ޕޯސްޓް މެދުވެރިކޮށް ރާއްޖެއަށް އެތެރެކުރަން އުޅުނު ފަސް މިލިއަން ރުފިޔާގެ އަގުހުރި މަސްތުވާތަކެތި މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސް އިން ބުނީ މިދިޔަ ޖޫން މަހުގެ 18 ވަނަ ދުވަހު ޕޯސްޓް މެދުވެރިކޮށް ރާއްޖެއަށް އެތެެރެކުރަން އުޅެނިކޮށް އަތުލައިގަތް މަސްތުވާތަކެތީގެ ބަރުދަނުގައި ހުރީ 3.6 ކިލޯ ކަމަށެވެ.
އެ ތަކެތި ތަހުލީލުކޮށް ބެލުމުން އެނގިފައިވަނީ އެއީ މަސްތުވާތަކެތީގެ ބާވަތެއް ކަމަށްވާ ސިންތެޓިކް ކެތިނޯން ކަމެވެ. އަދި ތަކެތީގެ މަގުމަތީ އަގަކީ ގާތްގަނޑަކަށް ފަސް މިލިއަން ރުފިޔާ ކަމަށް ކަސްޓަމްސް އިން ބުނެފައިވެއެވެ.
ކަސްޓަމްސްއިން މީގެ ކުރިން ބުނެފައިވަނީ މިދިޔަ ދެ އަހަރާއި ބައިގެ މުއްދަތުގެ ތެރޭގައި 324 ކިލޯގެ މަސްތުވާތަކެތި އަތުލައިގެންފައިވާ ކަމަށެވެ. އެގޮތުން 2024 އިން ފެށިގެން މި އަހަރުގެ ޖޫން މަހުގެ ނިޔަލަށް 147 މައްސަލައެއްގައި 324 ކިލޯގެ މަސްތުވާތަކެތި އަތުލައިގެންފައިވާ ކަމަށް ކަސްޓަމްސްއިން ހާމަކޮށްފައިވެއެވެ.
މަސްތުވާތަކެތި އެތެރެކުރުން ހުއްޓުވުމަށް ވެލާނާ އިންޓަނޭޝަނަލް އެއާޕޯޓްގައި ވަނީ އެންމެ ޒަމާނީ ސްކޭންކުރުމުގެ މެޝިނެއް ވެސް ގާއިމްކޮށްފައެވެ. އަދި ކަނޑުމަގުން ރާއްޖެއަށް އެތެރެވާ އުޅަނދުފަހަރު ބެލުމަށް ހާއްސަ ފިޔަވަޅުތަކެއް ވެސް ވަނީ އަޅައިފައެވެ.
