އެމްއާރްއެމްގެ މެމްބަރެއްގެ ގޮތުގައި ހުންނަވާ ހެރިޓެޖް މިނިސްޓަރު ޔުމްނާ މައުމޫން އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސާލިހުއަށް ތާއީދުކުރުމަށް ނިންމަވައިފިއެވެ.
ރިޔާސީ އިންތިހާބު ގާތްވަމުންދާއިރު، އިންތިހާބުގައި ބައިވެރިވާ ކެންޑިޑޭޓުންނާއި ޕާޓީތަކުންދަނީ ރާއްޖޭގެ އެކި ކަންކޮޅުތަކުގައި ކެމްޕެއިން ހަރަކާތްތައް ކުރިއަށް ގެންދަމުންނެވެ. ރައީސް ސާލިހަށް ތާއީދުކުރުމަށް ނިންމަވާފައިވާކަން ހާމަކުރައްވާ ސޯޝަލްމީޑިއާގައި ކުރެއްވި ޕޯސްޓެއްގައި ޔުމްނާ ވިދާޅުވީ، ރާއްޖޭގެ ހަމަޖެހުމާއި ތަރައްގީއަށްޓަކައި ރައީސް ސާލިހަށް ދެވަނަ ދައުރަކަށް އިންތިހާބު ކުރުމަކީ މުހިންމު ކަމެއްކަމަށް ގަބޫލުކުރައްވާކަމަށެވެ. އޭނާ ވިދާޅުވީ، ރައްޔިތުންނަށް ލުއި ފަސޭހަކަން ގެނެސްދިނުމުގެ ގޮތުން ސަރުކާރުން ފަށާފައިވާ މުހިންމު މަސައްކަތްތަކާއި މަޝްރޫޢުތައް ކުރިއަށް ގެންދިއުމަކީ މުހިންމު ކަމެއްކަމަށެވެ.
އެ މަނިކުފާނުގެ ސިޔާަސަތުތަކަށާއި މެނިފެސްޓޯއަށް އަޅުގަނޑަށް ތާއީދު ކުރެވޭ. އެ ގޮތުން ކުޑަރަށެއް ބޮޑު ރަށެއް ތަފާތު ނުކޮށް އަސާސީ ޚިދުމަތްތައް ފޯރުކޮށްދެއްވައި، ސަގާފީ އަދި ޤުދްރަތީ ތަރިކަ ރައްކާތެރިކޮށް، ރަށު އަދި ސަގާފީ ފަތުރުވެރިކަން ކުރިއެރުވުމުގެ ސިޔާސަތަށް ތާއީދުކުރެވޭ. 3✅ pic.twitter.com/no447nIylr
— Yumna Maumoon 🇲🇻 🤝🇵🇸 (@yumna_maumoon) August 22, 2023
ޔުމްނާ ވިދާޅުވީ، ރައީސް ސާލިހުގެ ސިޔާސަތުތަކާއި މެނިފެސްޓޯއަށް ތާއީދުކުރައްވާކަމަށާއި އެގޮތުން ކުޑަރަށެއް ބޮޑު ރަށެއް ތަފާތުކުރައްވާ އަސާސީ ހިދުމަތްތައް ފޯރުކޮށްދިނުމާއި، ސަގާފީ އަދި ގުދުރަތީ ތަރިކަ ރައްކައުތެރިކޮށް އެ ދާއިރާގެ ތެރޭގައި ފަތުރުވެރިކަން ކުރިއެރުވުމަށް ރައީސް ސާލިހު ގެންގުޅުއްވާ ސިޔާސަތުތަކަށްވެސް ތާއީދުކުރައްވާކަމަށެވެ. ޔުމްނާ ވިދާޅުވީ، އިލްމީ ހުނަރުވެރި ފަންނދުވެރި ޒުވާނުން ބިނާކުރުމަށާއި، ފަންނާނުންނަށް ފުރުސަތު ފަހިކޮށްދެއްވުމަށް އެކުލަވާލާފައިވާ ސިޔާސަތުތަކަށްވެސް ތާއީދުކުރައްވާކަމަށާއި ދިވެހިރައްޖޭގައި ފަންނުވެރިންގެ ވިޔަފާރި ފުޅާކޮށްދިނުމާއި، އުފެއްދުންތެރި އިގްތިސާދެއް ބިނާކުރުމަށް ގެންގުޅުއްވާ ވިސްނުންތަކާއި ސިޔާސަތުތަކަށްވެސް ތާއީދުކުރައްވާކަމަށެވެ.
މިނިސްޓަރ ވިދާޅުވީ، ރާއްޖޭގައި މިންތީގެ ހަމަ ހަމަކަން ގާއިމު ކުރުމާއި އިސްރަށްވެހިންނާއި ހާއްސަ އެހީތެރިކަން ބޭނުންވާ ފަރާތްތަކަށް ރައްކައުތެރިކަން ފޯރުކޮށްދީ ބައިވެރިކުރުމުގެ ސިޔާސަތުތަކަކީވެސް އެމަނިކުފާނުގެ ސިޔާސަތުތަކުގެ ތެރެއިން ފާހަގަކޮށްލެވޭ ކަންކަން ކަމަށާއި މި ސަރުކާރުގައި މަތީ ތައުލީމާއި ކުޅިވަރުގެ ދާއިރާއިންވެސް ފުރުސަތު ފަހިވެފައިވާކަން ފާހަގަކޮށްލެވޭކަމަށެވެ.
މިނިސްޓަރު ޔުމްނާ ރައީސް ސާލިހަށް ތާއިދުކުރައްވާކަން ހާމަކުރައްވާފައިވާއިރު، އޭނާގެ ކޮއްކޯފުޅު އަހުމަދު ފާރިސް މައުމޫނުވެސް ކުރިއަށް އޮތް އިންތިހާބުގައި އަމިއްލަ ހައިސިއްޔަތުން ވާދަކުރައްވާކަން ފާހަގަކުރެވެއެވެ.
