ތަމްރީނު ކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރުވެސް ހާސިލްކުރެވިފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ސަރުކާރުން ފެށި ”ދިވެހި ވަތަނީ ހިދުމަތް“ (ނޭޝަނަލް ސަރވިސް) ޕްރޮގްރާމަށް އަހަރެއް ފުރުމުގެ މުނާސަބަތުގައި، އެކްސްގައި ކުރެއްވި ޕޯސްޓެއްގައި ރައީސް ވަނީ ފާއިތުވެދިޔަ އެއް އަހަރު ވެގެންދިޔައީ، ޒުވާނުންނަށްޓަކައި، ދިވެހި ވަތަނީ ހިދުމަތުގެ ތެރެއިން ކާމިޔާބު އަދި އުފެއްދުންތެރި މަސައްކަތްތަކެއް ކޮށްދެވުނު 1 އަހަރުކަން ފާހަގަކުރައްވާ، ނޭޝަނަލް ސަރވިސް އިނީޝަލް ޓްރޭނިންގގެ ތެރެއިން 1028 ދިވެހި ޒުވާނުން ތަމްރީނު ކުރެވުނުއިރު، ނޭޝަނަލް ސަރވިސް ސްކިލް ޓްރޭނިންގ ޕްރޮގްރާމުން 136 ޒުވާނުން ވަނީ ތަމްރީނު ކުރެވިފައިވާކަން ހާމަކުރައްވާފައެވެ.
މީގެ އިތުރުން، އެ ހިދުމަތުގެ މުސްތަގުބަލު އުޖާލާކަން ފާހަގަކުރައްވައި ރައީސް ވިދާޅުވީ، ކުރިއަށް އޮތް ތަނުގައި ފަންނީ އިތުރު ދާއިރާތަކާއި އިންޓަރންޝިޕްގެ ފުރުސަތުތައް އެ ޕްރޮގްރާމްގެ ތެރެއިން ތައާރަފުކުރެވިގެންދާނެ ކަމަށެވެ. ހަމައެއާއެކު، ތަމްރީނު ހާސިލުކުރާ ޒުވާނުންނަށް ވަޒީފާގެ ބާޒާރުން ފުރުސަތުތައް ހޯދައިދިނުމުގައި ”ނޭޝަނަލް ކެރިއަރ ސަރވިސް“ގެ ދައުރު އިތުރަށް ފުޅާކުރުމަކީ ސަރުކާރުގެ މުހިންމު ލަނޑުދަނޑިއެއް ކަމުގައިވެސް އެމަނިކުފާނު ބަޔާންކުރެއްވިއެވެ.
ހަމައެއާއެކު، ގައުމުގެ ތަރައްގީއާއި ކުރިއެރުމުގެ އެންމެ މުހިންމު ބާރަކީ ހުނަރުވެރި، ގާބިލު އަދި ގައުމު ދެކެ ލޯބިވާ ޒުވާން ޖީލެއް ކަމުގައި ފާހަގަކުރައްވައި، ކޮންމެ ދިވެހި ޒުވާނަކީވެސް ފަހުރުވެރިކަމާއެކު ގައުމީ ހިދުމަތުގައި ދެމިހުންނާނެ، ޒިންމާދާރު ރައްޔިތަކަށް ހެދުމަށް ސަރުކާރުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާނެކަމުގެ ޔަގީންކަން އެމަނިކުފާނު ދެއްވިއެވެ.
އެމަނިކުފާނުގެ މެސެޖު ނިންމަވާލައްވާފައިވަނީ ދިވެހި ޒުވާނުންގެ ކުރިމަގު އުޖާލާކޮށް، ގައުމީ ހިދުމަތަށް އަހުލުވެރި ބަޔަކަށް ހެދުމުގެ މަގްސަދުގައި އެ ތަމްރީނުތައް ކާމިޔާބުކަމާއެކު ފުރިހަމަކުރި ހުރިހާ ޒުވާނުންނަށާއި އެ ފަރާތްތަކުގެ އާއިލާތަކަށް ތަހުނިޔާ ވިދާޅުވަމުންނެވެ.
