ދައުލަތުގެ ބަޖެޓުން ކައުންސިލްތަކަށް މިހާރު ދެމުން އަންނަ 5 އިންސައްތައިގެ ބްލޮކް ގްރާންޓް 15 އިންސައްތައަށް ބޮޑުކުރުމަށް، އެމްޑީޕީގެ ލާމަރުކަޒީ ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒް ހުށަހަޅުއްވައިފިއެވެ.
އެމްޑީޕީގެ ކޮންގްރެސްގައި ނިޔާޒް ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ލާމަރުކަޒީ ނިޒާމު ބަލިކަށިކޮށް، ބާރުތައް އަލުން މަރުކަޒު ކުރަމުންދާކަމަށެވެ. ނިޔާޒް ވިދާޅުވީ، ރައީސް މުއިއްޒު ވެރިކަމަށް ވަޑައިގަތީ ”ލާމަރުކަޒީ ޗެމްޕިއަން“ އެއްގެ ގޮތުގައި ކަމަށް ވިދާޅުވި ނަމަވެސް، ފެންނަމުންދަނީ އެ ނިޒާމާ ވާދަކުރައްވައި ނިޒާމު ފުނޑުފުނޑުކޮށް ބަލިކުރަން އުޅޭ މަންޒަރު ކަމަށެވެ. އަދި މި ސަރުކާރުން ގެންނަނީ އިސްލާހު ނޫންކަމަށާއި، އެއީ ނިޒާމު ހަލާކުކޮށްލުމަށް ގެންނަ ނުރަނގަޅު ބަދަލުތަކެއް ކަމަށް އޭނާ ފާހަގަކުރެއްވިއެވެ.
ނިޔާޒް ވިދާޅުވީ 2019 ވަނަ އަހަރު ލޯކަލް ގަވަރމަންޓް އޮތޯރިޓީ (އެލްޖީއޭ) އިން ހެދި ދިރާސާތަކުން ދައުލަތުގެ ބަޖެޓުގެ 5 އިންސައްތައިން ކައުންސިލްތައް އިދާރީ ގޮތުން ހިންގޭނެ ކަމަށް ދެއްކި ނަމަވެސް، ފަހުން އައި މުސާރައިގެ ބަދަލުތަކާއި ސިވިލް ސަވަންޓުންގެ މުސާރައިގެ އޮނިގަނޑަށް އައި ބަދަލުތަކާ އެކު މިހާރު އެ ފައިސާއަކީ ކައުންސިލްތައް ހިންގުމަށް އެކަށީގެންވާ އަދަދެއް ނޫން ކަމަށެވެ. މުވައްޒަފުންގެ މުސާރަ ވެސް ބްލޮކް ގްރާންޓުގެ ތެރެއިން ހަމަޖައްސަން ޖެހުމުން، ކައުންސިލްތަކަށް ބޮޑެތި މާލީ ދަތިތަކާ ކުރިމަތިލާން ޖެހިފައިވާ ކަމަށް އޭނާ ފާހަގަކުރެއްވިއެވެ.
ނިޔާޒް ފާހަގަކުރެއްވި ގޮތުގައި، މި ސަރުކާރުން ވެރިކަމަށް އައިސް 2024 ވަނަ އަހަރަށް ބަޖެޓު ހުށަހެޅިއިރު ގާނޫނުގައި ބަޔާންކޮށްފައިވާ ގޮތަށް ކައުންސިލްތަކަށް ބްލޮކް ގްރާންޓް ދީފައެއް ނުވެއެވެ. އޭގެ ސަބަބުން ކައުންސިލްތަކަށް ލިބެންޖެހޭ އެއް ބިލިއަނަށް ވުރެ ގިނަ ރުފިޔާ އުނިކުރިކަމަށް ނިޔާޒް ވިދާޅުވި އެވެ. އެ ފައިސާ މަދުކުރެއްވި މައިގަނޑު ސަބަބެއްކަމަށް ބުނެފައި ވަނީ ކައުންސިލްތަކަށް ލިބޭ ބާކީ ފައިސާގައި ސަރުކާރަށް އަތްނުލެވޭތީ އާއި، ދައުލަތުގެ އާމްދަނީ އިތުރުވާ ވަރަކަށް ކައުންސިލްތަކަށް ދޭންޖެހޭ ބައި އިތުރުވާތީކަމަށް ނިޔާޒް ވިދާޅުވިއެވެ.
ނަމަވެސް އެމްޑީޕީއާއި ސިޓީތަކުގެ ފަސް މޭޔަރުން ގުޅިގެން ނެރުއްވި ބަޔާނާއެކު ސަރުކާރަށް ޖެހުނީ އެ ނިންމުން ބަދަލުކޮށް ފަހަތަށް ޖެހެންކަމަށާއި އެގޮތުން ހުޅުމާލޭގައި ބުޅާ ފެސިލިޓީ ހުޅުވުމުގެ ރަސްމިއްޔާތަށް ވަޑައިގެން ރައީސް މުޢިއްޒު ދެއްކެވި ވާހަކަފުޅުގައި އެކަން އަލުން ހަމަޖައްސަވާނެކަމަށް ވިދާޅުވިކަމަށް ނިޒާޒް ފާހަގަކުރެއްވި އެވެ.
މި ސަބަބުތަކާއި ހުރެ މާލީ ގޮތުން ކައުންސިލްތައް ބާރުވެރިކުރުވުމަށް ނިޔާޒް ހުށަހެޅުއްވީ މިހާރު ދައުލަތުގެ ބަޖެޓުން ދޭ 5 އިންސައްތައިގެ ބްލޮކް ގްރާންޓް 15 އިންސައްތައަށް ބޮޑުކުރުމަށެވެ. މުވައްޒަފުންގެ މުސާރައަށް އައި ބަދަލުތަކާއެކު 5 ޕަސެންޓުން މިހާރު އިދާރީ ގޮތުން ވެސް ކައުންސިލްތައް ނުހިންގޭކަމަށާއި، މި ފައިސާއަކީ ”ހިލޭ އެހީ“ އެއް ނޫން ކަމަށާއި އެއީ ދައުލަތުގެ އެއް ގުނަވަނަށް ދޭންޖެހޭ ބަޖެޓް ސަޕޯޓެއް ކަމަށް ވިދާޅުވިއެވެ. މީގެ އިތުރުން ރިނިއުބަލް އެނާޖީ ފަދަ ދާއިރާތަކުން ސެކްޓޯރަލް ގްރާންޓުތައް ކައުންސިލްތަކާ ހަވާލުކޮށް، ކައުންސިލްތަކުން ލޯނު ނެގޭނެ ފަސޭހަ މަގުތައް ތަންފީޒުކުރަން ޖެހޭ ކަމަށް ވެސް ވިދާޅުވިއެވެ.
މި ސަރުކާރުން ވެރިކަމަށް އައިސް ގާނޫނުގައި އޮތް ގޮތާ ހިލާފަށް ބްލޮކް ގްރާންޓުން އެއް ބިލިއަނަށް ވުރެ ގިނަ ރުފިޔާ އުނިކުރިކަމަށް ނިޔާޒް ވަނީ ތުހުމަތު ވެސް ކުރައްވާފަ އެވެ. އަދި ސަރުކާރުން ލާމަރުކަޒީ ގާނޫނަށް ގެންނަން ބޭނުންވާ އެންމެ ބޮޑު އެއް ބަދަލީ އެއީކަމަށް ވެސް ވަނީ ތުހުމަޔު ކުރައްވާފަ އެވެ.
