އެއްވުންތައް ބާއްވަންވާނީ ޤާނޫނީ އިމުގެ ތެރެއިން ކަމަށާއި، އާންމު ދަތުރުފަތުރަށާއި ހިނގާބިނގާވެ އުޅޭ ފަރާތްތަކަށް ދަތިނުވާނޭހެން އެއްވުންތައް އިންތިޒާމުކުރުމަށް މޯލްޑިވްސް ޕޮލިސް ސަރވިސްއިން އިލްތިމާސްކޮށްފިއެވެ.
ފުލުހުން މިކަމަށް އިލްތިމާސްކޮށްފައިވަނީ މިރޭ މާލޭގައި ބޭއްވުމަށް ރާވަމުންދާ އެއްވުމަކާ ގުޅިގެން ނެރުނު ބަޔާނެއްގައެވެ.
ފުލުހުންގެ ބަޔާނުގައި ފާހަގަކޮށްފައިވާ ގޮތުގައި މިރޭގެ އެއްވުމުގައި ބައިވެރިވާ ފަރާތްތަކުގެ ސަލާމަތާއި ރައްކާތެރިކަމާއި، އަދި އާންމު ދަތުރުފަތުރާއި ހިނގާބިނގާވެ އުޅޭ ފަރާތްތަކަށް ދިމާވެދާނެ ދަތިތަކާ ގުޅޭގޮތުން އެއްވެސް ފަރާތަކުން ދިވެހި ފުލުހުންގެ ޚިދުމަތަށް މިހާތަނަށް މައުލޫމާތު ހިއްސާކޮށްފައެއް ނުވެއެވެ.
އެހެންކަމުން، ކުރިން އެންގުމަކާ ނުލައި އެއްވުމަށް ހުއްދަ ކޮށްފައިވާ ތަންތަން ފިޔަވައި އެހެން ތަންތަނަށް އެއްނުވުމަށާއި، އެ އެއްވުން ޤާނޫނީ އިމުގެ ތެރެއިން ބޭއްވުމަށް އެއްވުން އިންތިޒާމުކުރާ ފަރާތްތަކަށް ފުލުހުން ވަނީ އަންގާފައެވެ. އަދި މިފަދަ އެއްވުންތަކުގެ ސަބަބުން މަގުމަތީގެ ދަތުރުފަތުރަށާއި ހިނގާބިނގާވެ އުޅޭ އާންމުންނަށް ދަތިތަކާ ކުރިމަތިލާންޖެހޭތީ، އެއްވެސް ފަރާތަކަށް ދަތިނުވާނޭހެން ކަންކަން ރޭވުމަށްވެސް ވަނީ އިލްތިމާސްކޮށްފައެވެ.
ހަމައެއާއެކު، އެއްވުމުގެ ތެރެއިން ޤާނޫނާއި ގަވާއިދާ ޚިލާފު އެއްވެސް އަމަލެއް ހިންގައިފިނަމަ، އެފަދަ ކަންކަން ވަގުތުން ހުއްޓުވައި، ޤާނޫނީ ގޮތުން އަޅަންޖެހޭ ފިޔަވަޅުތައް އަޅާނެ ކަމަށްވެސް ފުލުހުންގެ ބަޔާނުގައި ވަނީ ހަނދާންކޮށްދީފައެވެ.
