ދިވެހިރާއްޖެއަކީ މޫސުމީ ބަދަލުތަކުގެ ނުރައްކާ އޮތް، ތިމާވެށީގެ ގޮތުން ނާޒުކު ގައުމަކަށް ވީތީ އެކަނި ބައިނަލްއަޤްވާމީ ފަރާތްތަކުން ފައިސާ ނުދޭނެކަމަށާއި، ބޭރުގެ މާލީ އެހީތެރިކަމާއި އިންވެސްޓްމަންޓްތައް ހޯދުމަށްޓަކައި ދެމެހެއްޓެނިވި ގޮތެއްގައި އާމްދަނީ ލިބޭނެ ފަދަ ”ބޭންކަބަލް“ މަޝްރޫއުތައް އެކުލަވާލަން ޖެހޭކަމަށް ކުރީގެ ޗީފް ފައިނޭންޝަލް ބަޖެޓް އެގްޒެކެޓިވް ސަރުވަޝް އާދަމް ވިދާޅުވެއްޖެއެވެ.
ތިން ދުވަހަށް ބަހާލައިގެން ކުރިޔަށް ގެންދާ އެމްޑީޕީގެ ކޮންގްރެސްގެ ތެރެއިން މިއަދުގެ ސެޝަންއެއްގެ ގޮތުގައި ކުރިޔަށް ގެންގޮސްފައި ވަނީ ”ރަށްވެހި ތަރައްގީ – އިންވެސްޓްމަންޓް ފޯރަމް“ އެވެ. ކައުންސިލްތަކުން ހިންގުމަށް ގަސްދު ކުރާ ޕްރޮޖެކްޓުތަކުގެ ތަފްސީލުތައް ޕްރެޒެންޓޭޝަންއެއްގެ ގޮތުގައި ވަނީ ހުށަހަޅާފަ އެވެ.
މި ޕްރެޒެންޓޭޝަންތަކަށް ފަހު ދެން މިރޭ ކުރިޔަށް ގެންގޮސްފައި ވަނީ ރަށްރަށުގެ ތަރައްގީއަށް ޕަބްލިކް ޕްރައިވެޓް ޕާޓްނާޝިޕް، ކްލައިމެޓް ފައިނޭންސް އަދި ކާބަން ކްރެޑިޓްއާއި ގުޅޭގޮތުންނެވެ.
މިރޭގެ ޕެނަލް ޑިސްކަޝަންގައި ސަރުވަޝް ވިދާޅުވީ، ދުނިޔޭގެ ތިމާވެށީގެ ޕްލެޓްފޯމްތަކުގައި ރާއްޖެ ސިފަކުރެވެނީ ތިމާވެށީގެ ގޮތުން އެންމެ ނާޒުކު އެއް ގައުމުގެ ގޮތުގައި ކަމަށެވެ. އެގޮތުން ކްލައިމެޓް ވަލްނަރަބަލް ފޯރަމް (ސީވީއެފް) އަދި ކުދި ޖަޒީރާ ގައުމުތަކުގެ ގިންތި (ސިޑްސް) ފަދަ ބައިނަލްއަގުވާމީ ގިންތިތަކާއި ލިސްޓުތަކުގައި ރާއްޖެ ހިމެނޭކަން ސަރުވަޝް ފާހަގަކުރެއްވިއެވެ.
މިފަދަ ގިންތިތަކުގައި ހިމެނުމަކީ އެ ގައުމުތަކަށް ހާއްސަކޮށްގެން ދުނިޔޭގެ އެކި މައިދާންތަކުން ދޫކުރާ މޫސުމީ ފަންޑުތަކަށް ވާސިލުވުމަށް ލިބޭ ވަރަށް ބޮޑު ފުރުސަތެއް ކަމުގައި ވިޔަސް، ހަމައެކަނި ނާޒުކު ގައުމެއްގެ ލޭބަލް އޮތުމަކީ އޭގެ ޒާތުގައި ފައިސާ ލިބެންޖެހޭ ސަބަބެއް ނޫންކަމަށް އޭނާ ވިދާޅުވިއެވެ.
ސަރުވަޝް ވިދާޅުވި ގޮތުގައި ބައިނަލްއަގްވާމީ ފަރާތްތަކުން ތިމާވެށީގެ ގޮތުން ނާޒުކު ގައުމަކަށް ވީތީ ދީފާނެ އެއްޗަކީ ހަމައެކަނި އެއްފަހަރު ދޭ ގްރާންޓް އެކަންޏެވެ. ނަމަވެސް، އެއަށްވުރެ ބޮޑެތި މާލީ އެހީތެރިކަމާއި ފަންޑުތައް ހޯދޭނީ އެ މަޝްރޫއަކީ އޭގެ ޒާތުގައި ފައިސާ އަނބުރާ ހޯދޭނެ އަދި ދެމެހެއްޓެނިވި ގޮތެއްގައި އާމްދަނީ ލިބޭނެ މަޝްރޫއުތަކަކަށް ހަދައިގެންކަމަށް ސަރުވަޝް ވިދަޅުވި އެވެ.
އާމްދަނީއެއް ނުލިބޭ ގޮތަށް ހިންގާ މަޝްރޫއުތަކަކީ ދިގު މުއްދަތުގައި ބޮޑު ގެއްލުމަކަށް ވެގެންދާނެ ކަމެއްކަމަށާއި، އިންވެސްޓަރުންނާއި ބޭންކުތަކުން ފައިސާ ދޭނީ އެ ޕްރޮޖެކްޓަކުން މާލީ ގޮތުން ނަތީޖާ ނެރެވޭނެ ކަމުގެ ޔަގީންކަން އޮވެގެންކަން އޭނާ ފާހަގަކުރެއްވިއެވެ.
ސަރުވަޝް ވިދާޅުވި ގޮތުގައި މިފަދަ ޕްރޮޖެކްޓުތައް ހަގީގަތަކަށ ްހެދުމަށްޓަކައި ލާމަރުކަޒީ ނިޒާމުގެ ތެރެއިން ކައުންސިލްތަކާއި ގުޅިގެން މަސައްކަތް ކުރަންޖެހެ އެވެ. އަދި ކައުންސިލްތަކުން ތިމާވެށްޓާއި މޫސުމީ ބަދަލުތަކާ ގުޅޭ މުހިންމު ބައިތައް ހިމަނައިގެން ބޭންކަބަލް ޕްރޮޖެކްޓްތަކެއް އެކުލަވާލުމުން، އެ މަޝްރޫއުތައް ބައިނަލްއަގުވާމީ ފެންވަރުގެ އިންވެސްޓަރުންނާ ހަމައަށް ގެންގޮސްދިނުމަށް އެހީތެރިވެދެވޭނެކަމަށް ވިދާޅުވިއެވެ.
ސަރުވަޝް ވިދާޅުވީ މި މަޝްރޫއުތަކަކީ ބައިނަލްއަގުވާމީ މިންގަނޑުތަކަށް ފެތޭ، ކަމާބެހޭ އިދާރާތަކުގައި ރަސްމީކޮށް ރަޖިސްޓްރީ ކުރެވިގެން ހިންގޭ މަޝްރޫއުތަކަކަށް ހަދައި، ގްރީން ފައިނޭންސިންގެ މާލީ މަންފާތައް ރާއްޖެއަށް އެތެރެކުރުމަށް މަސައްކަތްކުރަން ޖެހޭ ކަމަށެވެ.
