ސަރުކާރުގެ ކުންފުނިތަކުގައި ހިނގަމުންދާ ވައްކަމުގެ މައްސަލަތަކަކީ މާލިއްޔަތު ކޮމިޓީން ހުޅުވާލި ފައިލެއް ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެއެވެ.
މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބޭނުންވާ ޑީސަލް ގަތުމުގެ މުއާމަލާތްތަކާ ގުޅޭ 2018-2020 ގެ ހާއްސަ އޮޑިޓް ރިޕޯޓަށް މަޖިލީހުގައި ބަހުސްކުރެވެމުންދަނިކޮށް ވާހަކަދައްކަވަމުން ޣަފޫރު ވިދާޅުވީ، އެމްޕީއެލްގެ ވައްކަމުގެ މައްސަލައަކީ ރައްޔިތުންގެ މަޖިލީހަށާއި ދިވެހި ގައުމަށް އައު މައްސަލައެއް ނޫން ކަމަށެވެ.
”މީގެ ހިތާމައަކީ މިކަންކަން އަޅުގަނޑުމެންނަށް ފެންނަން އެބަހުރި. ހުރިހާ ސަރުކާރުތަކެއްގައިވެސް މި ވައްކަންތައް ހިނގާފައި ހުރި. މި ސަރުކާރު އައި ފަހުން އަދި އެހާ ބޮޑު ވައްކަމެއް ފެންނާކަށް ނެތް. އެކަމަކު އެތަންތަނުގެ ބައެއް ބޭފުޅުން އެތިއްބެވީ އަދިވެސް ވައްކަން ކުރި ބޭފުޅުން ވަޒީފާގައި،“ ޣަފޫރު ވިދާޅުވިއެވެ.
ޣަފޫރު ފާހަގަކުރެއްވި ގޮތުގައި ސިފްކޯ، ޕޮލްކޯ، ކްރެސެންޓް، މޯލްޑިވްސް ގޭސް އަދި ފިއުލް ސަޕްލައި ފަދަ ކުންފުނިތަކުގައި ވައްކަމުގެ މައްސަލަތައް ހިނގާފައިވާ ކަމަށާއި، މިއީ މާލިއްޔަތު ކޮމިޓީން ހުޅުވާލި ވައްކަމުގެ ފައިލެއް ކަމުގައި ވިދާޅުވިއެވެ.
އަދި ސަރުކާރުގެ ކުންފުނިތަކުގައި ވައްކަން ކުރާ ފަރާތްތަކާ ދެކޮޅަށް މަސައްކަތްކުރަންޖެހޭ ކަމަށާއި، އެ ފަރާތްތައް މަގާމުން އެކަހެރިކޮށް، ގާނޫނީ އިމުގެ ތެރެއިން އަޅަންޖެހޭ ފިޔަވަޅުތައް އެޅުމަށް ސަރުކާރަށް ގޮވާލައްވާފައިވެއެވެ.
