އެމަނިކުފާނުގެ ވެރިކަމުގައި ފ. އަތޮޅު ހިމިތީ ސަރަހައްދުގައި ސައުދީ އަރަބިއްޔާއިން ހިންގަން އުޅުނު ބިޔަ މަޝްރޫއާއި ދެކޮޅަށް އަޑުއުފުލި ސިޔާސީ ލީޑަރުންނާއި ދީނީ އިލްމުވެރިން، މިހާރު ރާއްޖޭގެ ބިންތައް ޔަހޫދީންނަށް ދޫކުރަމުންދާއިރު އެއްވެސް ބަހެއް ނުބުނެ ހިމޭނުން ތިބޭތީ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފާޑުވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ ރޭ ޕީއެންއެފްގެ އޮފީހުގައި ކުރިޔަށް ގެންދިޔަ ޖަލްސާގައި ވާހަކަ ދައްކަވަމުންނެވެ. މީގެ ކުރިން ވެސް ރައީސް ޔާމީން ވަނީ އީގަލްސް ހިލްސްގެ އެއްބަސްވުމާއި މެދު ސުވާލު އުފައްދައި، މިއީ ދެން އަންނަ އެއްވެސް ސަރުކާރަކުން އަމަލު ކުރާނެ އެއްބަސްވުމެއް ނޫންކަމަށް ވިދާޅުވެފަ އެވެ.
ރޭ ޕީއެންއެފްގެ ޖަލްސާގައި ރައީސް ޔާމީން ވަނީ، މި ޕްރޮޖެކްޓާއި އެމަނިކުފާނުގެ ސަރުކާރުގައި އިއުލާނު ކުރި ފ އަތޮޅު މަޝްރޫއުއާއި ގުޅޭގޮތުން ވާހަކަ ދައްކައި މިއީ ތަފާތު ދެ ނިޔަތެއްގެ ޕްރޮޖެކްޓެއްކަމަށް ވިދާޅުވެފަ އެވެ. އަދި އޭރު އިއުލާނު ކުރި އެ ޕްރޮޖެކްޓުގެ ސަބަބުން ރާއްޖެއަށް ވަރަށް ބޮޑެތި، އިގްތިސާދީ ކުރިއެރުންތައް ލިބުނީސްކަމަށް ރައީސް ޔާމީން ވިދާޅުވި އެވެ.
ރައީސް ޔާމީން ވަނީ ހައުސިން، ކޮންސްޓްރަކްޝަން ނިސްޓަރ ޑރ. އަބްދުﷲ މުއްތަލިބަށާއި ރައީސުލްޖުމްހޫރިއްޔާއަށް އަމާޒުކުރައްވައި ބަހުގެ ހަމަލާތަކެއް ދެއްވާފައެވެ. އެމަނިކުފާނު ވިދާޅުވީ، މިއީ ދިވެހިންނަށް ދިގު މުއްދަތަކަށް ފައިދާހުރި މަޝްރޫއެއް ނޫންކަމަށާއި، މި މަޝްރޫއަށް އެ ބުނާ ދިގު މުއްދަތު ނުވެސް ލިބޭނެ ކަމަށެވެ. އަދި 99 އަހަރަށް ބިން ކުއްޔަށް ދިނުމަކީ ”ފްރީ ހޯލްޑިން“ އުސޫލުން އެ ބިންތައް ދާއިމީކޮށް ވިއްކާލުން ފަދަ ކަމެއްކަމަށާއި، އަންނާން އޮތް ޖީލުތަކުގެ ހައްގުތައް އެގޮތަށް ދޫކޮށްނުލެވޭނެކަމަށް ވިދާޅުވިއެވެ.
ރައީސް ޔާމީން ވިދާޅުވީ، އެމަނިކުފާނުގެ ވެރިކަމުގައި ފ. އަތޮޅަށް ގެންނަން އުޅުނީ 10 ބިލިއަން ޑޮލަރަށް ވުރެ ކުޑަނޫން، ދިވެހިންނަށް ގިނަ ވަޒީފާތަކެއް ލިބިގެންދާނެ އަދި އިސްލާމީ އުސޫލުތަކާ އެއްގޮތަށް ކުރިއަށްދާނެ ބޮޑު މަޝްރޫއެއް ކަމަށެވެ. ނަމަވެސް އެ މަޝްރޫއަކީ ރާއްޖޭގެ ފަޅުރަށަކާއި ފަޅެއްގައި ހިންގަން އުޅުނު މަޝްރޫއަކަށް ވީއިރުވެސް، އޭރު ތިބި ހުރިހާ ސިޔާސީ ލީޑަރުންނާއި ކުރީގެ ރައީސުން ގައުމު ވިއްކާލަނީކަމަށް ބުނެ އަޑުގަދަކޮށް އެކަން ހުއްޓުވިކަމަށް އެމަނިކުފާނު ވިދާޅުވިއެވެ.
