ރަނގަޅު ވާހަކަތަކާއި ފިކުރުތައް ފެތުރުމަށް ރައީސް ޑރ. މުހައްމަދު މުއިއްޒު މިއަދު ދިވެހި ލިޔުންތެރިންނަށް ނަސޭހަތްތެރިވެވަޑައިގެންފިއެވެ.
މިއަދު ފާހަގަކުރަމުންދާ ލިޔުންތެރިންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވަނީ ދިވެހިރާއްޖޭގެ 34 ވަނަ ލިޔުންތެރިންގެ ދުވަހުގެ ތަހުނިޔާ ރާއްޖޭގެ ލިޔުންތެރިންނަށާއި ރައްޔިތުންނަށް ފޮނުއްވައިފައެވެ.
އެމަނިކުފާނު ވިދާޅުވީ، މާތްވެގެންވާ އިސްލާމްދީނަކީ އުނގަންނައިދިނުމާއި ތެދު މައުލޫމާތު ފެތުރުމަށް އަދި ލިޔުންތެރިކަން ފެތުރުމަށް އަދި ލިޔުންތެރިކަން ކުރިއެރުވުމަށް ބާރުއަޅާ ދީނެއް ކަމަށެވެ.
އެހެންކަމުން، ދިވެހިބަހުން ލިޔާ ކޮންމެ ލިޔުންތެރިޔަކު ވެސް ހައްގުބަސް ފެތުރުމަށާއި ރީތިކޮށް މުހާތަބުކުރުމަށާއި، ތިމާއާއި އަނެކުންނަށް މިއަދާއި މާދަމާ ވެސް ފައިދާކުރާނެ ރަނގަޅު ވާހަކަތަކާއި ފިކުރުތައް ފެތުރުމަށް ނަސޭހަތްތެރިވެވަޑައިގަންނަވާ ކަމަށެވެ.
”އެހެންކަމުން، ދިވެހިބަހުން ލިޔާ ކޮންމެ ލިޔުންތެރިޔަކުވެސް، ހައްގުބަސް ފެތުރުމަށާއި، ރީތިކޮށް މުހާތަބުކުރުމަށާއި، ތިމާއަށާއި އަނެކުންނަށް މިއަދާއި މާދަމާވެސް ފައިދާކުރާނެ ރަނގަޅު ވާހަކަތަކާއި ފިކުރުތައް ފެތުރުމަށް ނަސޭހަތްތެރިވަން،“ ރައީސް މުއިއްޒު
އޭގެ އިތުރުން، ދިވެހި ލިޔުންތެރިން ވާން ޖެހޭނީ ގައުމު އަބަދުވެސް ފަހުރުވެރިވާނެ ގައުމަށް ފާގަތިވާނެ ގޮތަށް ލިޔާ، އަމާނާތްތެރި، ގައުމު ދެކެ ލޯބިވާ ބަޔަކަށް ކަމަށް ވެސް ވިދާޅުވެފައިވެއެވެ.
ރާއްޖޭގެ އެހާރާއި މިހާރުގެ ލިޔުންތެރިންގެ ތެދުވެރި މަސައްކަތްތަކުގައި ބަރަކާތްލެއްވުމަށް ވެސް ރައީސް މުއިއްޒު ދުއާކުރެއްވިއެވެ.
