ސައުދީ އަރަބިއްޔާއިން އިސްނަގައިގެން އުފައްދާފައިވާ ބައިނަލްއަގުވާމީ ދިފާއީ ކޯލިޝަނުގައި ރާއްޖެއިން ބައިވެރިވާން ނިންމައި އެ މައްސަލަ ރައްޔިތުންގެ މަޖިލީހަށް ހުށަހަޅައިފިއެވެ.
”ޗާޓާ އޮފް ދަ މަލްޓިނޭޝަނަލް މެރިޓައިމް ޑިފެންސް ކޯލިޝަން“ގައި ދިވެހިރާއްޖެއިން ބައިވެރިވެ، ސޮއިކޮށް، އެ މުއާހަދާ ތަސްދީގުކުރެއްވުމަށް ރައްޔިތުންގެ މަޖިލީހުގެ ރުހުން ހޯދުމަށް ޓަކައި ރައީސް ޑރ. މުހައްމަދު މުއިއްޒު ފޮނުއްވި މައްސަލަ ދިރާސާކޮށް، މަޖިލީހުގެ ކަމާ ބެހޭ ކޮމިޓީއަށް ފޮނުވުމަށް މިއަދުގެ މަޖިލީހުގެ ޖަލްސާއަށް ވަނީ އެޖެންޑާކޮށްފައެވެ.
މިދިޔަ މަހުގެ 30 ގައި ސައުދީން އިސްނަގައިގެން އުފެއްދި އެ ދިފާއީ ކޯލިޝަނުގެ ބޭނުމަކީ އިންޑިއާ ކަނޑާއި މެޑިޓެރޭނިއަން ކަނޑަށް ދަތުރުކުރެވެން އޮންނަ މަގު ކަމަށްވާ، ގަލްފް އޮފް އޭޑަން އާއި ބާބް އަލް މަންދަބް ކަނޑުއޮޅިއާއި ރަތް ކަނޑުގެ ސަލާމަތީ ކަންކަން ބެލެހެއްޓުމެވެ. އަދި ދުނިޔޭގެ އިގްތިސާދާ ގުޅިފައިވާ މުހިންމު ސަރަހައްދުން ދަތުކުރުމުގެ މިނިވަންކަމާއި ބައިނަލްއަގުވާމީ ވިޔަފާރީގެ ސަލާމަތްތެރިކަން ކަށަވަރުކުރުމެވެ.
14 ގައުމަކުން ބައިވެރިވާ އެ ދިފާއީ ކޯލިޝަނުގައި ސައުދީގެ އިތުރުން ތުރުކީ، މިސްރު، ޕާކިސްތާން، ބަންގްލަދޭޝް، ޔަމަން، ކުވެއިތު، ބަހްރޭން، ގަތަރު، އުރުދުން، ޖިބޫތީ، ސޯމާލިއާ، ސޫދާން އަދި ކޮމޯރޯސް ހިމެނެއެވެ.
އެ ކޯލިޝަނުގެ އަމާޒުތަކަށް އެއްބަސްވާ ގައުމުތަކުން ކޯލިޝަނުގައި ބައިވެރިވުމަށް ހުރަހެއް ނޯންނާނެ ކަމަށް ސައުދީން މީގެ ކުރިން ވަނީ ބުނެފައެވެ. އެ ކޯލިޝަނުގެ ހިންގުމުގެ އޮނިގަނޑެއް އެކުލަވާލައި އިތުރު ގައުމުތަކަށް ގުޅުމުގެ ފުރުސަތު ފަހިކޮށްދިނުމަށް މި މަހުގެ 12 އަދި 13 ވަނަ ދުވަހު ގައުމުތަކުގެ މަންދޫބުން ބައްދަލުކުރަން ވަނީ ހަމަޖެހިފައެވެ.
އެ ކޯލިޝަނުން ރަތް ކަނޑުގެ ސަލާމަތީ ކަންކަން ބަލަހައްޓައި އިންޓެލިޖެންސް މައުލޫމާތު ބަދަލުކޮށް، ކަނޑުމަތީގައި ތަމްރީނުތަކާއި އޮޕަރޭޝަންތައް ހިންގުން ހިމެނެއެވެ. ކޯލިޝަނުގެ ކޮމާންޑަރަކަށް ހަމަޖައްސާފައިވަނީ ސައުދީގެ ރިއާ އެޑްމިރަލް އަބްދުﷲ ބިން ސަލެމް އަލް ޝެހްރީއެވެ.
އެ ކޯލިޝަން އުފައްދާފައި މިވަނީ އިރާނު ހަނގުރާމައިގެ ސަބަބުން ހޮރުމޫޒު ކަނޑޮއޮޅި ބަންދުވެ ތެލާއި ގޭސް އެކްސްޕޯޓުކުރުމަށް ބޮޑެތި ހުރަސްތަކެއް އެޅި، ދުނިޔޭގެ އިގްތިސާދަށް އަސަރުކޮށްފައި ވަނިކޮށެވެ. ހޮރުމޫޒު ކަނޑުއޮޅިއެކޭ އެއްގޮތަކަށް ބާބް އަލް މަންދަބް ކަނޑުއޮޅިން ވެސް ބައިނަލްއަގުވާމީ ވިޔަފާރީގެ ބޮޑު އިންސައްތައެއް ދަތުރުކުރެއެވެ.
