.އައްޑޫ ސިޓީގެ އިގްތިސާދީ ދުވެލި އަވަސްކުރުމަށާއި، ފަތުރުވެރިކަމާއި ތިމާވެށީގެ ދާއިރާއިން އިންވެސްޓްމަންޓްތައް އިތުރުކުރުމުގެ ގޮތުން 120 އާއި 158 މިލިއަން ދިވެހި ރުފިޔާއާ ދެމެދުގެ އަގުހުރި މުހިންމު ހަތް މަޝްރޫއެއް ހިންގުމަށް އިންވެސްޓަރުންނަށް ހުޅުވާލައި، އެ މަޝްރޫއުތަކަށް ސިޓީ ކައުންސިލުން ހިލޭ ބިން ދޫކުރަން ނިންމައިފިއެވެ.
ތިން ދުވަހަށް ބަހާލައިގެން ކުރިޔަށް ގެންދާ އެމްޑީޕީގެ ކޮންގްރެސްގެ ތެރެއިން މިއަދުގެ ސެޝަންއެއްގެ ގޮތުގައި ކުރިޔަށް ގެންގޮސްފައި ވަނީ ”ރަށްވެހި ތަރައްގީ – އިންވެސްޓްމަންޓް ފޯރަމް“ އެވެ. ކައުންސިލްތަކުން ހިންގުމަށް ގަސްދު ކުރާ ޕްރޮޖެކްޓުތަކުގެ ތަފްސީލުތައް ޕްރެޒެންޓޭޝަންއެއްގެ ގޮތުގައި ވަނީ ހުށަހަޅާފަ އެވެ.
މި ފޯރަމްއަށް ހުށަހަޅައިދިން ޕްރެޒެންޓޭޝަންގައި ނިޒާރު ވިދާޅުވީ، ކައުންސިލުން މިހާރު އިސްކަންދެނީ ވަގުތުން ފެށިދާނެ އަދި އެކަށީގެންވާ ކުޑަ ބަޖެޓަކުން ބޮޑު ނަފާއެއް ހޯދޭނެ ފަދަ މަޝްރޫއުތަކަކަށް ކަމަށެވެ. އަދި އައްޑޫގެ ތަރައްގިއަށްޓަކައި ޕްރައިވެޓް ސެކްޓަރާއެކު ގުޅިގެން މަސައްކަތްކުރަން ކައުންސިލް އޮތީ ފުރިހަމައަށް ތައްޔާރަށްކަމަށް ވިދާޅުވި އެވެ.
އައްޑޫގެ ތަރައްގީގެ ޕޮޓެންޝަލްއާ ގުޅޭގޮތުން ނިޒާރު ވިދާޅުވީ، ނިމިދިޔަ ސަރުކާރުގައިވެސް 25 މިލިއަން ޑޮލަރު ހަރަދުކޮށްގެން ގޭން އިންޓަނޭޝަނަލް އެއާޕޯޓް ތަރައްގީކުރުމުގެ މަސައްކަތް ކުރިއަށް ގެންގޮސްފައިވާ ކަމަށެވެ. އަދި ދުނިޔޭގެ އެންމެ ބޮޑެތި މަތިންދާބޯޓު ފަހަރަށް ޖެއްސޭ ފެންވަރުގެ 3،500 މީޓަރުގެ ދިގު ރަންވޭއެއް އޮތުމަކީ އައްޑޫއަށް ލިބޭ ބޮޑު ކުރިއެރުމެއްކަމަށް ފާހަގަކުރެއްވިއެވެ.
