ނިޒާމީ ބޮޑެތި ބަދަލުތައް ހިމެނޭ ”ބޮޑު ބަދަލު“ ރަސްމީކޮށް ބަލައިގަތުމަށް އެމްޑީޕީގެ ކޮންގްރެސްއަށް ހުށަހަޅައި ފާސްކޮށްފި އެވެ.
އެމްޑީޕީގެ ކޮންގްރެސްގައި މިއަދު ކުރިޔަށް ގެންދަނީ ޕާޓީގެ އަސާސީ ގަވައިދަށް އިސްލާހުތައް ހުށަހެޅުމެވެ. އެގޮތުން ނިޒާމީ ބޮޑެތި ބަދަލުތައް ހިމެނޭ ”ބޮޑު ބަދަލު“ ވަނީ މިއަދުގެ ކޮންގްރެސްއަށް ހުށަހަޅާފަ އެވެ. ބޮޑު ބަދަލުގެ އިސްލާހުތައް ކޮންގްރެސްއަށް ހުށަހެޅުއްވީ، ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ.
މި އިސްލާހަށް ވޯޓަށް އެހިއިރު، ޖަލްސާ މާލަމުގައި ހާޒިރުވެ ތިބީ 563 މެމްބަރުންނެވެ. އަދި ”ބޮޑު ބަދަލު“ ބަލައިގަތުމަށް ފެންނަކަމަށް ފާސްވެފައި ވަނީ ވޯޓުގައި ބައިވެރިވި 520 މެމްބަރުންގެ ވޯޓާއި އެކު އެވެ.
ފައްޔާޒް ވިދާޅުވީ، ޤާނޫނުއަސާސީން އުންމީދުކުރި ގޮތަށް ދައުލަތުގެ ބާރުތައް ފާރަވެރިވެ، ޒިންމާދާރުކުރުވުމުގެ ޗެކްސް އެންޑް ބެލެންސަސް ނިޒާމު މިހާރު މަސައްކަތް ނުކުރާ ކަމަށެވެ. ޤާނޫނުއަސާސީން ރައްޔިތުންގެ ހައްގުތައް ހިމާޔަތްކޮށް، ސަރުކާރު ޖަވާބުދާރީ ކުރުވާނެކަމަށް ބެލެވުނު ރައްޔިތުންގެ މަޖިލީހުގެ ސުޕަރ މެޖޯރިޓީ ވެރިކަންކުރާ ޕީއެންސީއަށް ލިބުމުން، މުޅި ނިޒާމުގެ ބާރުތައް އެއްކޮށް ގަޑުބަޑުވެ، ހުރިހާ ބާރެއް ވެރިމީހާގެ މުށުތެރެއަށް ޖަމާވެފައިވާކަމަށް ފައްޔާޒް ވިދާޅުވި އެވެ.
ފައްޔާޒް ވިދާޅުވި ގޮތުގައި ރައީސުލްޖުމްހޫރިއްޔާއަށް ލިބިދީފައިވާ ބޮޑެތި ބާރުތައް ކުޑަކުރުމަށްޓަކައި އެމްޑީޕީން ހުށަހަޅާ ގަރާރުގެ މައިގަނޑު އަސާސަކީ ދައުލަތާއި ސަރުކާރަކީ ވަކި ދެ މުއައްސަސާއެއްގެ ގޮތުގައި ކަނޑައެޅުމެވެ. ފައްޔާޒް ވިދާޅުވީ މިއީ ބަރުލަމާނީ ނިޒާމަކަށް ބަދަލުކުރުމެއް ނޫންކަމަށާއި މީގެ މައިގަނޑު މަގްސަދަކީ ސަރުކާރަކީ ރައްޔިތުން އިންތިޚާބުކުރާ ފަރާތަކަށް ހަދައި، ދައުލަތުގެ ވެރިޔާ ވަކިން ހުންނަވާ ގޮތަށް ނިޒާމީ ބަދަލެއް ގެނައުމެވެ.
