މިދިޔަ އަހަރު ކައުންސިލްތަކަށް ދޫކުރި 2 ބިލިއަން ރުފިޔާއަށް ވުރެ ގިނަ ބްލޮކް ގްރާންޓު ފައިސާއިން، ކައުންސިލްތަކުން ރައްޔިތުންނަށް ހިދުމަތްނުކޮށް ބިލިއަނަކަށް ވުރެ ގިނަ ރުފިޔާ ބާކީ ކުރިކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިރޭ އޭދަފުށީގައި ބޭއްވި ޖަލްސާގައި ރައީސް ވިދާޅުވީ އެމަނިކުފާނަށް ހުރިހާ ރައްޔިތުން ވެސް ހަމަހަމާވާނެ ކަމަށެވެ.
ތަރައްގީގެ ވިސްނުމުގައި ކައުންސިލްތައް މަސައްކަތަ ކުރުމަށް އިލްތިމާސް ކުރައްވައި ރައީސް ވިދާޅުވީ، ކޮންމެ މެމްބަރެއް ވެސް މަގާމަށް އިންތިހާބުވެގެން އަންނަނީ ސިޔާސީ ޕާޓީއެއްގެ ޓިކެޓުގައިކަމަށެވެ. އެހެން ނަމަވެސް ކައުންސިލްތައް ވާން ޖެހޭނީ، ގައުމީ ވިސްނުން އިސްކުރާ ބަޔަކަށްކަމުގައި ރައީސް ވިދާޅުވި އެވެ.
ރައީސް ވިދާޅުވީ ވެރިކަން ހިންގުމުގެ ނިޒާމުގައި ކައުންސިލްތައް ހިމެނޭކަމަށާއި، ކައުންސިލްތަކުން ސަރުކާރުގެ މަސައްކަތްތަކަށް އެއްބާރުލުން ދޭން ޖެހޭނެކަމަށެވެ
ތަރައްގީގެ ވިސްނުން އެގޮތް ވާން ޖެހޭނެ.. އެ ކައުންސިލްތައް ހޮވިފައި ވަނީ ރައްޔިތުންނަށް ހިދުމަތް ދިނުމަށް.. އެހެންމެވީމަ ކައުންސިލްތަކުން މަސައްކަތް ކުރަން ޖެހޭނީ، ސަރުކާރުން ކަނޑައަޅާފައިވާ ސިޔާސަތުތައް ތަންފީޒު ކުރެވޭ ގޮތަށް.. ސަރުކާރުން ބަޖެޓު ފާސްކޮށްފައި ދިނީމައި އެ ބަޖެޓު ހަރަދު ކުރަން ޖެހޭނެ.. ޒިންމާދާރުކޮށް ހަރަދު ކުރަން ޖެހޭނެ..
ބްލޮކް ގްރާންޓުގެ ފައިސާގެ ބައެއް ތަފްސީލުތައް ދެއްވައި ސަރުކާރުން މިދިޔަ އަހަރު 2.2 ބިލިއަން ރުފިޔާ އެގޮތަށް ދޫކޮށްފައިވާކަމަށެވެ. ރައީސް ވިދާޅުވީ އަހަރު ނިމޭއިރު، އެ ފައިސާ ހުންނަން ޖެހޭނީ ރައްޔިތުންގެ ހައްގުގައި ހަރަދު ކުރެވިފައި ކަމަށެވެ. އެހެން ނަމަވެސް އަހަރު ނިމިގެން ދިޔައިރު ކައުންސިލްތަކުގެ އެކައުންޓުގައި އެއްވެސް މިންވަރަކަށް ބޭނުން ނުކޮށް ހުރި 1.7 ބިލިއަން ރުފިޔާ އެބަހުރިކަމަށް ރައީސް ވިދާޅުވި އެވެ.
2.2 ބިލިއަން ދިނީ، އަހަރު ނިމުނު އިރު ހަރަދު ނުކޮށް ބާކީ އެބަހުރި ހުރިހާ ކައުންސިލެއް އެއްކޮށްލީމައި 1.4 ބިލިއަން.. މި ފައިސާ މިދެނީ.. މިއީ ބްލޮކް ގްރާންޓު.. މި ފައިސާ ކައުންސިލްތަކަށް މި ދެނީ، ހިދުމަތްތައް ފޯރުކޮށްދޭން.. މުނިސިޕަލް ހިދުމަތް ކުރަން.. އެހެންވީމާ އެ ފައިސާ ހަރަދުކޮށް ދިނުމަކީ ކައުންސިލްތަކަށް ލާޒިމުކަމެއް ރައްޔިތުންނަށް ހިދުމަތްކޮށްދޭން.. ދެން މި ހެން ގޮސް ގާނޫނުގައި ބުނާ ހުރިހާ މުނިސިޕަލްކަމެއް ކުރަން..
ރައީސް ވިދާޅުވީ ރައްޔިތުންނަށް ހިދުމަތްކޮށްދޭން ދޫކޮށްފައި ހުރި ފައިސާ އަހަރު ނިމޭއިރު، އެއްވެސްކަމެއް ނުކޮށް ހުރުމަކީ މައްސަލައެއް ކަމަށެވެ. މިއީ ރައްޔިތުންނަށް ހިދުމަތް ކުރުމަށް ބޭނުން ކުރުން ލާޒިމް ފައިސާއެއްކަމަށާއި މި ފައިސާ ރައްކާކޮށްގެންވާ ފައިދާއެއް ނެތްކަމަށް ރައީސް ވިދާޅުވި އެވެ.
