މާލޭ ވިޔަފާރި ބަނދަރު ޒަމާނީކުރުމުގެ ވިސްނުމަކީ އެތައް އަހަރެއް ކުރިން ކަމާ ބެހޭ އިދާރާތަކުން ގެންގުޅެމުން ދިޔަ ހިޔާލެއް ނަމަވެސް އެތަން ޒަމާނީކޮށް ތަރައްގީކުރުމުގެ އަމަލީ މަސައްކަތްޕުޅު ފެއްޓެވީ ރައީސް ޑރ. މުހައްމަދު މުއިއްޒުކަމަށް އިގްތިސާދީ ތަރައްގީއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ވަޒީރު ސައީދު ސޯޝަލް މީޑީއާގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ވިޔަފާރިއާއި އިގްތިސާދީ ތަރައްގީއާއި އެންމެ ބޮޑަށް ގުޅިފައިވާ އެއް މަޝްރޫއަކީ، މާލޭ ވިޔަފާރި ބަނދަރުގެ ހާލަތު ބަދަލުކޮށް، ޒަމާނީކޮށް، އަދުގެ އިގްތިސާދީ ހަގީގަތްތަކާއި ފައިހަމަކުރުން ކަމަށެވެ. އެގޮތުން މީގެ ކުރިން އެތައް ސަރުކާރަކުން އެވާހަކަ ދެއްކިނަމަވެސް ދިގު މުއްދަތެއް ފާއިތުވީއިރުވެސް ރާއްޖޭގެ މައި ވިޔަފާރި ބަނދަރަށް މާ ބޮޑު ބަދަލެއް އައިސްފައިނުވާ ކަމަށާއި ފެނިފައި ހުރީ ކުދިކުދި ކުރިއެރުންތައް ކަމަށް ސައީދު ވިދާޅުވިއެވެ. ނަމަވެސް، އެކަން ހަގީގަތަކަށް ހައްދަވަނީ އަދުގެ ރައީސް ޑރ. މުއިއްޒުކަމަށް ވަޒީރު ސައީދު ވިދާޅުވިއެވެ.
އެގޮތުން، ދުނިޔޭގެ އިގްތިސާދީ ގޮންޖެހުންތަކުގެ ތެރޭގައި ގައުމު ކުރިއެރުވުމަށް ހިކުމަތްތެރިކަމާއެކު ރައީސް ޑރ. މުއިއްޒު މަސައްކަތް ކުރައްވަމުން ގެންދަވާކަމަށް ވަޒީރު ސައީދު ވިދާޅުވިއެވެ. އަދި އެ ހާލަތު ނިމުމަކަށް ގެންނެވުމަށް ރައީސް ޑރ. މުއިއްޒު އިސްނަންގަވައި އަމަލީ މަސައްކަތްޕުޅު ފައްޓަވާފައިވާކަން ފާހަގަކުރައްވާ ސައީދު ވިދާޅުވީ، ދުނިޔޭގެ މަސްރަޙަށް އަންނަ ބަދަލުތަކާއި އިގްތިސާދީ ގޮންޖެހުންތަކުގެ ތެރޭގައި ގައުމު ނިކަމެތިވެގެން ދާން ދޫކޮށްލައިގެން ތިބެވެން ނެތްކަން ރައީސް ސާބިތުކޮށްދެއްވަމުން ގެންދަވާ ކަމަށެވެ. އަދި ހުރަސްތަކާ ކުރިމަތިލައްވައި އިޙްލާސްތެރި މަސައްކަތްޕުޅުން ގައުމު އެ ހާލަތުން މިންޖުކޮށްދެއްވުމަކީ ވެރިއެއްގެ ޒިންމާކަން ރައީސް ކަށަވަރުކޮށްދެއްވަމުން ގެންދަވާ ކަމަށް ވިދާޅުވިއެވެ.
ވިޔަފާރި ބަނދަރު ތަރައްގީކުރުމުގެ މަޝްރޫއުގެ ދަށުން ވިޔަފާރި ބަނދަރުގެ 80 އިންސައްތަ މަސައްކަތް ތިލަފުއްޓަށް ބަދަލުކުރުމަށް ވަނީ ނިންމާފައެވެ. ބާކީ ހުރި މަސައްކަތްތައް ކުރިއަށްދާނީ މާލޭ އިންޑަސްޓްރިއަލް ވިލެޖުގައެވެ. އޭގެ ސަބަބުން މާލޭގެ ތޮއްޖެހުން ކުޑަވެ، މުދާ އުފުލުމާއި ބޭލުމުގެ ކަންކަން މިހާރަށްވުރެ ހަރުދަނާވެގެންދާނެކަމަށް ސަރުކާރުން ބުނެއެވެ.
ތިލަފުއްޓާއި މާލޭ އިންޑަސްޓްރިއަލް ވިލެޖުގައި ޕްރައިވެޓް ސެކްޓަރަށް ނުވަތަ އަމިއްލަ ވިޔަފާރިތަކަށް ވިޔަފާރިކުރުމުގެ ފުރުސަތުތަކާއި އެކި ކަހަލަ އިންސެންޓިވްތައް ދިނުމަށް ސަރުކާރުން ވަނީ ރާވާފައެވެ.
މީގެ އިތުރުން، މާލޭގެ މަގު ހެދުމުގެ ބޮޑު މަޝްރޫއާއެކު، ލޯންޗު ފަހަރަށް ހާއްސަ ފިންގަރ ޖެޓީތައް ހެދުމަށް ވެސް ވަނީ ނިންމާފައެވެ. އެ ބަދަލާއެކު މާލެއަށް ލަފާފުރުމުގެ ކަންކަމުގައި ދިމާވާ ދަތިތަކަށް ދާއިމީ ހައްލެއް ލިބި، އާންމު ދަތުރުފަތުރަށް ބޮޑު ލުޔެއް ލިބިގެންދާނެކަމަށް ސަރުކާރުން ބުނެއެވެ.
