އިދިކޮޅު ފަރާތްތައް ތިބި ގޮތުން ލިބޭ ނިއުމަތްތައް ސިއްރުކޮށްގެން މަސައްކަތް ކުރުމަކީ މިއަދު ކުރަންޖެހޭ ކަމެއް ކަމަށް ފުވައްމުލަކު ދެކުނު ދާއިރާގެ އިބްރާހީމް ހުސެއިން ވިދާޅުވެއްޖެއެވެ.
ސަންގުޓީވީގެ ”ހަބަރަށްފަހު“ ޕްރޮގްރާމްގައި މެމްބަރު އިބްރާހީމް ހުސެއިން ވިދާޅުވީ ރާއްޖޭގެ ބިމެއް 99 އަހަރަށް ދެނީ އަލަށް ނޫން ކަމަށެވެ. ރާއްޖޭގެ އެތައް ރިސޯޓެއް ކުއްޔަށް ދީފައިވާ ކަމަށާއި މިއީ އެންމެނަށް ވެސް އެނގޭނެ ހަގީގަތެއް ކަމަށް މެމްބަރު ވިދާޅުވިއެވެ. މެމްބަރު ވިދާޅުވީ ރައްޔިތުންނަށް ކަންކަން ކޮށްިދނުމުގައިވެސް ރާއްޖެއަށް ބޮޑެތި އިންވެސްޓްމެންޓްތައް ގަނައުމަކީ ފަސޭހަ ކަމެއް ނޫން ކަަމަށާއި އެއީ ވަރަށް އުނދަގޫކަމެއް ކަމަށާއި އަދި އެފަދަ ބޮޑު ކުންފުންޏަކުން ރާއްޖެއަށް އިންޓްރެސްޓް އުފެއްދުމަކީވެސް ކުޑަ ކަމެއް ނޫން ކަމަށެވެ.
މެމްބަރު ވިދާޅުވީ ރާއްޖޭގެ އެކި ވަސީލަތްތައް ބޭނުންކުރުމަށް އަބަދުވެސް ބާރުއަޅާ ކަމަށާއި ރައިސް ޑރ. މުހައްމަދު މުއިއްޒު ވިސްނުންތެރިކަމާއެކު މަސައްކަތް ކުރެއްވުމަށްފަހު މިހާހިސާބަށް އައުމުން އިދިކޮޅުގެ ފަރާތްތަކުން އެކަމަށް ފާޑުކިޔާ ދައްކާ ވާހަކައަކީ ހަގީގަތުގައިވެސް ރައްޔިތުންނަށް ނޫނެކޭ ބުނުން ކަމަށެވެ. އެފަދަ ޕްރޮޖެކްޓުތަކުން ލިބިގެންދާނެ ކުރިއެރުންތަކަކީ ގައުމުގެ ހެވާއި ހާބަޔަށާއި ގައުމުގެ ކުޑަ ބޮޑު އެންމެންނަށް ލިބިގެންދާ ފަހި ފުރުސަތުތަކެއް ކަމަށް މެމްބަރު ވިދާޅުވިއެވެ.
މެމްބަރު ވިދާޅުވީ ސިޔަސީ ޕާޓީތަކުގެ މައްސަލަ ބޮޑުކަމަށާއި އެކަމުގެ ވާދަވެރިކަމުގައި، އޭރަކު ވެރިކަމެއްގައި އޮންނަ ޕާޓީއަކުން ގައުމަށް ފައިދާހުރި ކަމެއްކުރި ނަމަވެސް އެއީ ހެޔޮ މަސައްކަތެއް ގޮތުގައި އިދިކޮޅަށް އޮންނަ ޕާޓީން ބަލައި ނުގަންނަ ކަމަށާއި އެއީ ރައްޔިތުންނަށް ހެވެއް ލިބޭނެ ކަމެއް ގޮތުގައިވެސް ބަލައި ނުގަންނަ ކަމަށެވެ.
”އަޅުގަނޑުމެން ސިޔާސީވެސް ވާން ވާނީ ވަކިވަރަކަށް. ސިޔާސީ ޕާޓީތައްވެސް ހިންގަން ޖެހޭނެ، ރައްޔިތުން ނެތް ތަނެއްގައި ކޮން ސިޔާސީ ޕާޓީއެއްތޯ، ކޮން ސިޔާސީ އެއްތޯ. އަޅޫގަނޑުމެން ވިސްނާލަން ވާނެ. އެހެންވީމަ ރައްޔިތުންގެ ކިބައިން މިކަންކަން މި ހިނގަނީ، ސިޔާސީ ޕާޓީތައްވެސް ހިނގަނީ ސިޔާސީ ޕާޓީތަކަށް ފައިސާވެސް ލިބެނީ“
މެމްބަރު ވިދާޅުވީ އެ ޕްރޮޖެކްޓު ކުރިއަށް ގެންދިޔަ ނުދޭން ސަރުކާރާއި އިދިކޮޅު ހުރިހާ ޕާޓީއަކުން މަސައްކަތް ކުރަމުންދާ މަންޒަރު ފެންނަމުންދާ ކަމށެވެ. އެހެންނަމަވެސް އެ ޕްރޮޖެކްޓަކީ ރާއްޖެއަށް ފައިދާ ކުރަނިވި، ރާއްޖެއަށް މުހިންމު ޕްރޮޖެކްޓެއް ކަމަށް އެންމެންވެސް ގަބޫލުކުރައްވާނެ ކަމަށް މެމްބަރު ވިދާޅުވިއެވެ.
އޭނާ ވިދާޅުވީ އެ އެއްބަސްވުމުގައި ސޮއިކުރުމަށް އެގައުމަށް ދިޔުމަކީ މައްސަލައެއް ނޫން ކަމަށާއި އެކަން ކުރަންޖެހޭނީ ކޮންމެހެން ރާއްޖޭގައި ނޫން ކަމަށެވެ. މެމްބަރު ވިދާޅުވީ ލިބޭ ނިއުމަތްތައް ސިއްރުކޮށްގެން އެކަމަކަށް މަސައްކަތް ކުރުމަކީ، އިދިކޮޅު ފަރާތްތައް ތިބި ގޮތުން ކުރަންޖެހޭ ކަމެއް ކަމަށެވެ.
