ޖައްވުގައި ހުރި ވިހަ ގޭސްތައް ނައްތާލައިގެން އުފައްދާ ކާބަން ކްރެޑިޓަށް ބައިނަލްއަގުވާމީ ބާޒާރުގައި ބޮޑު އަގެއް ލިބޭކަމަށާއި، މީގެ މަންފާ ރާއްޖެއަށް ހޯދިދާނެކަމަށް އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މޫސުމީ ބަދަލުތަކާއި، އެއަށް ފައިނޭންސާއި ގްރާންޓު ހޯދުމާއި ގުޅޭގޮތުން މިރޭ ކުރިޔަށް ގެންދިޔަ ޕެނަލްގައި މި ދާއިރާގައި ބޭންކަބަލް ޕްރޮޖެކްޓުތައް ކުރިޔަށް ގެންދިއުމުގެ މުހިންމުކަމާއި ގުޅޭގޮތުން ވަނީ ވާހަކަ ދައްކާފަ އެވެ. ކުރީގެ ހައުސިން މިނިސްޓަރ މުހައްމަދު އަސްލަމްއާއި، ކުރީގެ ޗީފް ފައިނޭންޝަލް ބަޖެޓް އެގްޒެކެޓިވް ސަރުވަޝް އާދަމް އަދި އައްޑޫ ސިޓީގެ މޭޔަރު އަލީ ނިޒާރު ބައިވެރިވެވަޑައިގެން ވަނީ މި ދާއިރާގެ މައުލޫމާތުތައް ކައުންސިލްތަކަށް ފޯރުކޮށްދިނުން މުހިންމުކަން ވެސް ފާހަގަކޮށްފަ އެވެ.
ރާއްޖެއަކީ މޫސުމީ ބަދަލުތަކާއި ދެކޮޅަށް ވަކާލާތުކޮށް، ރާއްޖެއަށް ގްރާންޓާއި އެހީ ލިބެން ޖެހޭކަމަށް ވަކާލާތު ކުރުމުގައި އެންމެ ކުރީގައި އޮތް ގައުމު ނަމަވެސް ފަންޑު ހޯދުމުގެ ހަގީގީ މަސައްކަތް ނުކުރެވޭކަމަށް ޕެނަލިސްޓުން ވަނީ ވިދާޅުވެފަ އެވެ.
ޕެނަލް ބައްދަލުވުމަށް ފަހު މިރޭގެ ސެޝަން ނިންމާލުމުގެ ކުރިން ދެއްކެވި ވާހަކައިގައި ރައީސް ނަޝީދު ވިދާޅުވީ، ޖައްވުން ނަގާ ކޮންމެ އެއް ޓަނުގެ ކާބަނަށް ކްރެޑިޓެއް އުފެދޭއިރު، އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ކަނޑައަޅާފައިވާ ގޮތުން ކޮމްޕްލަޔަންސް މާކެޓުގައި އެއް ޓަނު ކާބަންގެ އަގު އުޅެނީ ގާތްގަނޑަކަށް 85 ޑޮލަރުގައެވެ. އަދި ވޮލަންޓަރީ މާކެޓުގައި ޓަނެއްގެ އަގު ހުރީ 5 ޑޮލަރާއި 30 ޑޮލަރާ ދެމެދުގައިކަމަށް ވިދާޅުވި އެވެ.
ރައީސް ނަޝީދު ވިދާޅުވީ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖްގެ ދަށުން އެކުލަވާލެވުނު ޕެރިސް އެގްރީމެންޓުގެ ދަށުން ކާބަން ކްރެޑިޓް އުފެއްދުމުގެ އުސޫލުތައް ކަނޑައެޅިފައިވާ ކަމަށެވެ. އަދި މިފަދަ ކަންކަން ރަސްމީކޮށް ހިންގުމަށްޓަކައި ގައުމީ ފެންވަރުގައި ”ޑެޒިގްނޭޓެޑް ނެޝަނަލް އޮތޯރިޓީ“ އެއް އޮންނަންޖެހޭނެކަމަށެވެ.
ޕެނަލްގައި ސުވާލުތަކަށް ހުޅުވާލުމުން ބައެއް ފަރާތްތަކުން ވަނީ އެމްޑީޕީގެ ސަރުކާރުގައި މި މައްސަލަ ހައްލު ކުރުމަށް މަސައްކަތް ކުރެވިފައި ނެތީ ކީއްވެގެންތޯ ވެސް ސުވާލުކޮށްފަ އެވެ. އެކަމަށް އިޝާރާތް ކުރައްވައި ރައީސް ނަޝީދު ވިދާޅުވީ މިކަމަކީ ދުނިޔޭގެ ފެންވަރުގައި ވެސް 2014 ވަނަ އަހަރުގެ ފަހުން ފެށިގެން އައިކަމަކަށް ވާތީ މި ނިޒާމަށް ފަރިތަވުމަށް ވަގުތު ނެގި ކަމަށެވެ. އަދި މީގެ އިތުރުން ބައެއް ފަރާތްތަކުން ގެންގުޅޭ ސޯޝަލިސްޓް ފަލްސަފާއެއްގެ ސަބަބުން ކާބަން ކްރެޑިޓާ ދެކޮޅަށް ވާހަކަދެކެވުނުކަން ފާހަގަކުރެއްވިއެވެ.
