ތިލަމާލެ ބްރިޖް މަޝްރޫއުގެ ދަށުން މާލެއާއި ވިލިނގިލި ގުޅުވައިދޭ ސެގްމެންޓްތަކުގެ ތެރެއިން އެންމެ ފަހު ސެގްމެންޓް ގުޅާލައިފިއެވެ.
ކޮންސްޓްރަކްޝަން މިނިސްޓްރީން ބުނެފައިވަނީ މިހާރު އެންމެ ފަހު ސެގްމެންޓް ކާސްޓުކުރުމުގެ މަސައްކަތް ނިމިފައިވާ ކަމަށެވެ. މާލެ-ވިލިމާލެ ގުޅުވާލާ ފަހު ސެގްމަންޓް ކާސްޓު ކުރުމުގެ މަސައްކަތް ފަށާފައިވަނީ މިއަދު 11:00 ޖެހިއިރުއެވެ.
މި ފަހު ސެގްމެންޓް ބެހެއްޓުމާއެކު މާލެއާއި ވިލިނގިލި ގުޅުވައިދޭ ބްރިޖުގެ ”ސުޕަ ސްޓްރަކްޗާ“ ނުވަތަ މައި އޮނިގަނޑުގެ މަސައްކަތް މުޅިން މިހާރު މިވަނީ ފުރިހަމަ ވެފައެވެ.
ނަމަވެސް ބްރިޖުގެ ފިނިޝިން މަސައްކަތްތަކާއި، ރައްކާތެރިކަމުގެ ރޭލިންގްސް ހަރުކުރުމާއި، އަލިކުރުމުގެ މަސައްކަތްތައް ފަދަ އިތުރު އިދާރީ އަދި ފަންނީ މަސައްކަތްތަކަށް އަދި ވަގުތު ނަގާނެ ކަމަށާއި ބްރިޖުގެ މައި އޮނިގަނޑު ގުޅާލެވުނު ނަމަވެސް، އާންމުންނަށް ދަތުރުފަތުރު ކުރަން ފެށޭނީ ފިނިޝިން މަސައްކަތްތައް އެކީ ނިމުމުން ކަމަށް އެފްކޮންސްއިން ވަނީ މައުލޫމާތުދީފައެވެ.
އެ މަޝްރޫޢުގައި މާލެ، ވިލިމާލެ، ގުޅިފަޅު އަދި ތިލަފުށި ގުޅާލާއިރު، އެ ރަށްތަކަށް ގުޅާލާ ހައިވޭތައް ހެދުމުގެ މަސައްކަތްވެސް އެކުއެކީގައި ދަނީ ކުރިއަށް ގެންދަމުންނެވެ.
ގުޅިފަޅުގައި ބްރިޖާ ގުޅޭ މަގުތައް ހެދުމުގެ މަސައްކަތް ބާރުސްޕީޑުގައި ކުރިއަށްދާއިރު، ތިލަފުށީގައި ކުރިއަށްދަނީ ބްރިޖާ ގުޅިގެން ޖަހަންޖެހޭ ރިވެޓްމަންޓް ޖެހުމުގެ މަސައްކަތް ކަމަށް އިންފްރާސްޓްރަކްޗާ މިނިސްޓްރީން ވިދާޅުވެއެވެ. ބުރިޖާއި ކޯޒުވޭތައް ހިމެނޭހެން މުޅި ކަނެކްޓިވިޓީގެ ދިގުމިން 6.7 ކިލޯމީޓަރަށް އަރައެވެ.
އިންޑިއާ ސަރުކާރުން ދޭ 100 މިލިޔަން ޑޮލަރުގެ ގްރާންޓާއި، 400 މިލިޔަން ޑޮލަރުގެ ލައިން އޮފް ކްރެޑިޓުގެ ދަށުން ހިންގާ މުޅި މި މަޝްރޫޢަށް 500 މިލިޔަން ޑޮލަރު ހޭދަވާނެއެވެ. އެއީ، 7 ބިލިޔަނަށްވުރެ ގިނަ ރުފިޔާއެވެ. މި މަޝްރޫޢަށް ދިވެހި ސަރުކާރުންވެސް ޚަރަދު ކުރާ ގޮތަށް ވަނީ ހަމަޖެހިފައެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ތަރައްގީގެ އެންމެ ބިޔަ މަޝްރޫއު ކަމަށްވާ ތިލަމާލެ ބްރިޖުގެ މަސައްކަތް އިންޑިއާގެ އެފްކޮންސް އިންފްރާސްޓްރަކްޗާއާ ހަވާލުކޮށްފައި ވަނީ އޮގަސްޓް 26، 2021 ގައެވެ.
