ދިވެހިރާއްޖެއަކީ ތިމާވެށީގެ ގޮތުން ނާޒުކު ގައުމެއްކަމަށް ބުނެ ވަކާލާތު ކުރުމަކުން އެކަނި ބޭރުގެ މާލީ އެހީތެރިކަން ނުލިބޭނެކަމަށާއި، ކްލައިމެޓް ފައިނޭންސް ހޯދޭނީ އެކަމަށް ހާއްސަ ތަރުތީބުތަކެއް އެކުލަވާލައި ކުރާ މަސައްކަތުންކަމަށް އެމްޑީޕީ ސަރުކާރުގެ ހައުސިން، ކޮންސްޓްރަކްޝަން މިނިސްޓަރ މުހައްމަދު އަސްލަމް ވިދާޅުވެއްޖެ އެވެ.
ތިން ދުވަހަށް ބަހާލައިގެން ކުރިޔަށް ގެންދާ އެމްޑީޕީގެ ކޮންގްރެސްގެ ތެރެއިން މިއަދުގެ ސެޝަންއެއްގެ ގޮތުގައި ކުރިޔަށް ގެންގޮސްފައި ވަނީ ”ރަށްވެހި ތަރައްގީ – އިންވެސްޓްމަންޓް ފޯރަމް“ އެވެ. ކައުންސިލްތަކުން ހިންގުމަށް ގަސްދު ކުރާ ޕްރޮޖެކްޓުތަކުގެ ތަފްސީލުތައް ޕްރެޒެންޓޭޝަންއެއްގެ ގޮތުގައި ވަނީ ހުށަހަޅާފަ އެވެ.
މި ޕްރެޒެންޓޭޝަންތަކަށް ފަހު ދެން މިރޭ ކުރިޔަށް ގެންގޮސްފައި ވަނީ ރަށްރަށުގެ ތަރައްގީއަށް ޕަބްލިކް ޕްރައިވެޓް ޕާޓްނާޝިޕް، ކްލައިމެޓް ފައިނޭންސް އަދި ކާބަން ކްރެޑިޓްއާއި ގުޅޭގޮތުންނެވެ.
ޕެނަލް ބައްދަލުވުމުގައި، ތިމާވެށީގެ ނާޒުކު މައްޗަށް އެކަނި ވަކާލާތު ކުރުމަކުން ރާއްޖެއަށް ހިލޭ އެހީ ނުލިބޭނެކަން ފާހަގަކުރެއްވީ ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް ސަރުވަޝް އާދަމް އެވެ. ސަރުވަޝް ވިދާޅުވި ގޮތުގައި ރާއްޖެއަށް ތިމާވެށީގެ ދާއިރާގެ ތެރެއިން ފަންޑުތައް ލިބޭނީ އާމްދަނީ ލިބޭނެ ބޭންކަބަލް ޕްރޮޖެކްޓުތައް ހިންގައިގެން ކަމަށެވެ.
ސަރުވަޝްގެ ވާހަކައަށް ތާއީދު ކުރައްވައި، އަސްލަމް ވިދާޅުވީ މޫސުމީ ބަދަލުތަކާ ދެކޮޅަށް ވަކާލާތު ކުރުމުގައި ރާއްޖެއިން ބައިނަލްއަގުވާމީ ދުނިޔޭގައި އަބަދުވެސް ވަރަށް އިސް ސަފުގައި މަސައްކަތް ކުރަމުން އަންނަ ކަމަށެވެ. ނަމަވެސް، އެ އެޑްވޮކަސީއަކީ ސީދާ ފައިސާ ލިބޭނެ މަގެއް ނޫންކަމަށާއި، މިހާތަނަށް ރާއްޖެއަށް ނުކުރެވި އޮތް އެންމެ ބޮޑު ކަމަކީ އެ ފައިސާ ހޯދުމަށްޓަކައި ހަމަޖައްސަންޖެހޭ އުސޫލުތަކާއި ނިޒާމީ ކަންކަން ފުރިހަމަކުރުންކަމަށް އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި ހަމައެކަނި ބޭރުގެ ހިލޭ އެހީ ނުވަތަ ގްރާންޓަށް އެކަނި ބަރޯސާވެގެން ރާއްޖެ ފަދަ ގައުމަކަށް ބޭނުންވާ ތަރައްގީގެ ކަންކަން ފުރިހަމައަށް ނުކުރެވޭނެ އެވެ. އެހެންކަމުން މިހާރު ދުނިޔޭގައި ކުރިއަރަމުން އަންނަ ކާބަން ކްރެޑިޓާއި، ބްލޫ ކާބަން އަދި ބަޔޯޑައިވާސިޓީ ފަދަ މާލީ ވަސީލަތްތަކުގެ ބޭނުން ހިފަން ދަސްކުރަންޖެހޭކަމަށް އަސްލަމް ވިދާޅުވިއެވެ.
މި ދާއިރާގެ ފުރިހަމަ މައުލޫމާތު އެނގޭ މީހުން މަދުވުމުން، އެކަމުގެ ކަންބޮޑުވުންފާޅު ކުރައްވައި އަސްލަމް ވިދަޅުވީ ކާބަން ކްރެޑިޓާއި، ކްލައިމެޓް ފައިނޭންސް ހިންގާ ތަރުތީބު އެނގޭ މީހުން މުޅި ރާއްޖޭގައި ވެސް މަދުއިރު މުޅި މުޖްތަމައުއާއި ހާއްސަކޮށް ކައުންސިލްތައް ހޭލުންތެރިވެފައި އޮތުން މުހިންމުކަމަށެވެ.
މިކަމުގެ މުސާލެއްގެ ގޮތުގައި އަސްލަމް ނެންނެވީ މީގެ އަހަރުތަކެއް ކުރިން، އައްޑޫގައި ހިންގި ސްމާޓް މިނީ – ގްރިޑް މަޝްރޫއު އެވެ. އެގޮތުން 2021 ވަނަ އަހަރުގެ ތެރޭގައި އެސެސްމަންޓު ހަދައި، 750 ކާބަން ކްރެޑިޓް ލިބުނުއިރު އޭގެ ތެރެއިން 433 ކްރެޑިޓް މަޝްރޫއު ހިންގި ކުންފުންޏަށް ނެޓް ޒީރޯ ވުމަށް ލިބުނުއިރު، ބާކީ ބައި ލިބުނީ ރާއްޖެއަށްކަމަށް އޭނާ ވިދާޅުވި އެވެ.
މި މައުލޫމާތު އައްޑޫގެ ރައްޔިތުންނަށް ވެސް އެނގިފައި ނެތުމަކީ މިފަދަ ކަންކަން ސިއްރުގެ ގޮތުގައި ހިފެހެއްޓިފައި ހުރުމުގެ ނަތީޖާކަމަށް އަސްލަމް ވިދާޅުވިއެވެ.
ސަރުކާރުން މިކަން ނުކުރާނަމަ، ސިޔާސީ ޕާޓީގެ ޕްރޮޖެކްޓް އޮފީސް މެދުވެރިކޮށް ރަށްރަށާއި އަތޮޅު ކައުންސިލްތައް ހޭލުންތެރިކުރުވައި، ޕަބްލިކް ޕްރައިވެޓް ޕާޓްނާޝިޕް މޮޑެލްގެ ދަށުން މިފަދަ ތިމާވެށީގެ މާލީ މަންފާތައް ހޯދުމުގެ މަސައްކަތް ފަށަންޖެހޭކަމަށް އަސްލަމް ވަނީ ވިދާޅުވެފަ އެވެ.
