ގައުމެއް ބިނާކުރުމުގައި އެންމެ މުހިންމު ހަތިޔާރަކީ މަސައްކަތްތެރި އަތްތައްކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
ދިވެހިރާއްޖޭގެ ރައީސްކަމުގެ މަގާމަށް ހުވާކުރައްވައި ދެއްވި ތަގުރީގުގައި ރައީސް މުއިއްޒުވަނީ ދިވެހިރާއްޖޭގައި މަސްވެރިކަމާއި ދަނޑުވެރިކަން ފަދަ މަސައްކަތްތައް ކުރައްވާ ފަރާތްތަކާއި މުހާތަބުކުރައްވާފައެވެ. އެމަނިކުފާނު ވިދާޅުވީ، ގައުމެއް ބިނާކުރުމުގައި އެންމެ މުހިންމުވަނީ އެ ގައުމެއްގެ މަސައްކަތްތެރިންކަމަށާއި ދިވެހިރާއްޖޭގެ 4000 އަހަރުގެ ތާރީހުގައި ރައްޔިތުންނަށް ބަނޑުފުރާނަ މުއްތިކޮށްދިނުމުގައި އެންމެ އިސްދައުރެއް އަދާކުރައްވާފައިވަނީ ދިވެހި ދަނޑުވެރިންނާއި މަސްވެރިންކަމަށް ވިދާޅުވިއެވެ.
އެމަނިކުފާނު ވިދާޅުވީ، މިއަދުވެސް އެ ހަގީގަތަށް ބަދަލެއް އައިސްފައިނުވާކަމަށާއި ކާން ބޯންޖެހޭ ޖެހުމަށް އެއްވެސް ބަދަލެއް އައިސްފައިނުވާކަމަށް އިޝާރާތްކުރެއްވިއެވެ. އެހެންކަމުން މަސްވެރިކަމާއި ދަނޑުވެރިކަމުގެ އިތުރުން އިމާރާތްކުރުމާއި ވަޑާންކުރުން ފަދަ މަސައްކަތްތެރިކަމަށް އެމަނިކުފާނުގެ ސަރުކާރުން ވަރަށް އިސްކަން ދޭނެކަމަށް ވިދާޅުވިއެވެ. އެމަނިކުފާނު ވިދާޅުވީ، ސަރުކާރުން އެ ދާއިރާތަކާއި ޒަމާނީ އިލްމާއި ވަސީލަތްތަކާއި ރަހުމަތްތެރިކޮށްދޭނެކަމަށެވެ.
ރައީސް މުއިއްޒު ވިދާޅުވީ، ސަރުކާރުން ދުނިޔޭގައި ހުރި އެންމެ ފަހުގެ ވަސީލަތްތައް އެ ދާއިރާތަކުގެ ތެރެއަށް ތައާރަފްކޮށްދެއްވާނެކަމަށާއި އާމްދަނީއާއި ހުނަރު އިތުރުކުރުމުގެ މަގު މާ ލަސްތަކެއް ނުވެ ފަހިކޮށްދެއްވާނެކަމަށް ވިދާޅުވިއެވެ. ރައީސް ވިދާޅުވީ، އެކަންކަން ފަސްތަކެއް ނުވެ މަސްވެރިންނާއި ދަނޑުވެރިންނަށް އަމިއްލައަށް ތަޖުރިބާކުރެއްވޭނެކަމަށެވެ.
