި މާލެ އާއި ދެމެދު ކޮންމެ ދުވަހަކުވެސް ދަތުރު ކުރުމަށް ޖުމުލަ ހަތަރު ފެރީއެވެ. އެގޮތުން ހޯދަަނީ 50-70 މީހުންގެ ޖާގަ ހުރި ދެ ފެރީ އަދި 80-100 ގެ ޖާގަ ހުރި ދެ ފެރީއެއް ކަމަށް އެ ކުންފުނިން ނެރިފައިވާ އިއުލާނުގައި ފާހަގަކޮށްފައިވެއެވެ.
އެ ކުންފުނިން ބުނެފައިވާގޮތުން ކ ކުޑަގިރި އަށް ފެރީގެ ހިދުމަތްތައް ފޯރުކޮއްދިނުމަށް ޝައުގުވެރާތްތަކުގެ ހުށައެޅުންތައް ޑިސެމްބަރު މަހުގެ 7 ވަނަ ދުވަހުގެ ހެނދުނު 11:00ގެ ކުރިން ހުށައަޅަންޖެހޭނެއެވެ.
އެޗްޑީސީއިން ވަނީ ފެރީތައް ދަތުރު ކުރާނެ ޝެޑިއުލްއެއްވެސް ހާމަކޮށްފައެވެ. އެގޮތުން ހެނދުނު 6:30، 6:50، 7:10 ގައި މާލެއިން ކުޑަ ގިރިއަށް ފުރާއިރު، ކުޑަ ގިރިން މާލެއަށް ދަތުރު ކުރުމަށް ކަނޑައެޅިފައިވަނީ ހަވީރު 5:20، 5:40 އަދި 6:00 ގައެވެ.
ރައީސް ސާލިހުގެ ވައުދެއްގެ ދަށުން ތަރައްގީ ކުރާ ކުޑަގިރީގެ މަސައްކަތްތައް ކުރިއަށް ގެންދަނީ އެމްޓީސީސީއިންނެވެ. އެމްޓީސީސީ އާއި މި މަސައްކަތްތައް ހަވާލު ކުރީ 2021 ވަނަ އަހަރުގެ ސެޕްޓެމްބަރު މަހުގައެވެ. މި ރަށަށް ކަރަންޓު ދިނުމުގެ ހިދުމަތްތައް ދޭނީ ސްޓެލްކޯއިންނެވެ.