ނިމިދިޔަ ސަރުކާރުން ދިޔައީ އެއްވެސް ޖެހިލުމެއް ނެތި ރޯމާ ދުވާލު ވައްކަން ކުރަމުންކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރުި އަހުމަދު ނާޒިމް ވިދާޅުވެއްޖެއެވެ.
28 މިލިއަން ރުފިޔާ އެމްޕީއެލްއަށް ގެއްލުނު މައްސަލައިގައި މެމްބަރު ނާޒިމް ވިދާޅުވީ އެ 28 މިލިއަން ރުފިޔާގެ ތެރެއިން 9.6 މިލިއަން ރުފިޔާ އަކީ ޖެނެރޭޓަރުތަކަށް ތެޔޮ އެޅުމުގައި މަކަރު ހަދައިގެން އަދި ޖެނެރޭތަރަކަށް ބޭނުންވާ މިންވަރަށް ވުރެ އިތުރަށް ތެޔޮ އަޅައިގެން ޕާޗޭސް އޯޑަރު ހަދައިގެން ނެގި ފައިސާ ކަމަށެވެ.
ނާޒިމް ވިދާޅުވީ ޖަނަރޭޓަރު ތަކުގެ ލޮގު ތަކުންނާއި ޖަނަރޭޓަރު ތަކުގެ ފިއުލް ފްރޭމް ތަކުގެ ހިސާބުތަކުން އިތުރަށް ފައިސާ ނެގިކަން އެނގެން ހުރި ކަމަށެވެ.
ނާޒިމް ވިދާޅުވީ ބާކީ 18 މިލިއަން ރުފިޔާ އަކީ ޓަގް ބޯޓުތަކުން ތެޔޮ އަޅައިގެން ގެއްލުވާލައިފައިވާ ފައިސާ ކަމަށެވެ. އޭގެން ފާހަގަކުރެވުނު އެއްކަމަކީ 8 ލައްކަ ލީޓަރުގެ ތެޔޮ ހުޅުމާލެ ޖެޓީއަށް ނުވަތަ ޓަގު ބޯޓުތަކަށް އެޅުމަށް ފޮނުވި ކަން ކަމަށް މެމްބަރު ވިދާޅުވިއެވެ. އެހެންނަމަވެސް ހުޅުމާލެ ޖެޓީން ޓަގު ބޯޓުތަކަށް ދުވަހަކުވެސް ތެޔޮ ނާޅާކަމަށް ޓަގު ބޯޓުގެ ކެޕްޓަނުން ބުނެފައިވާ ކަމަށް މެމްބަރު ވިދާޅުވިއެވެ.
”އަޅުގަނޑުމެންނަށް އިނގޭ އެއްވެސް ޖެހިލުމެއް ނެި ހަމަ ރޯމާ ދުވާލު ވައްކަން ކުރަމުން ދަނީ ކަން. މިކަންތައް އެމްޕީއެލްގެ މެނޭޖްމެންޓަށް 2019 ވަނަ އަހަރުގެ އިންޓާރނަލް އޮޑިޓަކުންވެސް ފާސްކުރެވުނު ކަމަށް މި ރިޕޯޓުގައި ފާހަގަކޮށްފައި އެބައޮތް. އެހެންނަމަވެސް އެޅިފިޔަވަޅެއް ނެތް. ކަންތައް ދިޔައީ ކުރިއަށް“
މެމްބަރު ވިދާޅުވީ މި މައްސަލައިގައި ޝާމިލްވާ އެމްޕީއެލްގެ 2 މުވައްޒަފުންނަށް ދައުވާކޮށްފައިވާ ކަމަށެވެ. އަދި އެމީހުންގެ މައްސަލަ ޖިނާއީ ކޯޓުގައި ކުރިއަށް ދާ ކަމަށް ނާޒިމް ވިދާޅުވިއެވެ. އެ ދެ މުވައްޒަފުން ވަޒީފާއިންވެސް ވަކިކޮށްފައިވާއިރު، އެފްއެސްއެމްއަށް ބަލާއިރު ކަން ހިނގައިފައިވަނީ އެހެން ނޫން ކަމަށް މެމްބަރު ވިދާޅުވިއެވެ.
އެފްއެސްއެމްގައި މި މައްސަލައިގައި ބައިވެރިވާ ކަމަށް ބެލެވޭ މީހާ ވަނީ ޑިމޯޓްކޮށްފައި ކަމަށާއި، ކޯތަށް ފޮނުވައިފައިވަނީ ޑްރައިވަރަކަށް ހުރި ބަންގްލަދޭޝް މީހެއްގެ މައްސަލައެއް ކަމަށް މެމްބަރު ވިދާޅުވިއެވެ. އެހެންކަންކަން ވުމުން މެނޭޖްމެންޓުގެ ޒިންމާއާއި މެދު ސުވާލު އުފެދޭ ކަމަށް މެމްބަރު ވިދާޅުވިއެވެ. އެހެންކަމުން އެފްއެސްއެމްގެ މައްސަލަ ވީހާވެސް ގާތުން މައްސަލަ ބަލަން ޖެހޭ ކަމަށް މެމްބަރު ވިދާޅުވިއެވެ.
2018 އިން 2020 އަށް ހިންގުނު ތެލުގެ މުޢާމަލާތްތަކާ ގުޅޭ ގޮތުން އޮޑިޓަރ ޖެނެރަލްގެ އޮފީހުން ހެދި ހާއްސަ އޮޑިޓް ރިޕޯޓުގައި ވަނީ މިލިއަނުން ގުނާ ލީޓަރުގެ ތެޔޮ ގެއްލިފައިވާކަމާއި، މި ހިޔާނާތުގައި އެމްޕީއެލް އަދި އެފްއެސްއެމްގެ މުވައްޒަފުން ބައިވެރިވެފައިވާކަން ފާހަގަކޮށްފައެވެ.
