ދިވެހިރާއްޖޭގެ ވެރިކަމުގެ ނިޒާމަށާއި ގައުމު ހިންގުމުގެ ވައްޓަފާޅިއަށް ބޮޑެތި އިސްލާހީ ބަދަލުތަކެއް ގެންނަންޖެހިފައިވާކަމަށާއި، ރައްޔިތުން އެދޭ ހަގީގީ އިންސާފު ގާއިމު ކުރެވޭނީ މިފަދަ ނިޒާމީ ބޮޑު ބަދަލެއް ގެނެވިގެންކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ވިދާޅުވެއްޖެއެވެ.
އެމްޑީޕީގެ ކޮންގްރެސްއަށް ހުށަހަޅާފައިވާ ”ބޮޑު ބަދަލު“ އަށް ތާއީދު ކުރައްވައި ކުޑޫ ވިދާޅުވީ ގައުމަށް ބޭނުންވާ މުހިންމު ބަދަލުތަކަކީ ކޮބައިތޯ ބަލައި އަބަދުވެސް މަޝްވަރާ ކުރެވެން ޖެހޭ ކަމަށެވެ. އަދި ބޮޑު ބަދަލުގެ ބޭނުމަކީ އެއީކަމަށް ގަބޫލު ކުރައްވާކަމަށް ކުޑޫ ވިދާޅުވި އެވެ.
ކުޑޫ ވިދާޅުވި ގޮތުގައި، ޢާންމުކޮށް ކޮފީ މޭޒުތަކުގައްޔާއި އެކި އެއްވުންތަކުގައި ދެކެވޭ މުހިންމު ވާހަކަތަކާއި ރައްޔިތުންގެ ކަންބޮޑުވުންތައް، ރަސްމީ ސިފައެއްގައި ކަރުދާހަށް ތިރިކުރުމަކީ ވަރަށް މުހިންމު އަދި އެހާމެ ބޭނުންތެރި ކަމެކެވެ. އަދި މިފަދަ ހިޔާލުތައް ލިޔުމަކަށް ގެނެވި، އެކަންކަމާމެދު ފުޅާ ދާއިރާއެއްގައި މަޝްވަރާކޮށް ވާހަކަދެއްކުމުގެ ފުރުސަތު ފަހިވެގެން ދިޔުމަކީ ލިބުނު ވަރަށް ބޮޑު ކުރިއެރުމެއްކަމަށް ވެސް ވިދާޅުވި އެވެ.
ކުޑޫ ވިދާޅުވީ، ރައްޔިތުން ވޯޓުދީގެން ސަރުކާރުތައް ވެރިކަމަށް ގެނައުމަށްފަހު، އެ ސަރުކާރުތައް ބަދަލުވަމުންދާ ހަގީގީ ސަބަބުތަކާމެދު ސުވާލު އުފައްދަން ޖެހޭ ކަމަށެވެ. އަދި ވެރިކަމެއް ދެމިއޮތުމާއި ނޯތުން ބިނާވަނީ ހަމައެކަނި ރައްޔިތުންނަށް ކާބޯތަކެއްޗާއި މާއްދީ އެހީތައް ނުވަތަ ވަގުތީ އިނާޔަތްތަކެއް ފޯރުކޮށްދިނުމުގެ މައްޗަށް އެކަނި ނޫންކަމަށް ވިދާޅުވި އެވެ.
އޭގެ ބަދަލުގައި، ރައްޔިތުން އެންމެ ބޮޑަށް އެދިއެދި ތިބީ ޢަދުލުއިންސާފު ގާއިމުވެ.، އެކަން ހާސިލުކުރެވޭނީ ވެރިކަން ހިންގުމުގެ ނިޒާމަށް ޖުމްލަ ހެޔޮ ބަދަލުތަކެއް ގެނެވިގެންކަމަށް ދެކޭކަމަށް ކުޑޫ ވަނީ ވިދާޅުވެފަ އެވެ.
ކުޑޫ ވިދާޅުވީ، މިފަދަ މުހިންމު ބަދަލުތަކަށް ވަކާލާތުކޮށް، ހިޔާލުފާޅުކުރުމުގެ ފުރުސަތު ފުޅާވެފައި އޮންނަން ޖެހޭ ކަމަށެވެ.
