ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރު ނޫނީ ކޮރަޕްޝަންގެ މައްސަލަތަކަށް އެކަށީގެންވާ އަވަސް ފިޔަވަޅުތައް އެޅި ސަރުކާރެއް ނެތްކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
ފަލާހު މިހެން ވިދާޅުވީ މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބޭނުންވާ ޑީސަލް ގަތުމުގެ މުއާމަލާތްތަކާއި ގުޅޭ ހާއްސަ އޮޑިޓް ރިޕޯޓް 2018-2020، މާލިއްޔަތު ކޮމިޓީއިން ދިރާސާކޮށް ނިންމި ގޮތުގެ ރިޕޯޓަށް ބަހުސްކުރައްވަމުންނެވެ.
ރިޕޯޓަށް ބެލުމުން އެތައް މިލިއަން ރުފިޔާއެއްގެ ވައްކަން ކުރީ ސަރުކާރުން ކޮށްފައިވާކަން ހާމަވާ ކަމަށް ފަލާހު ފާހަގަކުރެއްވިއެވެ. މިއާއިއެކު އެމްޑީޕީގެ މެންބަރުން ވަނީ އެއީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ހިންގާފައިވާ ކަންކަންކަމަށް ވިދާޅުވެފައެވެ. އެ ވާހަކަތަކަށް ރައްދުދެއްވާ ފަލާހު ވިދާޅުވީ އެހެން ނަމަވެސް، މިކަންކަމުގެ ތެރޭގައި ރައީސުލްޖުމްހުރިއްޔާ ޑރ މުހައްމަދު މުއިއްޒުގެ ސަރުކާރު ނުހިމެނޭކަމަށެވެ.
ޔާމީނާއި، އެމްޑީޕީއާއި ދެބައި މީހުން ވައްކަން ކުރި ރިޕޯޓް މިއީ، މިއީ ރައީސް މުއިއްޒާއި މި ސަރުކާރު ވާހަކައެއް ނޫން.
ފަލާހު ވިދާޅުވިއެވެ.
މި ސަރުކާރަށް ދޮޅު އަހަރުވީއިރު، ފެންމަތިވީ މައްސަލަތަކަށް ވާނީ އެކަށީގެންވާ ފިޔަވަޅުތައް އަޅާފައިކަމަށް ފާހަގަކޮށް ފަލާހު ވިދާޅުވީ، ކުންފުނިތަކުގެ ހިންގުމަށާއި، ކެބިނެޓަށްވެސް ބަދަލު ގެނެސްފައިވާނެކަމަށެވެ. ކޮރަޕްޝަންގެ މައްސަލަތައްވެސް ބަލަމުންދާކަމަށް ފަލާހު ވިދާޅުވިއެވެ.
އެހެން ނަމަވެސް މިހެން ފިޔަވަޅު އަޅަން ކެރުނު އެއްވެސް ސަރުކާރެއް ނެތްކަމަށް ވިދާޅުވިއެވެ. އެގޮތުން ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) ގެ މައްސަލަތައް ފަލާހު ފާޙަގަކުރެއްވިއެވެ. އެ ކޯޕަރޭޝަނުގެ ތިޖޫރީ ގެއްލިގެންނާއި، އެތައް މައްސަލަތަކެއް ހުށައެޅިއިރު، އެއްވެސް މައްސަލައަކަށް އެކަށީގެންވާ ފިޔަވަޅު ނަގާފައިނުވާކަމަށާއި، ކޮރަޕްޝަންގެ ތުހުމަތު ކުރެވުނު ފަރާތްތައް ދައުރު ނިމެންދެން މަގާމުތަކުގައި ތިއްބެވިކަމަށް ފަލާހު ވިދާޅުވިއެވެ.
ފަލާހު ވިދާޅުވީ މިހާރުވެސް ރައްޔިތުންގެ މަޖިލީހުގައި ކޮރަޕްޝަންގެ އަމަލުތައް ހިންގާފައިވާ، އެމްޑީޕީގެ މެންބަރުން އެބަ ތިއްބެވިކަމަށެވެ. މަޖިލީހަށް ވަޒީރުން ހާޒިރު ނުވާ މައްސަލައިގައި އެމްޑީޕީއިން ދައްކާ ވާހަކަތަކަށް ރައްދުދެއްވާ ފަލާޙު ވިދާޅުވީ، އެމްޑީޕީއިން މަސައްކަތް ކުރަނީ ރައްޔިތުނނަށް ވަޒީރުން ދޭ ހިދުމަތްތަކަށް ހުރަސް އަޅައިގެން ސިޔާސީ މަސައްކަތް ކުރުވުމަށްކަމަށެވެ.
މި ސަރުކާރުން މަސައްކަތްތައް ކުރަމުންވެސް ދާނީ ރައްޔިތުންނާއިއެކު މަޝްވަރާކޮށްގެންކަމަށް ފަލާހު ވިދާޅުވިއެވެ.
