ބ. ފުޅަދޫ ކައުންސިލްގެ ރައީސް އަލީ އަޒުހަރު އެމްޑީޕީ ދޫކޮށް، ޕީއެންސީއަށް ސޮއިކުރައްވައިފި އެވެ.
އަޒުހަރު ޕީއެންސީއަށް ސޮއި ކުރެއްވުމުން ފޯމާއި ހަވާލުވެވަޑައިގެންފައި ވަނީ ޕީއެންސީގެ ރައީސް، އަދި އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
ޕީއެންސީއަށް ސޮއިކުރައްވައި އަޒުހަރު ވިދާޅުވީ، އޭނާ ގަބޫލު ކުރާ ގޮތުގައި އެ ޕާޓީއާއި އެކު ރައްޔިތުންގެ ހައްގުގައި އާއި ދާއިރާއަށް ގިނަ މަސައްކަތްތައް ކުރެވޭނެ އެވެ. އަދި ޑރ. މުއިއްޒުގެ ސަރުކާރެއްގައި ތަރައްގީގެ މަޝްރޫއުތައް ބޮޑުތަނުން އިތުރުވެ، ރައްޔިތުންގެ ކުރިއެރުމާއި މުސްތަގުބަލަށް ފައިދާ ހުރި ޕްރޮޖެކްޓުތައް ފެނިގެންދާނެކަމުގެ ޔަގީންކަން އެބައޮތްކަމަށް ވިދާޅުވި އެވެ.
އަޒުހަރު ވިދާޅުވީ އޭނާގެ އުންމީދަކީ ރައްޔިތުންގެ އުންމީދުތައް އަބަދުވެސް ހާސިލުވުމުގައި މުއިއްޒުގެ އެއްބާރުލުމާއި ފުރިހަމަ މަސައްކަތް ފެނިގެން ދިއުމެވެ.
ރިޔާސީ އިންތިހާބު ކާމިޔާބު ކުރެއްވުމުންނާއި، ކެމްޕެއިނުގެ ތެރޭގައި ވެސް ގިނަ ބަޔަކު މުއިއްޒަށް ތާއީދު ކުރުމަށް ނިންމައި އެކުގައި މަސައްކަތް ކުރެއްވި އެވެ. އަދި މުއިއްޒާއި ތަފާތު ވިސްނުންތައް ހުރި ސިޔާސީ ބޭފުޅުން ވެސް ވަނީ ޒިންމާދާރު އިދިކޮޅު ޕާޓީއެއްގެ ރޯލު އަދާކޮށް، ސަރުކާރު ޖަވާބުދާރީ ކުރުވާނެކަމަށް ބުނެފަ އެވެ. އަދި ރައްޔިތުންގެ ބަސް ގަބޫލުކޮށް، ފަސް އަހަރުގެ ވެރިކަމެއް ކުރުމުގެ ފުރުސަތު ދޭން ޖެހޭކަމަށް ވެސް ބުނެފައި ވެއެވެ.
