މޯލްޑިވްސް ޒަކާތު ހައުސްއިން ބާއްވާ ”އިންޓަރނޭޝަނަލް ޒަކާތު ކޮންފަރެންސް މޯލްޑިވްސް 2026″ ގައި ބައިވެރިވުމަށް ރަޖިސްޓަރީވުމުގެ ފުރުސަތު ހުޅުވާލައިފިއެވެ.
މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް ބާއްވާ ”އިންޓަރނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026″ ގައި ބައިވެރިވުމަށް، މިހާރު ރަޖިސްޓްރީ ކުރެވޭނެ ކަމަށް ޒަކާތު ހައުސްއިން މައުލޫމާތުދެއެވެ.
28 އޮކްޓޫބަރު 2026 ގައި ބޭއްވުމަށް ހަމަޖެހިފައިވާ މި ކޮންފަރެންސަކީ، މާލީ އަދި އިޖުތިމާޢީ ނާޒުކު ޙާލަތްތަކާ ގުޅިގެން ކުރިމަތިވާ ގޮންޖެހުންތަކާއި، ވިލުންވެރި މުޖުތަމަޢުތަކެއް ބިނާކުރުމުގައި ޒަކާތުގެ ދައުރާ ގުޅޭގޮތުން މަޝްވަރާކުރުމަށްޓަކައި ޢިލްމުވެރިންނާއި، އިޤްތިޞާދީ މާހިރުންނާއި، ޒަކާތުގެ ކަންކަން ބަލަހައްޓާ ފަރާތްތަކާއި، ސިޔާސަތު ކަނޑައަޅާ ފަރާތްތަކާއި، މާލީ އިދާރާތަކާއި، މަދަނީ ޖަމްޢިއްޔާތަކުގެ މަންދޫބުންގެ އިތުރުން ކަމާގުޅުންހުރި އެހެނިހެން ފަރާތްތައް އެއްތަނަކުން ބައްދަލުވާނެ ކޮންފަރެންސެކެވެ.
މި އަހަރުގެ ކޮންފަރެންސްގެ ޝިޢާރަކީ: ”ރެޒިލިއަންޓް ފައުންޑޭޝަންސް: ޑިސައިފަރިންގ ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް“އެވެ.
މި ކޮންފަރެންސްގައި ކީނޯޓް އެޑްރެސްތަކާއި، އެކި ދާއިރާތަކުގެ ތަޖުރިބާކާރުން ބައިވެރިވާ ޕެނަލް ޑިސްކަޝަންތައް ކުރިއަށްދާނެއެވެ. މިގޮތުން މަޝްވަރާކުރެވޭނެ މައުޟޫޢުތަކުގެ ތެރޭގައި ގޭބިސީތަކުގެ ނާޒުކު ޙާލަތަށް އަންނަމުންދާ ބަދަލުތަކާއި، މާލީ ދަތިކަމުގެ ސަބަބުން ކުރާ އިޤްތިޞާދީ އަސަރުތަކާއި، އެކި ދާއިރާތަކުގެ މެދުގައި މަޢުލޫމާތު ޙިއްޞާކުރުމާއި، ގުޅިފައިވާ ރައްކާތެރިކަމުގެ ނިޒާމުތަކުގެ އިތުރުން ނާޒުކު ޙާލަތްތަކުގައިވާ ޢާއިލާތަކަކީ އަމިއްލަ ފައިމައްޗަށް ތެދުވެވިފައިވާ މާލީ މިނިވަންކަން ލިބިފައިވާ ބަޔަކަށް ހެދުމަށް ބޭރު ޤައުމުތަކުގައި ބޭނުންކުރާ މޮޑެލްތައްފަދަ މައުޟޫޢުތައް ހިމެނެއެވެ.
އިންޒެކް 2026 ގައި ބައިވެރިވުމަށް ޝައުޤުވެރިވާ ފަރާތްތަކަށް މިހާރު ރަސްމީ ރަޖިސްޓްރޭޝަން ފޯމު މެދުވެރިކޮށް ރަޖިސްޓަރީ ކުރެވޭނެކަމަށް ޒަކާތު ހައުސްއިން މައުލޫމާތުދެއެވެ.
