މަޖިލީހުގެ މެމްބަރުންގެ މަސައްކަތާއި އަދި މަސްއޫލިއްޔަތާއި އަލާ ބަލާއިރު ލިބިވަޑައިގަންނަވަނީ ކުޑަ މުސާރައެއް ކަމަށް ވިދާޅުވެ ބައެއް މެމްބަރުން ކަންބޮޑުވުން ފާޅުކޮށްފިއެވެ.
ރައްޔިތުންގެ މަޖިލީހުގެ އާންމު ކޮމިޓީގައި މަޖިލީހުގެ ގަވައިދު އިސްލާހުކުރުމާ މެދު މެންބަރުންގެ ހިޔާލު ހޯދައި، އެކަމާ ގުޅިގެން މެންބަރުންގެ ހުރި ކަންބޮޑުވުންތައް ހިއްސާކުރުމަށް ވަނީ ފުރުސަތު ހުޅުވާލައިފައެވެ. ރައްޔިތުންގެ މަޖިލީހުގެ މެމްބަރުންގެ ކަންބޮޑުވުންތައް ހިއްސާކުރުމަށް ހުޅުވާލި ފުރުސަތުގައި އަލިފުށި ދާއިރާގެ މެމްބަރު އަބްދުލްލަތީފް އަބްދުއްރަހްމާން ވިދާޅުވީ އާއްމު ރައްޔިތުން ދެކޭ ގޮތުގައި މަޖިލީހުގެ މެމްބަރުންގެ މުސާރައަކީ 1 ލައްކަ ރުފިޔާ ނުވަތަ 85000 ކަމަށެވެ.
އެހެންނަމަވެސް ހަގީގަތުގައި މެމްބަރުންގެ މުސާރައަކީ 42،500 ރުފިޔާ ކަމަށެވެ. ހާޒަރު ނުވެ ނުވަތަ ސަލާމުގައި ހުންނަ ދުވަހެއް ނަމަ މަޖިލީހުގެ މުސާރަ ލިބިވަޑައި ގަންނަ ކަމަށާއި އެހެންނަމަވެސް ކޮމިޓީ އެލެވެންސް ނުލިބޭ ކަމަށެވެ.
މެމްބަރު ވިދާޅުވީ އެކަމަށް ކޮމިޓީގެ މުގައްރިރު ރިއާޔަތް ކުރެެއްވުމަކީ އެދިވަޑައިގަންނަވާ ގޮތް ކަމަށެވެ. ހަމައެއާއި އެކު ތިމަރަފުށީ ދާއިރާގެ މެމްބަރު އަހުމަދު ރިޒާވެސް ވިދާޅުވީ މެމްބަރުންގެ މައުލޫމާތުތައް ރައްޔިތުންނަށް އިނގިފައިވަނީ މަޖިލިސް މެމްބަރުން ވަރަށް ޮޑު މުސާރައެއް ނަންގަވައިގެން ތިއްބަވާ މެމްބަރުންގެ ގޮތުގައި ކަަމަށެވެ.
މެމްބަރު ރިޒާ ވިދާޅުވީ މަސް ނިމިގެން ދާއިރު އެތައް ހަރަދުތަކެއް މެމްބަރުންވެސް ކުރަން ހުންނަ ކަމަށާއި އުޅުއްވަން ޖެހެނީ ނުތަނަވަސް ހާލތެއްގައި ކަމަށެވެ. އަދި ދިރިއުޅެންވެސް ޖެހެނީ މާލޭގައި ނުވަތަ މާލޭ އޭރިއާގައި ކަމަށް މެމްބަރު ވިދާޅުވިއެވެ. ރިޒާ ވިދާޅުވީ މަޖިލިސް މެމްބަރުންނަށް އެލަވެންސްގެ ގޮތުގައި ލިބެނީ 20،000 ރުފިޔާ ކަމަށެވެ. މާލެ ސަރަހައްދުގައި ކުއްޔަށް އުޅޭއިރު އެއީ ވަރަށް ކުޑަ އަދަދެއް ކަމަށާއި ތިން ކޮޓަރީގެ އެޕާޓްމެންޓެއް ވެސް ކުއްޔަށް ލިބެނީ 24،000 ރުފިޔާ އަށް ކަން އޭނާ ފާހަގަކުރެއްވި އެވެ.
”އެހެންވީމާ އަޅުގަނޑުމެންގެ މިކަންކަން މިހެން އޮތަތީވެ، މިކަމަށް ބަދަލު ގެންނަން މަސައްކަތް ކުރުމަކީ މަޖިލިސް މެންބަރުންގެ ޒިންމާއެއް ކަމަށް ދެކެނީ“
ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވީ މެންބަރުންގެ މުސާރައަކީ ވަރަށް ބޮޑު މުސާރައެއް ކަމަށް ރައްޔިތުންނަށް ގަބޫލުކުރެވޭ ކަމަށާއި ނަމަވެސް، މެންބަރެއްގެ އަސާސީ މުސާރައަކީ 42،500 ރުފިޔާ ކަމަށެވެ. އެއީ މިނިސްޓަރެއްގެ މުސާރައަށް ވުރެ ވެސް ކުޑަ އަދަދެއް ކަން ފާހަގަކުރެއްވިއެވެ.
