އަންހެނުންގެ ވިސްނުމާއި ފިކުރު ގާނޫނު ހެދުމުގެ ތެރެއަށް ވަންނަންޖެހޭ ކަމަށާއި މަޖިލީހުގައި ވިއްސަކަށް އަންހެނުން ތިބިނަމަ ގާނޫނު ބަދަލުކޮށްގެން ވެސް މަގުމަތީގައި ހިނގާބިނގާވެ ނޫޅެވޭ މައްސަލަ ހައްލުކުރާނެ ކަމަށް އެމްޑީޕީގެ ޗެެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
އެމްޑީޕީގެ ކޮންގްރެސްގައި، މަޖިލީހުން އަންހެނުންނަށް ގޮނޑި ހާއްސަކުރުމާ ގުޅޭގޮތުން ވާހަކަ ދައްކަވަމުން ފައްޔާޒު ވިދާޅުވީ، ފިރިހެނުންނާއި އެއް ހަމައެއްގައި ވާދަކޮށްގެން އަންހެނުންނަށް މަޖިލީހަށް އިންތިހާބުވާ ގޮތަށް އޮތުމަކީ އެންމެ ރަނގަޅު ގޮތް ކަމަށާއި އެހެންނަމަވެސް، އެގޮތަށް އަންހެނުންނަށް ފުރުސަތު ނުދެވޭނެ ކަމަށް ފައްޔާޒު ވިދާޅުވިއެވެ. މަޖިލީހުގައި 15 އަހަރު ވަންދެން އެންމެ ތިން އަންހެނުން ތިބުމަކީ އެކަމުގެ ހެއްކެއް ކަމަށް އޭނާ ވިދާޅުވިއެވެ.
ދަރީން ގޮވައިގެން މަގުމަތީ ހިނގައި އުޅެނީ އަންހެނުންކަން ފާހަގަކުރައްވައި، ފައްޔާޒް ވިދާޅުވީ ރައްޔިތުންގެ މަޖިލީހުގައި ވިއްސަކަށް އަންހެނުން މިއަދު ތިބި ނަމަ މާލޭގައި ހިނގާބިނގާވެ އުޅެވޭނެ ކަމަށް ވެސް ފައްޔާޒު ވިދާޅުވިއެވެ.
”ރައްޔިތުންގެ މަޖިލީހުގައި ވިއްސަކަށް އަންހެނުން މިއަދު ތިބި ނަމަ މާލޭގައި ހިނގާބިނގާވެ އުޅެވޭނެ އަޅުގަނޑުމެންނަށް. އެއީ އެ މީހުން ދަރީން ގޮވައިގެން މަގުމަތީގައި ހިނގަނީ. އަޅުގަނޑުމެން ދަނީ ސައިކަލުގައި އެހެންވީމަ އަޅުގަނޑުމެންނަށް ހެޔޮ މަގުމަތީ ނުހިނގުނަސް،“
އަންހެނުން މަޖިލީހުގައި ތިބި ނަމަ ގާނޫނު ބަދަލުކޮށްގެން ވިޔަސް އެކަން ކުރާނެ ކަމަށް ފައްޔާޒު ވިދާޅުވިއެވެ. ގައުމުގެ ދެބައިކުޅަ އެއްބަޔަކީ އަންހެނުން ކަމަށްވާއިރު، އަންހެނުންގެ ވިސްނުން ގާނޫނު ހެދުމުގެ ތެރެއަށް ވަންނަންޖެހޭ ކަމަށް ވެސް ވިދާޅުވިއެވެ.
މިހާރު ހާލަތު އޮތް ހިސާބުން އަންހެނުން އުފުލާލަން އަންހެނުންނަށް ދޭންޖެހެނީ އެންމެ ވިއްސަކަށް ސީޓު ކަމަށް އޭނާ ވިދާޅުވިއެވެ.
މެމްބަރަކު ނެތް ރަށަކުން ގައުމީ މަޖިލީހަށް މީހަކު ގެންނަން އެ ހަމަހަމަކަން ބޭނުންވާއިރު، އަދި އާބާދީގެ ދެބައިކުޅަ އެއްބަޔަކީ އަންހެނުންނަށް ވާއިރު އެ މީހުންނަށް ކުޑަ އެއްޗެއް ދޭން އެއްބަސް ނުވަންޏާ ދައްކާނެ ވާހަކައެއް ނެތް ކަމަށް ފައްޔާޒް ވިދާޅުވިއެވެ.