މީގެއިތުރުން، އައްޑޫގެ ގުޅިފައިވާ ރަށްތަކުގައި ގާތްގަނޑަކަށް 14 ކިލޯމީޓަރުގެ ބިން އެއްގަމު މަގުން ގުޅިފައި އޮތުމަކީ އައްޑޫއަށް ޒިޔާރަތްކުރާ ފަރާތްތަކަށާއި ވިޔަފާރިތަކަށް ލިބޭ ވަރަށް ބޮޑު ފަސޭހައެއްގެ ގޮތުގައި ފާހަގަކުރައްވައި ވިދާޅުވީ އަމާޒަކީ ރާއްޖޭގެ ދެކުނުގެ ފަތުރުވެރިކަމުގެ މައި ހަބަކަށް އައްޑޫ ސިޓީ ހެދުން ކަމަށާއި، މިހާރުވެސް 500 އާއި 700 އާ ދެމެދުގެ އަދަދަކަށް ޓޫރިސްޓް އެނދު އިތުރުކުރުމުގެ އަމަލީ މަސައްކަތްތައް ސިޓީގައި ހިނގަމުންދާ ކަމަށެވެ.
އެމްޑީޕީ ސަރުކާރުގައި އައްޑޫއަށް 230 ހެކްޓަރުގެ ބިން އިތުރުކޮށް، ކޮންޓްރެކްޓަރުން ސައިޓުގައި ތިއްބާ ކައުންސިލުން ވަގުތުން ލޭންޑް ޔޫސް ޕްލޭން އެކުލަވާލިކަމަށް ނިޒާރު ވިދާޅުވި އެވެ. ނަމަވެސް، ރައީސް ޑރ. މުހައްމަދު މުއިއްޒުގެ ސަރުކާރުން އެ ހުރިހާ ބިންތަކެއް ސަރުކާރުގެ ބޭނުމަށް ނަގާފައިވާތީ، ކައުންސިލަށް އެ ބިންތަކުގައި އެއްވެސް މަސައްކަތެއް ނުކުރެވި ހުއްޓިފައިވާކަމަށް ނިޒާރު ވިދާޅުވި އެވެ. އަދި އައްޑޫގެ ބިމާއި ތަންތަނުގެ އަސްލު މިލްކުވެރިޔަކީ ކައުންސިލް ކަމުގައި ވިޔަސް، ގާނޫނުތަކުގެ ތެރެއިން ލިބޭ ބާރުތައް ބޭނުންކޮށްގެން، ޔުނެސްކޯ ބަޔޮސްފިއަރ ރިޒާވެއްގެ ގޮތުގައި ހިމެނޭ ”އައްޑޫ ނޭޗާ ޕާކު“ ވެސް މިދިޔަ މަހު ސަރުކާރުން ކައުންސިލްގެ އަތުން އަތުލާފައިވާކަމަށް ނިޒާރު ވިދާޅުވިއެވެ. އެހެންނަމަވެސް، ކުރިއަށް އޮތް ތަނުގައި އެކަންކަން އަލުން ކައުންސިލަށް އިޔާދަކުރެވޭނެކަމަށް އުންމީދުކުރައްވާކަމަށް ނިޒާރު ވިދާޅުވިއެވެ.
އައްޑޫގައި ކުރިން ހުރި ކޮންވެންޝަން ސެންޓަރު ވީރާނާވެގެން ގޮސްފައިވާތީ، ކައުންސިލް އިމާރާތުގެ ބިމުގެ ތެރޭގައި މިހާރު ހުރި ސްޓްރަކްޗަރ ބަދަލުކޮށްގެން، 2،000 މީހުންގެ ޖާގައިގެ އާ ކޮންވެންޝަން ސެންޓަރެއް ތަރައްގީކުރުމަށް ކައުންސިލުން ވަނީ ހުށަހަޅާފައެވެ. މި މަސައްކަތަށް 15 އާއި 20 މިލިއަން ރުފިޔާއާ ދެމެދުގެ އަދަދެއް ހަރަދުވާނެކަމަށް ލަފާކުރެވޭއިރު، މި ސެންޓަރު ތަރައްގީކޮށް ހިންގާ ފަރާތަށް 50 އާއި 100 އާ ދެމެދުގެ ކޮޓަރީގެ ހޮޓަލެއް ނުވަތަ ގެސްޓްހައުސެއް އެޅުމަށް އައްޑޫ ސިޓީން ދިގު މުއްދަތަކަށް ހިލޭ ބިން ދޫކުރުމަށް ވަނީ ނިންމާފައެވެ.
