ކަރަންޓުގެ ހިދުމަތާ ގުޅިގެން ރައްޔިތުންނަށް ދިމާވެފައިވާ ދަތިތަކަށް ދާއިމީ އަދި ލުއިފަސޭހަ ހައްލެއް ހޯދައިދިނުމުގެ ގޮތުން، ގޭގޭގެ ފުރާޅުގައި ސޯލާ ހަރުކޮށްގެން ކަރަންޓު އުފައްދާ ”ގޭދޮށު އިންޖީނުގެ“ ނުވަތަ ”ނޭބަރހުޑް ޕަވަހައުސް“ މަޝްރޫއުއެއް އެ ސިޓީގައި ހިންގުމަށް ކުޅުދުއްފުށި ސިޓީގެ ފަރާތުން އެމްޑީޕީގެ ކޮންގްރެސް އިންވެސްޓްމަންޓް ފޯރަމްއަށް ހުށަހަޅައިފި އެވެ.
ތިން ދުވަހަށް ބަހާލައިގެން ކުރިޔަށް ގެންދާ އެމްޑީޕީގެ ކޮންގްރެސްގެ ތެރެއިން މިއަދުގެ ސެޝަންއެއްގެ ގޮތުގައި ކުރިޔަށް ގެންގޮސްފައި ވަނީ ”ރަށްވެހި ތަރައްގީ – އިންވެސްޓްމަންޓް ފޯރަމް“ އެވެ. ކައުންސިލްތަކުން ހިންގުމަށް ގަސްދު ކުރާ ޕްރޮޖެކްޓުތަކުގެ ތަފްސީލުތައް ޕްރެޒެންޓޭޝަންއެއްގެ ގޮތުގައި ވަނީ ހުށަހަޅާފަ އެވެ.
މި ތަފްސީލުތައް ހުށަހަޅައިދެއްވަމުން ކުޅުދުއްފުށި ސިޓީގެ މޭޔަރު އާތިފް ވިދާޅުވީ، ލާމަރުކަޒީ ގާނޫނު ބަޔާން ކުރާ ގޮތުގެ މަތީން ކައުންސިލާއި، މި ހިދުމަތް މިހާރު ދެމުން ގެންދާ ފެނަކައާއި ދެމެދު އެއްބަސްވުމެއް އޮންނަން ޖެހޭކަމަށެވެ. އެހެން ނަމަވެސް މި ސަރުކާރުގައި ފެނަކައިން އެކަމަށް އިންކާރު ކުރަމުން ގެންދާއިރު، މި މައްސަލަ ސިވިލް ކޯޓަށް ހުށަހެޅުމުން ވެސް މައްސަލަ ނިމުނީ ކައުންސިލާއި ދެކޮޅަށްކަން ފާހަގަކުރެއްވި އެވެ.
އެހެންކަމުން މިކަމަށް ހައްލެއް ހޯދުމަށް ކޮންމެހެން ފިޔަވަޅުތައް އަޅަންޖެހިފައިވާކަމަށް އާތިފް ވިދާޅުވި އެވެ.
އާތިފް ވިދާޅުވި ގޮތުގައި ޕްރޮޖެކްޓް ފެށޭ ދުވަހުން ފެށިގެން ރައްޔިތުންގެ ކަރަންޓު ބިލުން 50 ކުޑަވެގެންދާނެއެވެ. އަދި މަޝްރޫއު ފަށާތާ 5 އަހަރު ފަހުން ރައްޔިތުންނަށް ހިލޭ ކަރަންޓު ފޯރުކޮށްދެވޭނެއެވެ. ނަމަވެސް ނެގޭނީ ހަމައެކަނި ކުޑަ މެއިންޓެނަންސް ފީއެއްކަމަށް އާތިފް ވަނީ ވިދާޅުވެފަ އެވެ.
މި މަޝްރޫޢަށް ބޭނުންވާ މާކެޓްގެ ގާބިލުކަމަށް ބަލާއިރު، 3000 އަށްވުރެ ގިނަ ގޭބީސީ ހުރި ކުޅުދުއްފުށީގައި އެޕާޓްމެންޓްތައް އުނިކުރުމަށްފަހުވެސް 2500 އަށްވުރެ ގިނަ ގޭބީސީގެ ފުރާޅާއި، 400 އަށްވުރެ ގިނަ ވިޔަފާރިތަކުގެ ފުރާޅު މި މަޝްރޫއަށް ލިބޭނެކަމަށް އާތިފް ވަނީ އަންދާޒާ ކުރައްވާފަ އެވެ.
މީގެއިތުރުން، އިންވެސްޓަރުންނަށް ފަސޭހަކޮށްދިނުމުގެ ގޮތުން ފުރާޅުތަކުގެ ސާވޭ ތަފްސީލާއި، ފުރާޅުތަކުގެ ހާލަތު އަދި ގޭބީސީތަކުގައި ކަރަންޓު ބޭނުންކުރާ މިންވަރުގެ ތަފްސީލު ފޯރުކޮށްދޭނެކަމަށް މޭޔަރު ވިދާޅުވިއެވެ.
މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ކޮންޓްރެކްޓަރ ފައިނޭންސް އުސޫލުން ކަމަށާއި، ފަސް އަހަރު ދުވަހުގެ ތެރޭގައި އިންވެސްޓަރުންނަށް އެކަށީގެންވާ ފައިދާއެއް ނުވަތަ ރިޓާން އޮން އިންވެސްޓްމަންޓް ލިބިގެންދާނެކަމަށް ވެސް އޭނާ ފާހަގަކުރެއްވިއެވެ. އަދި ވިދާޅުވީ ފަސް އަހަރަށްފަހު އިންޖީނުގެތަކުގެ މަރާމާތާއި ބެލެހެއްޓުމުގެ އެންމެހައި މަސައްކަތްތަކާ ހަވާލުވާނީ ކައުންސިލްގެ ލޯކަލް އޮތޯރިޓީ ކުންފުނިން ކަމަށެވެ.
