ދައުރު ނިމުމާއި ގާތްވެފައި ވަނިކޮށް، ކައުންސިލްތަކުން ތަޖުރިބާ ދަތުރުތައް ކުރުން ދޫކޮށްލައި ރައްޔިތުންނަށް ހަމަހަމަކާއި އިންސާފުވެރިކަމާއި އެކު ހިދުމަތް ކުރުމުގައި މަސްއޫލުވެ އުޅުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިލްތިކުރައްވައިފި އެވެ.
ބ. އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ކެންދޫއަށް ވަޑައިގެން ރައީސް މުއިއްޒު ވިދާޅުވީ މާލޭގައި ހުންނަވައިގެން ރަށުގެ ކަންކަން އިއުލާނުކޮށް ނިންމެވުމަކީ ސަރުކާރުގެ ސިޔާސަތެއް ނޫންކަމަށެވެ. ރައީސް ވިދާޅުވީ ރައްޔިތުން ސަރުކާރަށް ރަށުގެ ތަރައްގީއާއި ގުޅުން ހުރި ވަރަށް ގިނަ ކަންކަން ހުށަހަޅާކަމަށާއި، އެމަނިކުފާނު އަބަދުވެސް މަސައްކަތް ކުރައްވަނީ އެ ވާހަކަތައް އަޑުއަހައި ހައްލު ގެނެސްދިނުމަށް ކަމަށެވެ.
ރަށްރަށަށް ދަތުރު ކުރައްވައި ސީދާ ކައުންސިލްތަކާއި، ރައްޔިތުންނާއި ބައްދަލު ކުރުމަށް ބޭނުން ވަނީ ރައީސް ވިދާޅުވި ގޮތުގައި މާލެއަށް މެމްބަރުން ގެނެސްގެން ކަންކަން ނިންމާކަށް ނޫނެވެ. އޭގެ ބަދަލުގައި ރައްޔިތުންނާއި، ބައްދަލުކޮށް މަސައްކަތް ކުރަމުން ގެންދާއިރު ސަރުކާރުން ލާމަރުކަޒީ ނިޒާމު ފުރިހަމައަށް ގަބޫލު ކުރާކަމަށް ރައީސް ވިދާޅުވި އެވެ.
އެކަމުގައި ވަރަށް ފުޅާ ދާއިރާއެއްގައި އަޅުގަނޑު އުޅެފައި ހުރިިކަމެއް މިއީ… ލާމަރުކަޒީ ނިޒާމުގެ މުހިންމުކަމާއި، އެކަމުގެ ފައިދާއާއި، އެކަމަށް ކުރެވޭނެ ކަންކަމާއި ސަރުކާރުތަކުން ވިޔަސް ކުރިމަތި ކުރުވާ ހުރަސްތައް ގިރާކުރާނެ ގޮތާއި، ލާމަރުކަޒީ ނިޒާމުގެ ހުރިހާ ހިސާބެއްގައި އުޅެވިފައި ހުރި މީހެއް އަޅުގަނޑަކީ.. އެހެންވީމަ ލާމަރުކަޒީ ނިޒާމުގެ ތެރެއިން ކަންކަން ވާންވީ ގޮތް އަޅުގަނޑަށް އެނގޭ ވަރަށް ފުރިހަމައަށް..
ރައީސް ވިދާޅުވި ގޮތުގައި ބައެއް ކައުންސިލްތަކުން ބްލޮކް ގްރާންޓުގެ ގޮތުގައި ލިބޭ ފައިސާއާއި، އާމްދަނީގެ ގޮތުގައި ލިބޭ ފައިސާ ވެސް ބޭނުން ކުރާ ގޮތް އެނގިވަޑައިގަންނަވާ ކަމަށެވެ.
މިއަދުގެ ޖަލްސާގައި ރައީސް ވިދާޅުވީ ކައުންސިލްތަކަށް ބްލޮކް ގްރާންޓުގެ ފައިސާ ދޫކުރަނީ ރައްޔިތުންނަށް ހިދުމަތްތައް ދިނުމަށް ކަމަށެވެ. އެހެން ނަމަވެސް ތަޖުރިބާގެ ދަތުރުގެ ނަމުގައި ބައެއް ކައުންސިލްތަކުން ޓީމުތައް ހަދައިގެން ރާއްޖެއިން ބޭރުގެ އެކި ގައުމުތަކަށް ދަތުރު ކުރަމުން ގެންދަނީ ކޮން ރައްޔިތަކަށް ފައިދާ ކުރުވަނި ގޮތަކަށްތޯ ސުވާލު އުފައްދައި ރައީސް ވިދާޅުވީ އެއީ އެއްވެސް ރައްޔިތަކަށް ފައިދާ ހުރި ގޮތެއް ނޫން ކަމަށެވެ.
މުޅި ޓީމު އޮތް ގޮތަށް ގައުމުތަކަށް އެބަދޭ.. ތިބޭފުޅުން ވެސް ނޫސް ބައްލަވައިފިއްޔާ އެނގިވަޑައިގަންނަވާނެ.. މިއަދުގެ ހެޑްލައިނެއްގައި ވެެސް އެބައޮތް.. ކޮންމެވެސް ރަށެއްގެ.. މުޅި އަތޮޅު ކައުންސިލް އޮތް ގޮތަށް ރާއްޖެއިން ބޭރަށް ވަޑައިގެންފި.. ތަޖުރިބާ ދެން ކީއްކުރަންތޯ.. ދެން ދައުރު މިއޮއް ނިމެނީ.. ދެން ތަޖުރިބާ ހޯއްދަވަން ތިއްބަވަން ވާނީ ކުރިން.. މި ކަހަލަ ކަންތަކަށް ނޫން.. ކައުންސިލްތަކުން.. ލާމަރުކަޒީ ނިޒާމަކީ މިއަށް ވުރެ މާ ސީރިއސް ނިޒާމެއް..
ރައީސް ވިދާޅުވި ގޮތުގައި އެ މެމްބަރަކީ ކޮންމެ ސިޔާސީ ޕާޓީއަކުން އިންތިހާބު ވެގެން އައި މެމްބަރެއް ނަމަވެސް ސިޔާސީ ވިސްނުން އެއްފަރާތްކޮށްލަން ޖެހޭ ކަމަށެވެ. އަދި ހިދުމަތް ދޭން ޖެހެނީ ހަމަހަމަ އުސޫލުން، ރައްޔިތުންނަށްކަމަށާއި ލިބޭ ފައިސާއާއި މެދު އަމަލު ކުރަން ޖެހޭނީ ޒިންމާދާރުކަމާއި އެކުކަމަށް ރައީސް ވިދާޅުވި އެވެ.