މީގެއިތުރުން، އައްޑޫގެ ގާތްގަނޑަކަށް 14 ހެކްޓަރުގެ ހިމާޔަތްކުރެވިފައިވާ ވެށި ހިމެނޭ ނޭޗާ ޕާކުގައި ފަތުރުވެރިންނަށް ތިބެވޭނެ އީކޯ-ޓޫރިޒަމް ވަސީލަތްތައް ޤާއިމުކުރުމަށް 5 މިލިއަން ރުފިޔާގެ މަޝްރޫއެއް ވަނީ ރާވާފައެވެ. އަދި ފޭދޫ ދިގިރަށް ބީޗް ސަރަހައްދުގައި ފަތުރުވެރިންނަށް ދުވާލު ވަގުތު ހޭދަކޮށްލެވޭނެ ފަދަ ޕްރައިވެޓް ބީޗް ކްލަބެއް ތަރައްގީކުރުމަށް 2 އާއި 3 މިލިއަން ރުފިޔާގެ ފުރުސަތެއް އިންވެސްޓަރުންނަށް ވަނީ ހުޅުވާލާފައެވެ.
އައްޑޫގެ މުއްސަނދި ތާރީޚާއި ސަގާފަތް ދައްކުވައިދިނުމަށްޓަކައި ހާއްސަ މިއުޒިއަމް އެންޑް ކަލްޗަރަލް ހެރިޓޭޖް ސެންޓަރެއް 3 މިލިއަން ރުފިޔާގެ ބަޖެޓަކުން ހެދުމަށް ހުށަހަޅާފައިވާއިރު، މިކަމަށް ބޭނުންވާ ބިމާއި ތާރީހީ އިމާރާތްތައް ކައުންސިލުން ފޯރުކޮށްދޭނެކަމަށް ނިޒާރު ވިދާޅުވިއެވެ.
ނިޒާރު ވިދާޅުވި ގޮތުގައި އައްޑޫގައި މިހާރުވެސް 14 މެގަވޮޓުގެ ސޯލާ މަޝްރޫއުތަކާއި ދެކުނު އޭޝިއާ ސަރަހައްދުގައި ގާއިމުކުރެވޭ އެންމެ ބޮޑު ފްލޯޓިންގ ސޯލާ ޕްލެޓްފޯމްގެ މަސައްކަތް ހިނގަމުންދާއިރު، އަމާޒަކީ އައްޑޫއަކީ އެއްކޮށް ފެހި ހަކަތައަށް ބަރޯސާވާ ތަނަކަށް ހެދުމެވެ. އެގޮތުން ސިޓީގެ ގާތްގަނޑަކަށް 7،000 ގޭބިސީއަށް ބެޓެރި ސްޓޯރޭޖާއެކު ހޯމް ސޯލާ ނިޒާމު ޤާއިމުކުރުމަށް 80 މިލިއަން ރުފިޔާގެ މަޝްރޫއެއް ރޭވިފައިވާކަމަށް ވިދާޅުވި އެވެ.
މި ހުރިހާ މަޝްރޫއުތަކެއް ކާމިޔާބުކަމާއެކު ހިންގުމަށްޓަކައި، ކައުންސިލުން ފޯރުކޮށްދޭންޖެހޭ އެންމެހައި އިދާރީ، ގާނޫނީ އަދި ފަންނީ އެހީތެރިކަން ދިނުމަށް ކައުންސިލް އޮތީ ތައްޔާރަށްކަމަށް ނިޒާރު ވިދާޅުވި އެވެ. އަދި އައްޑޫގެ ތަރައްގީއަށްޓަކައި އިންވެސްޓަރުންނާއި ކަމާގުޅުންހުރި އެންމެހައި ފަރާތްތަކާއެކު އަތުގުޅާލައިގެން މަސައްކަތްކުރުމަށް ކައުންސިލުން އަބަދުވެސް މަރުހަބާ ކިޔާނެކަމަށް ނިޒާރު ވަނީ ވިދާޅުވެފަ އެވެ..
