މި މަހުގެ 28 ގައި ބޭއްވުމަށް ހަމަޖެހިފައިވާ މްޑީޕީގެ ރިޔާސީ ޕްރައިމަރީގައި ވޯޓު ލާންޖެހޭ ފޮށި ޓެލެގުރާމާއި ވައިބަރު މެދުވެރިކޮށް ބެލޭނެ އިންތިޒާމް އެ ޕާޓީއިން ހަމަޖައްސައިފިއެވެ.
ޕާޓީއިން ކޮށްފައިވާ ޓުވީޓެއްގައި ބުނެފައިވާ ގޮތުން އާރުޕީ ޖެއްސެވުމަށްފަހު ހުސްތަންކޮޅެއް ދޫކޮށްލުމަށްފަހު އެމީހެއްގެ އައިޑީކާޑު ނަންބަރު ޖެހުމަށްފަހު ޓެލެްރާމް ނުވަތަ ވަޓްސްއަޕްއިން މެސެޖުކުރުމުން ވޯޓު ލާންޖެހޭ ފޮށީގެ މައުލޫމާތު ލިބޭނެއެވެ.
Telegram medhuverikoh MDP Riyaasee Primaryge vote laa foshi check kurumah;
RP(space)A000000 SEND ah jessevumun vote lavvanjehey fosheege mauloomaathu libivadaigannavaane.
— MDP Secretariat (@MDPSecretariat) January 19, 2023
މި އިންތިހާބަކީ މިއަހަރު ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ރިޔާސީ ކެޑިޑޭޓަކު ކަނޑައެޅުމަށް ބާއްވާ އިންތިހާބެކެވެ. އިންތިހާބުގައި ވާދަކުރައްވާ ރައީސުލްޖުމްހުރިއްޔާ އިބްރާހީމް މުހައްމަދު ސާލިހާއި، ޕާޓީގެ ރައީސް މުހައްމަދު ނަޝީދު ގެންދަވަނީ ފޯރީގައި ވާދަވެރި ކެމްޕެއިންތަކެއް ކުރައްވަަމުންނެވެ. އެގޮތުން މި ވަގުތު ދެ ކެޑިޑޭޓުންވެސް ތިއްބެވީ ތާއީދު ހޮއްދެވުމަށް ވަޑައިގެން އަތޮޅު ތެރޭގައެވެ.
ދެ ފެކްޝަނަކަށް ހިގާ އެމްޑީޕީގެ ފެކްޝަންތައް ސަފުކޮށް ފެންނަމުންދާއިރު، އެއް ފެކްޝަން އަނެއް ފެކްޝަންގެ ބޭފުޅުން ގެންދަވަނީ ބަހުގެ ހަމަލާތަކެއްވެސް އަމާޒުކުރަމުންނެވެ.
އެގޮތުން ޕާޓީގެ ”އަސްލު މެންބަރުންގެ“ ވާހަކައާއި، ”ވަގު މެންބަރުންގެ“ ވާހަކަވެސް ދަނީ ދެކެވެމުންނެވެ. އަދި ހަމައެއާއިއެކު ޕާޓީގެ ދަފްތަރު އޮޅުވާލިކަމުގެ ވާހަކައާއި ވަކި ކެޑިޑޭޓަކަށް ވޯޓު ދޭނެ މެންބަރުން ޕާޓީގެ ދަފްތަރުން ވަކިކުރިކަމުގެ ތުހުމަތުވެސް ރައީސް ނަޝީދުގެ ކެމްޕެއިން ޓީމުން ވާދަވެރި އަނެއް ކެމްޕެއިން ޓީމަށް ކުރިއެވެ.
މިހާރު ޕްރައިމަރީގެ ކެމްޕެއިން ޖަލްސާތަކުގައި އެންމެ ބޮޑަށް ދެކެވޭ އެއް ވާހަކައަކީ ރައީސް ނަޝީދު، އިދިކޮޅުގެ ލީޑަރު ރައީސް އަބްދުﷲ ޔާމީން އަބްދުލްގައްޔޫމާއި ގުޅިވަޑައިގެންނެވުމުގެ މަސައްކަތް ކުރައްވާފާނެކަމުގެ ވާހަކައެވެ. މި ވާހަކަތަކަށް ފެށުމުގެ ސަބަބަކަށް މެދުވެރިވީ ރައީސް ނަޝީދު، ރައީސް ޔާމީންއަށް ތާއުރީފްކުރައްވާ ވާހަކަދެއްކެވުމެވެ.
އެގޮތުން ރައީސް ޔާމީން އަކީ ވިޝަނަރީ ލީޑަރެއްކަމަށާއި، އެއީ ތައުލީމީ ބޭފުޅެއްކަމަށްވެސް ވިދާޅުވެފައިވެއެވެ.
