ފުވައްމުލައް ސިޓީގައި ހިނގާ ޖިނާއީ ކުށްތަކުގެ މައްސަލަތައް ޕްރޮސެކިއުޓަރ ޖެނެރަލް (ޕީޖީ) އޮފީސްގެ ފުވައްމުލައް ގޮފިން ބަލައިގަންނަން ފަށައިފައިވާ ކަމަށް އެ އޮފީހުން ބުނެފިއެވެ.
މީގެ ކުރިން ފުވައްމުލަކުގައި ތަހުގީގު ކުރާ ޖިނާއީ މައްސަލަތައް ބަލައިގަންނަމުން ދިޔައީ ޕީޖީގެ އައްޑޫ ގޮފިންނެވެ.
ފުވައްމުލަށް ސިޓީއަކަށް ބަދަލުވުމާއެކު ޕީޖީ އޮފީހުގެ އަމާޒަކަށް ވީ ފުވައްމުލަކުގައި ގާއިމްވެތިބި ތަހުގީގީ އިދާރާތަކާ ގުޅިގެން މަސައްކަތް ކުރުން ކަމަށް ވެސް ޕީޖީ އޮފީހުން ވަނީ ބުނެފައެވެ.
2022 ވަނަ އަހަރުން ފެށިގެން ޕީޖީ އޮފީހުގެ ޕްރޮސިކިއުޓަރަކު ފުވައްމުލަކުގައި މަސައްކަތް ކުރަމުންދާ ކަމަށްވެސް އެ އެ އޮފީހުން ބުނެފައިވެއެވެ. މިހާރު އިދާރީ މުވައްޒަފުންނާއެކު ފުވައްމުލަކު ގޮފީގައި މައްސަލަ ބަލައިގަތުމުގެ އިންތިޒާމް ވަނީ ހަމަޖައްސާފައެވެ. އެކަމުގެ ސަބަބުން ފުވައްމުލަކުގައި ކުރާ ކިނާއީ ކުށްތަކުގެ މައްސަލަތައް އިތުރަށް އަވަސްވެގެންދާނެ ކަމަށް ޕީޖީ އޮފީހުން ބުނެފައިވެއެވެ.
ޕީޖީ އޮފީހުގެ އަމާޒަކީ އެ އޮފީހުގެ ފުވައްމުލަކު ގޮފިން ފެންވަރު ރަނގަޅު ހިދުމަތްތަކެއް ތަހުގީގީ އިދާރާތަކަށް ފޯރުކޮށްދިނުމާއި ފުވައްމުލަކުގައި އަމަން އަމާންކަން ގާއިމްކުރުމަށް ފުލުހުންނާއި ސިޓީ ކައުންސިލް އަދި މުއައްސަސާތަކުން ކުރާ މަސައްކަތަށް ވީހާވެސް ގާތުން އެހީތެރިކަން ފޯރުކޮށްދިނުން ކަމަށް އެ އޮފީހުން ބުނެއެވެ.
advertisment