ރައީސް ޑރ. މުހައްމަދު މުއިއްޒުގެ މައްޗަށް ތުހުމަތުތަކެއްކޮށްފައިވާ އަދަދު ނޫހުގެ ”އައިޝާ“ ޑޮކިއުމެންޓްރީއާ ގުޅިގެން ގަޒްފުގެ ދައުވާ އުފުލާފައިވާ އައިޝަތު އީޝާ އަޝްރަފްގެ ޝަރީއަތުގެ ފުރަތަމަ އަޑުއެހުން އަންނަ ހޯމަ ދުވަހަށް ތާވަލުކޮށްފިއެވެ.
މި ސަރުކާރުގައި ރައީސް އޮފީހުގެ އިތުރުން ޖެންޑާ މިނިސްޓްރީ އާއި ހަޔާ އެޑިއުކޭޝަން މިނިސްޓްރީގައި ވެސް މަސައްކަތްކުރި އީޝާއަށް ކްރިމިނަލް ކޯޓުން ފޮނުވާފައިވާ ޗިޓުގައި އަންގާފައިވަނީ، ގަޒްފުގެ މައްސަލައިގެ އިބްތިދާއީ އަޑުއެހުމެއް އަންނަ ހޯމަ ދުވަހުގެ ހެނދުނު 10:00 އަށް ކްރިމިނަލް ކޯޓަށް ހާޒިރުވުމަށެވެ.
އޭނާގެ މައްސަލަ ކުރިއަށް ގެންދަން ހަމަޖެހިފައިވަނީ ގާޒީ އިބްރާހިމް ޒިހުނީ ހިންގަވާ ކްރިމިނަލް ކޯޓުގެ ބީ1 ސެކްޝަނުންނެވެ.
އައިޝާ ޑޮކިއުމެންޓްރީގެ މައްސަލައިގައި މީގެ ކުރިން އީޝާގެ ބަޔާން ނެގުމަށް ފުލުހަށް ހާޒިރުކޮށްފައިވާއިރު، އޭނާއަށް ރާއްޖެއިން ބޭރަށް ނުފުރޭ ގޮތަށް ޕާސްޕޯޓު ވެސް ވަނީ ހިފަހައްޓައިފައެވެ.
ޑޮކިއުމެންޓްރީގެ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ވެސް ގަޒްފުގެ ކުށުގެ ދައުވާ އުފުލާފައިވާއިރު، އެ ދެ މީހުންގެ ޕާސްޕޯޓު ވެސް ވަނީ ހިފަހައްޓައިފައެވެ.
އެ މައްސަލައާ ގުޅޭގޮތުން ރައީސް ޑރ. މުއިއްޒު ބޭއްވެވި ނޫސްވެރިންގެ ބައްދަލުވުމެއްގައި އަދަދު ނޫހުން ސުވާލުކުރުމުން، ކްރިމިނަލް ކޯޓުން ނެރެފައިވާ ގެގް އޯޑަރަކާ ހިލާފުވިކަމަށް ނިންމައި އެ ނޫހުގެ ދެ ނޫސްވެރިޔަކު މީގެ ކުރިން ޖަލަށް ލާފައިވެއެވެ. އަދި އެފަހުން ރައީސް އޮފީހުގެ ނޫސްވެރިންގެ ބައްދަލުވުންތަކަށް ވަނުން އެ ނޫހުގެ ނޫސްވެރިންނަށް ވަނީ މަނާކޮށްފައެވެ.