ރައީސް ޔާމީން ފާހަގަކުރެއްވި ގޮތުގައި، ދިވެހިންގެ އަމިއްލަ ފައިސާއިން ހިއްކަމުންދާ އަގުބޮޑު ބިންތައް މިއަދު ޔަހޫދީންނަށް ދޫކޮށްލާއިރު، މަތީ ޝަރަފާއި އިއްޒަތް ލިބިފައިވާ ސިޔާސީ ލީޑަރުންނާއި ދީނީ އިލްމުވެރިންގެ ފަރާތުން އެއްވެސް ކަހަލަ ދެކޮޅުވެރިކަމުގެ އަޑެއް ނީވެއެވެ. އަދި ޝައިޚް ފަޒްލޫން ފަދަ ބޭފުޅުން މިކަމުގައި ވަތަނީ ފިކުރެއްގައި ގައުމުގެ އިސްތިގުލާލާއި ސަލާމަތަށް ޓަކައި ވާހަކަދެއްކެވި ނަމަވެސް، ދީނީ ނަޒަރިއްޔާތުން މިކަމާ ދެކޮޅަށް ޢިލްމުވެރިންގެ ބަހެއް ނީވޭތީ ކަންބޮޑުވާކަމަށް ވިދާޅުވި އެވެ.
ސައުދީ މަޝްރޫއު ވީ ވިޔާނުދާ ކާފަރު މަޝްރޫއަކަށް. އެކަމަކު ޔަހޫދީންނާ އެކީ މި ހިންގާ މަޝްރޫއު މިއީ ހަމަ 100 އިންސައްތަ ސައްހަ، ހަލާލު ޓޫރިޒަމަށްތޯ މިވީ… މިހާރު ނެތޭ އަނގަ ގަދަ އެކު އަޑެއް ބަނޑެއް އިއްވާލަން ބޭނުންވާ އެކަކުވެސް ނެތް އިނގޭތޯ. މިހިރީ އަޅުގަނޑުމެންގެ ލީޑަރުންނަށް ތިބި މީހުންގެ ޔަހޫދީކަން
މީގެއިތުރުން، މިފަދަ ކަންކަމުގެ ސަބަބުން ދިވެހި ރައްޔިތުންނަށް އެއްވެސް ފައިދާއެއް ނެތް ކަމަށާއި، އަމިއްލަ ގައުމުގައި ދިވެހިން ނިކަމެތިވެ، ޖިފުޓި ޖަހައިގެން އުޅެން ޖެހޭއިރު، ބޭރުގެ ފަރާތްތަކުން ބޮޑެތި އިމާރާތްތައް އަޅައިގެން ތަނަވަސްކަމުގައި ދިރިއުޅޭނެ ދުވަހެއް އަތުވެދާނެކަމަށް ރައީސް ޔާމީން ވަނީ ވިދާޅުވެފަ އެވެ.
ރައީސް ޔާމީން އިތުރަށް ވިދާޅުވީ، މިހާރުގެ ސަރުކާރުން ބިންތައް ދޫކޮށްލުމުގައި ގެންގުޅޭ ސިޔާސަތުތަކުގެ ސަބަބުން ދިވެހިންގެ އިގްތިސާދީ މިނިވަންކަން ގެއްލިގެންދާނެ ކަމަށެވެ. އެމަނިކުފާނު ވިދާޅުވި ގޮތުގައި، ސިޔާސީ ވެރިންނާއި ބާރުގަދަ ފަރާތްތަކުން މިފަދަ ކަންކަމާ މެދު އަނގައިން ނުބުނެ ހަނު ތިބެނީ، މި ސަރުކާރުގެ ތެރެއިން އެ މީހުންނަށް ލިބޭ އަމިއްލަ މަންފާއާއި ބައި ބޮޑުވުމުގެ ސަބަބުންނެވެ. އަދި މިއީ ގައުމުގެ މުސްތަގުބަލަށް ވުރެ އަމިއްލަ އެދުން އިސްކުރުންކަމަށް ސިފަކުރެއްވިއެވެ.
