ދިވެހިރާއްޖެއަށް ކުރިމަތިވެފައިވާ ޑޮލަރުގެ ތާށިކަމަށް އެދެވޭ ހައްލެއް ނުލިބި، ޑޮލަރުގެ އަގު އަދިވެސް ދަނީ މައްޗަށް ކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ޑޮލަރު ލިބުމުގައި ހުރި ދަތިތަކުގެ ސަބަބުން އަމިއްލަ ވިޔަފާރިތަކަށް ޓެލެގްރާފިކް ޓްރާންސްފަރ (ޓީޓީ) ހެދުމަށް ހުރަސްއެޅި، ރާއްޖެއަށް މުދާ އެތެރެކުރުމުގައި ބޮޑެތި ގޮންޖެހުންތަކާ ކުރިމަތިލާން ޖެހިފައިވާ ކަމަށެވެ.
އޭގެ ސީދާ ނަތީޖާއެއްގެ ގޮތުން، ބާޒާރުގައި ތަކެތީގެ އަގުތައް އުފުލި، އޭގެ ހުރިހާ ބުރައެއް އުފުލަންޖެހިފައިވަނީ އާންމު ރައްޔިތުންނަށް ކަމަށް އެމަނިކުފާނު ފާހަގަކުރެއްވިއެވެ. މީގެ އިތުރުން، މި މަސް ނިމޭއިރު ޑޮލަރުގެ 40 އިންސައްތަ މާރުކުރުން މަޖުބޫރުކުރުމާއި، ބޭރުގެ ޓުއާ އޮޕަރޭޓަރުންގެ އަތުން ޖީއެސްޓީ ނެގުން ލާޒިމުކޮށްގެން ދައުލަތަށް 160 މިލިއަން ޑޮލަރު ލިބޭނެ ކަމަށް ސަރުކާރުން އަންދާޒާކުރި ނަމަވެސް، އެއިން އެއްވެސް އަމާޒަކަށް ވާސިލުވެވިފައިނުވާކަމަށް ރައިސް ނަޝީދު ވިދާޅުވިއެވެ.
ނަމަވެސް، ރާއްޖެއަށް ދިމާވެފައިވާ ޑޮލަރުގެ ތާށިކަން ހައްލުކޮށް، ބޭރު ފައިސާގެ ރިޒާވް ހަރުދަނާ ކުރުމަށްޓަކައި ސަރުކާރުން މިހާރުވެސް ދަނީ މުހިންމު ފިޔަވަޅުތަކެއް އަޅަމުންނެވެ. އެގޮތުން، ރާއްޖެއަށް ވަންނަ ބޭރު ފައިސާ ބޭންކިންގ ނިޒާމުގެ ތެރެއަށް ވެއްދުމަށްޓަކައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވާއިދުތަކަށް ބަދަލު ގެނައުމާއި، ފަތުރުވެރިކަމުގެ ދާއިރާއިން ލިބޭ ޑޮލަރު ރާއްޖޭގެ ބޭންކުތައް މެދުވެރިކޮށް މާރުކުރުން ހަރުދަނާ ކުރުމުގެ މަސައްކަތް ސަރުކާރުން ދަނީ ކުރަމުންނެވެ.
ބޭރުގެ މާލީ އިދާރާތަކާ ގުޅިގެން ކަރަންސީ ސްވަޕް ފެސިލިޓީތައް ހޯދުމާއި، އިމްޕޯޓް ޚަރަދުތައް ކުޑަކުރުމަށްޓަކައި ރާއްޖެއިން ބޭރުން މުދާ އެތެރެކުރުމުގައި އެ ގައުމެއްގެ ފައިސާއިން މުއާމަލާތު ކުރެވޭނެ އިންތިޒާމުތައް ހަމަޖެއްސުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.
