ސްވިޑެންގެ ސިޔާސީ ޕާޓީއަކުން ގުރުއާނު ހަތިމު އަންދާ، ހުރުމަތް ކަނޑާލި މައްސަލަ ފޮރިން މިނިސްޓަރު އަބްދުﷲ ޝާހިދު ކުށްވެރިކުރައްވައިފިއެވެ.
ސްވިޑެންގައި ހުންނަ ތުރުކީގެ އެމްބަސީ ކުރިމަތީ އެ ގައުމުގެ ރައްޔިތަކަށް ގުރުއާން ހަތިމެއް އަންދާލުމުގެ ހުއްދަ ދީފައިވާ މައްސަލަ ކުށްވެރިކޮށް ސޯޝަލް މީޑިއާގައި މިނިސްޓަރު ވިދާޅުވެފައިވާގޮތުން، ރާއްޖެއިން ސްވިޑެންގެ ސިޔާސީ ޕާޓީއެއްގެ ލީޑަރުކަމަށްވާ ރަސްމަސް ޕަލުޑަން ހިންގާފައިވާ ނޭދެވޭ އަަމަލު ހަރުކަށި އިބާރާތުން ކުށްވެރި ކުރެއެވެ.
Maldives strongly condemns the abhorrent act of desecration of the Holy Quran in Sweden carried out by Rasmus Paludan, leader of the far-right political party Stram Kurs.
— Abdulla Shahid (@abdulla_shahid) January 22, 2023
ގުރުއާން ހަތިމެއް އަންދާލި މައްސަލައިގައި ތުރުކީގެ ފޮރިން މިނިސްޓަރު ޗަވުސޯލޫވެސް ވަނީ ނުރުހުން ފާޅުކުރައްވާފައެވެ. އޭނާ މި އަމަލު ސިފަކުރެއްވީ، ނަސްލީ ތަފާތު ކުރުމާއި ނަފްރަތުގެ ސަބަބުން ހިންގާފައިވާ އަމަލެއްގެ ގޮތުގައެވެ. އެނާ ވިދާޅުވީ، އެފަދަ އަމަލުތައް ހިންގުމަކީ މިނިވަންކަމާއި އެކު ހިޔާލު ފާޅުކުރުން ނޫންކަމަށެވެ.
ޗަވުސޯލޫވަނީ ސްވިޑެންއަށްވެސް ފާޑުވިދާޅުވެފައެވެ. އެނާ ވިދާޅުވެފައިވާގޮތުން ސްވިޑެންއިން އެ އަމަލު ހިންގުމަށް ހުއްދަ ދީފައިވަނީ އެތައް އިންޒާރުތަކެއްވެސް ދީފައިވަނިކޮށެވެ. އަދި މިހާރު އެހެނިހެން ފޮތްތައް އެންދުމަށް ހުއްދަ ނުދޭއިރު، ގުރުއާނާއި ޖެހުމުނާއި އިސްލާމް ދީނާއި ޖެހުމުން ހިޔާލު ފާޅުކުރުމުގެ މިނިވަންކަމުގެ ނަމުގައި އެފަދަ އަމަލުތަކަށް ހުއްދަ ދޭކަމަށް އެނާ ފާހަގަކުރެއްވިއެވެ.
