ރާއްޖޭގެ ޓޫރިޒަމް އިސްތިހާރުކުރާ ކުންފުނި ވިޒިޓް މޯލްޑިވްސް ކޯޕަރޭޝަންގެ އާ އެމްޑީއަކަށް އަބްދުﷲ ޔާސިރު ހަމަޖައްސައިފިއެވެ.
އައްޑޫ ސިޓީ ފޭދުއަށް އުފަން ޔާސިރަކީ މީގެ ކުރިން ފަތުރުވެރިކަމުގެ ދާއިރާގައި އެކި ވަޒީފާތައް އަދާކުރައްވާފައިވާ ބޭފުޅެކެވެ. އެންޓްރިޕްރިނޯސް އެސޯސިއޭޝަން އޮފް މޯލްޑިވްސްގެ ރައީސަކަށް ވެސް ހުންނެވި ޔާސިރަަކީ މާސްޓާސް އިން ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާ ބޭފުޅެކެވެ.
އޭނާ އެ މަގާމަށް އައްޔަންކުރުމާ ގުޅިގެން އެ ކޯޕަރޭޝަނުން ބުނީ، އާ ހިޔާލުތަކާއެކު ގުޅިގެން މަސައްކަތްކުރުމުގެ ރޫހެއްގައި، ބައިނަލްއަގުވާމީ ފަތުރުވެރިކަމުގެ ބާޒާރުތަކުގައި ރާއްޖޭގެ މަގުބޫލުކަން އިތުރަށް ވަރުގަދަކުރުމަށް ކުރަމުންދާ މަސައްކަތްތަކުގެ އާ ބާބެއް ފެށިގެންދާނެ ކަމަށެވެ.
ޔާސިރު އެ މަގާމަށް ހަމަޖެއްސީ، މީގެ ކުރިން އެ މަގާމުގައި ހުންނެވި އިބްރާހިމް ޝިއުރީ މިދިޔަ ހޯމަ ދުވަހު މަގާމުން އިސްތިއުފާ ދެއްވުމުންނެވެ. ވިޒިޓް މޯލްޑިވްސް ހިންގުމާ ޝިއުރީ ހަވާލުވީ ޖޫން 13، 2024 ގައެވެ.
