ނީލަން ފިހާރަ ރޯވެ، ހިނގި އަލިފާނުގެ ހާދިސާއާއި ގުޅިގެން ހާލުގައިޖެހިފައިވާ މާލެ ސިޓީ ކައުންސިލުގެ މުއައްޒިފުންނަށް ހުޅުމާލޭގައި ހުންނަ ކުރީގެ ކޮވިޑް ފެސިލިޓީގައި ވަގުތީ އެކޮމޮޑޭޝަން ހަމަަޖައްސައިދީފައިވާކަމަށް އެޗްޑީސީ އިން ބުނެފިއެވެ.
މާލޭގައި ހުންނަ ނީލަމް ފިހާރައިގައި ހިނގި އަލިފާނުގެ ހާދިސާގައި އެ ފިހާރައަށް އިއާދަ ކުރުމަށް ދަތިވާވަރަށް ގެއްލުންތަކެއް ލިބިފައިވާއިރު، އެ ފިހާރައާއި ޖެހިގެން ހުރި މާލެ ސިޓީ ކައުންސިލުގެ އެކޮމޮޑޭޝަން ބްލޮކެއްވެސްވަނީ އަނދާފައެވެ. އެޗްޑީސީއިން ބުނެފައިވާގޮތުން އެ ކުންފުނިންވަނީ ސަރުކާރާއި ގުޅިގެން، ހާލުގައި ޖެހުނު ބިދޭސީ މުއައްޒިފުންނަށް ވަގުތީ ބޯހިޔާވަހިކަން އިންތިޒާމުކޮށްފައެވެ.
އެ ކުންފުނިން ބުނެފައިވާގޮތުން، އެ ކުންފުނިން ހަމަޖައްސައިދީފައިވަނީ ހުޅުމާލެގައި ހުންނަ ކުރިން ބޭނުން ކުރި ކޮވިޑް ފެސިލިޓީއެވެ. އަދި އެ ތަނުގައި 160 ގާތް ކުރާ އަދަދެއްގެ މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާއިރު، ފާހާނަކޮށް ފެންވެރޭނެ އިންތިޒާމުވެސް ހަމަޖެހިފައިވާކަމަށް ބުނެފައިވެއެވެ.
ޖެނުއަރީ މަހުގެ 9 ވަނަ ދުވަހު ހިނގާފައިވާ އަލިފާނުގެ ހާދިސާ އެމްއެންޑީއެފްއަށް ރިޕޯޓުކޮށްފައިވަނީ ފަތިހުގެ ވަގުތެއްގައެވެ. އެ ސަރަހައްދުގައި އަލިފާން ކޮންޓްރޯލް ކޮށް ނިއްވާލުމަށް ގިނަ އަދަދެއްގެ އެމްއެންޑީއެފް ބޭފުޅުންނާއި ފަޔާ ފައިޓަރުން ހަރަކާތްތެރިވެފައިވާއިރު، އަލިފާން ނިއްވާލެވިފައިވަނީ އެމްއޭސިއެލްގެ ފަޔަރ ލޮރީވެސް ބޭނުންކޮށްގެންނެވެ.
މާލެ ސިޓީ ކައުންސިލުގެ މުއައްޒިފުންތަކަކަށް އަސަރުކޮށްފައިވާތީ، މޭޔަރ ޑރ މުހައްމަދު މުއިއްޒުވަނީ މީޑިއާތަކާއި ބައްދަލު ކުރައްވާފައެވެ. އެގޮތުން މޭޔަރވަނީ އެކި މުއައްސަސާތަކުން ގުޅިގެން މަސައްކަތްތައް ކުރިއަށް ގެންދާކަމަށް ފާހަގަކުރައްވާފައެވެ.
މި މައްސަަލައާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދުވަނީ ބޮޑު ތަހުގީގެއް ހިނގަމުންދާކަމަށް މައުލޫމާތު ދީފައެވެ.
advertisment