”ބޮޑު ބަދަލު“ ސިޔާސަތަށް ތާއީދު ނުކުރަންވީ އެއްވެސް ސަބަބެއް ނެތް ކަމަށާއި، މި ރާއްޖެ އަނެއްކާވެސް އިސްލާހީ ބޮޑު ބަދަލަކަށް ގެންދިއުމަށްޓަކައި އެންމެން އެކަތިގަނޑަކަށް ވާންޖެހޭކަމަށް އެމްޑީޕީގެ ކުރީގެ ޑެޕިއުޓީ ޗެއާޕާސަން މުހައްމަދު ޝިފާޒް (ޝިއްޕެ) ވިދާޅުވެއްޖެއެވެ.
ޝިފާޒް މިހެން ވިދާޅުވީ އެމްޑީޕީގެ ކޮންގްރެސްއަށް ހުށަހަޅާފައިވާ ”ބޮޑު ބަދަލު“ އިސްލާހަށް ބަހުސް ކުރައްވަމުންނެވެ.
ޝިފާޒް ވިދާޅުވީ، ރައީސް މައުމޫން އަބްދުލްގައްޔޫމްގެ ސަރުކާރުގެ ފަހުކޮޅުން ފެށިގެން އެމްޑީޕީން ކުރި ބުރަ މަސައްކަތަކީ މުޅި ރާއްޖޭގެ ސިޔާސީ އަދި އިޖުތިމާޢީ ވެއްޓަށް ގެނައި އިންގިލާބީ ބަދަލެއް ކަމަށެވެ. އެގޮތުން މަގުމައްޗަށް ނުކުމެ ކުރި މުޒާހަރާތަކާއި ވަކާލާތުތަކުގެ ނަތީޖާއެއްގެ ގޮތުން، ގައުމަށް ޒަމާނީ ފެހި ޤާނޫނުއަސާސީއެއް ލިބި، ރައްޔިތުންނަށް އެތައް އަސާސީ ޙައްޤުތަކެއް ކަށަވަރުވެގެން ދިޔަކަމަށް ޝިފާޒް ވިދާޅުވި އެވެ.
އޭރު އެމްޑީޕީން ވަކާލާތުކުރި ކަންކަމަކީ ހަގީގަތަކަށް ނުވާނެ ހުވަފެންތަކެއްގެ ގޮތުގައި ގިނަ ބަޔަކު ސިފަކުރި ނަމަވެސް، އެމްޑީޕީގެ އަޒުމާއި ހިތްވަރުން އެ ހުރިހާ ކަމެއް ތަންފީޒުކޮށް ދައްކައިދީފައިވާކަމަށް ޝިފާޒް ވިދާޅުވިއެވެ. އެގޮތުން ސްކޫލް ކުދިންނަށް ހިލޭ ފޮތްޕެންސިލް ފޯރުކޮށްދިނުމާއި، އަތޮޅުތަކުގެ ރަށްރަށުގައި ލަފާފުރުމުގެ ދަތިކަން ހައްލުކޮށް ބަނދަރުތައް ހެދުމާއި، ރައްޔިތުންނަށް ސާފު ބޯފެނާއި ރައްކާތެރި ނަރުދަމާގެ ނިޒާމު ގާއިމުކޮށްދިނުން ފަދަ އެތައް ޚިދުމަތެއް ހިމެނޭކަމަށް ޝިފާޒް ވިދާޅުވި އެވެ.
ޝިފާޒް ވިދާޅުވީ ބޭސްފަރުވާއަށްޓަކައި ވެރިންގެ އަރިހަށް ސަލާންޖަހަން ދިޔަ ދިއުން ނިމުމަކަށް ގެނެސް، އާސަންދައިގެ ނިޒާމު ތައާރަފުކުރުމާއި، ލާމަރުކަޒީ ގާނޫނުގެ ދަށުން ރައްޔިތުންނަށް އަމިއްލަ އިހުތިޔާރާއި ބާރުތައް ހޯދައިދިނުމަކީ އެމްޑީޕީން މި ގައުމަށް ގެނެސްދިން އެންމެ ބޮޑެތި ބަދަލުތައް ކަމަށެވެ.
ޝިފާޒް ވިދާޅުވީ ތާރީހުން ފެންނަން އޮތް ހަގީގަތަކީ ދައުލަތް ހިންގުމުގެ ނިޒާމަށް ބަދަލު އަންނަނީ އެމްޑީޕީގެ އެތެރޭގެ ހިންގުމާއި ސިޔާސަތުތައް ބައްޓަންކުރާ ގޮތެއްގެ މައްޗަށް ބިނާވެގެން ކަމަށެވެ. އެހެންކަމުން، އެމްޑީޕީގެ އަސާސީ ގަވާއިދަށް އިސްލާޙު ގެނެސް، ޕާޓީގެ ސިޔާސަތުތައް އަލުން އެކުލަވައިލުމަކީ މުޅި ގައުމުގެ ހިންގުމުގެ ނިޒާމަށް ހެޔޮ ބަދަލުތަކެއް އަންނާނެ ކަމެއްގެ ގޮތުގައި އޭނާ ފާހަގަކުރެއްވި އެވެ.
ޝިފާޒް ވިދާޅުވީ، މިއީ ހަމައެކަނި 2028 ވަނަ އަހަރު އުފެދޭ އެމްޑީޕީގެ ސަރުކާރަކުން ތަންފީޒުކުރަން މަޑުކުރަންވީ ސިޔާސަތެއް ނޫން ކަމަށެވެ. އޭގެ ބަދަލުގައި، މިއަދުން ފެށިގެން އެމްޑީޕީގެ މެންބަރުން މަގުމައްޗަށާއި ރައްޔިތުންގެ ތެރެއަށް ނުކުމެ، މިހާރު އޮތް ސަރުކާރަށް މަޖުބޫރުކޮށްގެންވެސް މި އިސްލާހީ ބަދަލުތައް ގެނައުމަށް ވަކާލާތުކުރަންޖެހޭކަމަށް ވިދާޅުވިއެވެ.
