ދައުލަތަށް އާމްދަނީ ހޯދަން މާލެ ސަރަހައްދުގައި ދިރިއުޅޭ ރައްޔިތުން ދުއްވާ އުޅަނދު ފަހަރުތަކުން ”ކޮންޖެޝަން ފީ“ އެއް ނަގަން އުޅޭތީ މާލޭ މޭޔަރު ކަމަށް ވާދަކުރައްވާ އިދިކޮޅު ޕީޕީއެމްގެ ކެންޑިޑޭޓް ޑރ. މުހައްމަދު މުއިއްޒު ފާޑު ވިދާޅުވެއްޖެއެވެ.
މުއިއްޒު ކުރެއްވި ޓްވީޓެއްގައި ވިދާޅުވީ ބަޖެޓުގައި އާމްދަނީ ހޯދާނެ ވަސީލަތެއްގެ ގޮތުގައި ”ކޮންޖެޝަން ޗާޖު“ގެ ނަމުގައި މާލޭގައި ދިރިއުޅޭ ރައްޔިތުންގެ އަތުން ފައިސާ ނަގަން ހުށަހަޅާފައިވާ ކަމަށެވެ.
”ޓްރެފިކާ ޕާކިންގެ މައްސަލަ ހައްލު ނުވުމަކީ ރައްޔިތުން އިތުރަށް ހަނާކޮށް އިތުރަށް ފަގީރުކޮށް ނިކަމެތިކޮށްލަން ޖެހޭ ސަބަބެއް ނޫން،“ ކަމަށް މުއިއްޒު ވިދާޅުވި އެވެ.
Budget gai aamdhanee hoadhaa vaseelathegge gothugai "Congestion Charge" ge namugai Male gai dhiriulhey rayyithunge jeebun faisaa nagan vanee hushahalhaafa. Traffic aa parking massala hallunuvumakee rayyithun ithurah hanaakoh, ithurah fageerukoh nikamethikohlan jehey sababehnnoon!
— Dr Mohamed Muizzu (@MMuizzu) November 17, 2020
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓްގައިވާ ގޮތުން ކޮންޖެޝަން ޗާޖާއި ޕާކިން ފީގެ ގޮތުގައި ނަގާ ފައިސާއިން ދައުލަތަށް އިތުރު 36.6 މިލިއަން ރުފިޔާ ލިބޭނެ ކަމަށް އަންދާޒާ ކުރެވެއެވެ.
ސަރުކާރުން މި ފީ ނެގުމުގެ މަގްސަދެއް ކަމަށް ބުނެފައި ވަނީ މާލޭ ސަރަހައްދަކީ ގިނަ އަދަދެއްގެ މީހުން ދިރިއުޅޭ ސަރަހައްދަކަށް ވެފައި ގިނަ އަދަދެއްގެ ދުއްވާ އުޅަނދު ބޭނުން ކުރާ ސަރަހައްދަކަށް ވުމުން އެ ކަމުގެ ސަބަބުން މަގުތަކަށް ބާރު ބޮޑުވެ ބައިބޯވުން އިތުރުވާތީ މާލޭ ސަރަަހައްދުގެ ބައިބޯވުން ކުޑަކުރުން ކަމަށް ވެސް ބަޖެޓް ފޮތުގައި ލިޔެފައިވެއެވެ.
