މާދަމާ ފެށުމަށް ހަމަޖެހިފައިވާ އެމްޑީޕީގެ އިންވެސްޓްމެންޓް ފޯރަމްގެ ތެރެއިން ކައުންސިލުތަކުގެ އަޑު ސަރުކާރަށް އިއްވާނެކަމަށް އެމްޑީޕީގެ ޑެޕިއުޓީ ޗެއާޕާސަން މުޙައްމަދު ޝިފާޒު ވިދާޅުވެއްޖެއެވެ.
ޝިފާޒު މިހެން ވިދާޅުވީ، އެމްޑީޕީގެ ކޮންގްރެސް ހުޅުވުމަށް މިރޭ ބާއްވާ ޖަލްސާގެ ތެރެއިން ”ސަންގާއި“ ވާހަކަދައްކަވަމުންނެވެ.
ޝިފާޒު ވިދާޅުވީ، މި ސަރުކާރު އެއްވެސް ވަރަކަށް ލާމަރުކަޒީ ނިޒާމަށް އަހުލުވެރިއެއް ނޫންކަމަށާއި ސަރުކާރުން ކައުންސިލުތަކާއި ގުޅިގެން މަސައްކަތް ކުރަން ބޭނުން ނުވާކަމަށެވެ.
”ލާމަރުކަޒީ ނިޒާމަކަށް މި ސަރުކާރު އެއްވެސް ވަރަކަށް އަހުލުވެރިއެއް ނޫން، އެއަކާއި ރައްޓެއްސެއްނޫން، އެކަމަކު އަޅުގަނޑުމެންނަށް އެއީ ވަރަށް މުހިންމު ކަމަކަށް ދެކިގެން ޤާނޫނު އަސާސީގައި އެ ވާހަކަ ލިޔެފަ އެއޮތީ،“ ޝިފާޒް
ޝިފާޒު ވިދާޅުވީ، ކައުންސިލުތަކުން ތައްޔާރުކޮށް ސަރުކާރަށް ހުށައަޅާ ޕްރޮޖެކްޓުތަކުގެ ޕޮރޮޕޯސަލްތައް 3.6 މިލިއަން ޑޮލަރަށް އަރާކަމަށެވެ. މީގެންވެސް ހާމަވެގެންދަނީ ކައުންސިލުތަކުގެ ޝައުގުވެރިކަން ހުރި މިންވަރުކަމަށް އޭނާ ވިދާޅުވިއެވެ.
ސަރުކާރުން ކައުންސިލުތަކާއި އަޅާނުލިކަމުގައި ވީނަމަވެސް އެމްޑީޕީގެ މެޖޯރިޓީއެއް ކައުންސިލުތަކުގައި އޮތަސް ނެތަސް އެ ޕާޓިއާއި ގުޅިގެން މަސައްކަތް ކުރަން އޮތް ކޮންމެ ކައުންސިލަކަށް އެ ފުރުސަތު ފަހިކޮށްދޭނެކަމަށް އޭނާ ވިދާޅުވިއެވެ.
ޝިފާޒު ވިދާޅުވީ، މާދަމާ ފެށުމަށް ހަމަޖެހިފައިވާ އިންވެސްޓްމަންޓު ފޯރަމްގެ ތެރެއިން ކައުންސިލުތަކުން ޕޮރޮޖެކްޓްތައް ނޫނީ މަޝްރޫއުތައް ފެށުމަށް ތައްޔާރުވެފައިވާ މިންވަރު ހާމަވެގެންދާނެ ކަމަށެވެ.
ޝިފާޒުގެ ވާހަކަ ކުރިއަށް ގެންދަވަމުން އޭނާ ވަނީ އެމްޑީޕީން ކޮންގްރެސް ބޭއްވިގެންދާއިރު ޖާގައިގެ ދަތިކަން ފިޔަވާ އިތުރު އެއްވެސް ކަމެއް ނެތްކަން ފާހަގަކުރައްވާފައެވެ. އަދި ޖާގައިގެ ދަތިކަން އޮތަސް ޕާޓީގެ މެމްބަރުންނާއި ސަޕޯޓަރުން ބޭނުންވާ މަޤްސަދު ހާސިލުކުރުމަށް ޕާޓިން ކުރަންޖެހޭ އެންމެހާ ކަންކަން ކުރާނެކަމަށް އޭނާ ވިދާޅުވިއެވެ.
”ޖާގައިގެ ދަތިކަން ފިޔަވާ އިތުރު އެއްވެސް ކަމެއް ދިމައެއްނުވޭ. އަދި ޖާގައިގެ ދަތިކަން އޮތަސް ޕާޓީގެ މެމްބަރުންނާއި ސަޕޯޓަރުން ބޭނުންވާ މަޤްސަދު ހާސިލުކުރުމަށް ޕާޓިން ކުރަންޖެހޭ ހުރިހާ ކަމެއް ކުރަމުންދާނެ،“ ޝިފާޒު
ފާހަގަކޮށްލެވޭ ގޮތުގައި އެމްޑީޕީން ކޮންގްރެސް ބާއްވަން މާލެއިން އެއްވެސް ތަނެއް ސަރުކާރުން ހަމަޖައްސައިދީފައި ނުވާތީ އެކަމާއި ގުޅިގެން އެ ޕާޓީން ވަނީ ކަންބޮޑުވުން ފާޅުކޮށްފައެވެ. އެ ޕާޓީން ތިން ދުވަހުގެ މި ކޮންގްރެސް ކުރިއަށް ގެންދަން ރާވާފައިވަނީ މާލެ ސިޓީ ހޯލްގައެވެ.
އެމްޑީޕީގެ ކޮންގްރެސް މިރޭ ހުޅުވުމަށްފަހު މާދަމާ މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އިންވެސްޓްމެންޓް ފޯރަމް ފަށަން ހަމަޖެހިފައިވަނީ މާދަމާ މެންދުރު ފަހު 14:00 ގައެވެ. ކައުންސިލްތަކުން ހުށަހަޅާ މަޝްރޫއުތަކަށް އިންވެސްޓަރުން ހޯދަން ބާއްވާ އެ ފޯރަމްގައި ވެސް ރައީސް ނަޝީދު ވާހަކަ ދައްކަވާނެއެވެ.
ކޮންގްރެސްގެ މައިގަނޑު މަސައްކަތްތައް ފަށަން ހަމަޖެހިފައިވަނީ ހޮނިހިރު ދުވަހުގެ ހެނދުނުއެވެ. އެ ދުވަހު ޕާޓީގެ އަސާސީ ގަވައިދަށް ހުށަހަޅާ އިސްލާހުތަކަށް ބަހުސްކޮށް، ވޯޓަށް އަހާނެއެވެ.
