ފުލުހުންގެ ހިދުމަތް ތަރައްގީވުން: ސައިބާ ސެކިއުރިޓީ އޮޕަރޭޝަން ސެންޓަރުގެ އިމާރާތުގެ ބިންގާ އެޅުމުގެ ރަސްމިއްޔާތު ބާއްވައިފި!

ފުލުހުންގެ ސައިބާ ސެކިއުރިޓީ އޮޕަރޭޝަން ސެންޓަރު (ސީއެސްއޯސީ)ގެ އިމާރާތުގެ ބިންގާ އެޅުމުގެ ރަސްމިއްޔާތު މިއަދު ބާއްވައިފިއެވެ.

ރަސްމިއްޔާތުގެ ތަފްސީލު

މި ސައިބާ ސެކިއުރިޓީ އޮޕަރޭޝަން ސެންޓަރު އިމާރާތްކުރުމަށް ހަމަޖެހިފައިވަނީ ހުޅުމާލެ ފިޔަވަހި ދޭއްގައިކަމަށްވާއިރު، އެ އިމާރާތުގެ ބިންގާ އެޅުމުގެ ރަސްމިއްޔާތު ކުރިއަށް ގެންދިޔައީ، އެ ސަރަހައްދުގައެވެ. އެގޮތުން، އެ އިމާރާތުގެ ބިންގާ ރަސްމީކޮށް އަޅުއްވައިދެއްވީ، ޔުނައިޓެޑް އަރަބް އެމިރޭޓްސް (ޔޫއޭއީ)ގެ ސައިބާ ސެކިއުރިޓީ ހެޑް ޑރ. މުހައްމަދު އަލް ކުވައިތީ އާއި މިނިސްޓަރ އޮފް ހޯމްލޭންޑު އަލީ އިހުސާނުގެ އިތުރުން ފުލުހުންގެ ކޮމިޝަނަރ އިސްމާއީލު ނަވީންއެވެ.

މީގެއިތުރުން، މި އިމާރާތުގެ ބިންގަލު އެޅުމުގެ ރަސްމިއްޔާތުގައި ޔޫއޭއީގެ ސައިބާ ސެކިއުރިޓީ ކައުންސިލުގެ ކަމާ ގުޅުންހުރި ފަރާތްތަކަާއި ދިވެހި ފުލުހުންގެ އެގްޒެކެޓިވް އޮފިސަރުންގެ އިތުރުން ކޮމިޝަންޑު އޮފިސަރުންވެސް ބައިވެރިވެލެއްވިއެވެ.

އިމަރާތާއި ގުޅުންހުރި މައުލޫމާތު

މި ސީއެސްއޯސީ އިމާރާތަކީ، ޔޫއޭއީގެ ސައިބާ ސެކިއުރިޓީ ކައުންސިލުގެ އެހީއާއިއެކު، ދުނިޔޭގެ ފެންވަރު އަދި ”ސްޓޭޓް އޮފް ދަ އާޓް“ ވަސީލަތްތަކާއިއެކު ގާއިމުކުރެވިގެންދާ ސެންޓަރެކެވެ.

މީގެއިތުރުން، މި ސެންޓަރު ފަރުމާކޮށްފައިވަނީ ރާއްޖޭގެ ސައިބާ ސްޕޭސްގެ އައްޑަނައެއްގެ ހައިސިއްޔަތުން އަދި ފާރަވެރިކަމާއި، ރައްޖޭގެ ސައިބާ ސްޕޭސް ރައްކާތެރިކުރުމަށްޓަކައެވެ. އެގޮތުން، މި ސެންޓަރުން، ސައިބާ ނުރައްކާތައް ދެނެގަނެ، އެ ނުރައްކާތަކަށް ރައްދުދިނުމާއިއެކު، އެ ނުރައްކާތަކާއި ދެކޮޅަށް މަސައްކަތްކުރާނެއެވެ.

މިކަމާއި ގުޅިގެން ފުލުހުންގެ ކޮމިޝަނަރު ވިދާޅުވިގޮތުގައި، 21 ވަނަ ގަރުނުގައި، ގައުމީ ސަލާމަތާއި ރައްކާތެރިކަން ބިނާވެފައިވަނީ ހަމައެކަނި، ޖިސްމާނީ ގޮތުން ހަރަކާތްތެރިވުންނޫންކަމަށާއި، ލޮލަށް ނުފެންނަ، ސައިބާ ޑޮމެއިންގައި ކުރިމަތިވެދާނެ ނުރައްކާތަކަށް ކުރިމަތިލުމުގެ ގާބިލުކަން ހުރުމަކީ މުހިއްމުކަމެއްކަމަށެވެ.

ގައުމީ ސަލާމަތަށް އެޅުނު މުހިއްމު ފިޔަވަޅެއް

ދުނިޔެ ބަވަނަވެ، ތަރައްގީވަމުންދާއިރު، ކަނޑިބަޑިން ހަނގުރާމަކުުމަށްވުރެ، ޓެކްނޮލޮޖީގެ ޒަރިއްޔާއިން ކުރާ ހަނގުރާމަތާކައި، ޓެކްނޮލޮޖީގެ ޒަރިއްޔާއިން ކުރިމަތިވާ ނުރައްކާތައް އިތުރުވަމުންދެއެވެ. އެގޮތުން، ރާއްޖެ ފަދަ ކުޑަ ގައުމެއްގައި ހަރުދަނާ އަދި ވަރުގަދަ، ސައިބާ ސެކިއުރިޓީއެއް ގާއިމުވެފައި އޮތުމަކީ، ގައުމާއި، ދިވެހި ރައްޔިތުން ހިމެނޭނެހެން، ގައުމުގެ އެންމެންގެ ސަލާމަތާއި ރައްކާތެރިކަމަށް ވަރަށް މުހިއްމުކަމެކެވެ.