ޕާކް ކުރެވޭނެ ތަންތަން ތަރައްގީ ކުރެވެންދެން ޕާކިން ވަޔަލޭޝަން ސްޓިކާ ނުޖަހަން ފުލުހުން ނިންމައިފިއެވެ.
ޕޮލިސް ކޮމިޝަނަރު އަލީ ޝުޖާއު މީޑިއާއަކަށް ދެއްވި އިންޓަވިއުއެއްގައި ވިދާޅުވީ މާލެ ސަރަހައްދުގައި އޮތް ޓްރެފިކްގެ މައްސަލައަށް ހައްލު ހޯދުމަށް މަސައްކަތް ކުރައްވަމުން ގެންދަވާކަމަށެވެ. މި މަސައްކަތް ކާމިޔާބު ކުރެވޭނީ ދައުލަތުގެ ހުރިހާ މުއައްސަސާތަކާއެކު އެންފޯސްމަންޓް ވަރުގަދަކުރެވިގެންކަމަށް ވިދާޅުވިއެވެ.
ޝުޖާއު ވިދާޅުވި ގޮތުގައި ޖޫރިމަނާ ކުރުމަކީ ގަބޫލުކުރާ އުސޫލެއް ނޫނެވެ. އަދި މިއީ ފުލުހުންވެސް ބޭނުންވާ ގޮތް ނޫންކަމަށް ފާހަގަކޮށް ޝުޖާއު ވިދާޅުވީ ޕާކިން ބިލްޑިންތައް ގާއިމް ކުރެވެންދެން ސްޓިކާ ޖެހުމާއި، ވެހިކަލް ޓޯ ކުރުން ހުއްޓާލާނެކަމަށެވެ. ޕާކިން ބިލްޑިންތައް އެޅުމުގެ މަސައްކަތްތައް ބާރު ސްޕީޑުގައި ކުރިއަށްދާކަމަށް ވިދާޅުވިއެވެ.
މިކަމުގައި އޮތް ފަރުދީ ޒިންމާގެ މުހިންމުކަންވެސް ޝުޖާއުގެ ވާހަކައިގައި ފާހަގަކުރެއްވިއެވެ. އެގޮތުން މާލޭގައި ހުރި މިފަދަ މައްސަލަތައް ހައްލު ކުރެވޭނީ ދުއްވާ ފަރާތްތައް ޑިސިޕްލިން ވެގެންކަމަށާއި، އެންމެންގެ ރައްކަލަށް ވިސްނަން ޖެހޭކަމަށް ޝުޖާއު ވިދާޅުވިއެވެ.
ޝުޖާއު ވިދާޅުވި ގޮތުގައި މިހާރު މަނާ ތަނަކު ޕާކް ކޮށްފިނަމަ، ޖޫރިމަނާ ކުރުމުގެ ބަދަލުގައި އެދެމުންދަނީ، ވެރި ފަރާތަށް ގުޅައި އުޅަނދު އެ ތަނުން ނެގުމަށެވެ.
މީގެ އިތުރުން ގްރީން ޒޯންތަކުގައި ބޮޑެތި އުޅަނދުތައް ޕާކްކޮށްފައި ހުންނަ މައްސަލަ އަލިއަޅުއްވައި ޝުޖާއު ވާހަކަދެއްކެވިއެވެ. މި މައްސަލަ ހައްލުކުރުމަށް މަސައްކަތް ކުރައްވާނެކަމަށް ވިދާޅުވިއެވެ.
ރައިސުލްޖުމްހުރިއްޔާ ޑރ މުހައްމަދު މުއިއްޒުގެ ސަރުކާރުން ވަނީ ކުރީގައި ޖަހާފައިވާ ހުރިހާ ސްޓިކާއެއްގެ ޖޫރިމަނާ މައާފުކޮށްފައެވެ.
