ރާއްޖެ އަދި ސޭޝެލްސް ގުޅިގެން އިންޑިއާ ކަނޑުގެ ސަރަހައްދުގެ ސަލާމަތީ ކަންކަން ބެލެއްހެއްޓުމަށް އެއްބަސްވުމެއް ގާއިމުކޮށްފިއެވެ.
އިންޑިއާގެ ނޫހެއްގައި ޝާއިއުކޮށްފައިވާގޮތުން، ރާއްޖެ އަދި ސޭޝެލްސް ގުޅިގެން މަސައްކަތްކުރުމަށް ނިންމާފައިވަނީ، އިންޑިއާ ކަނޑުގެ ސަރަހައްދުގައި ހުރި ސަލާމަތީ މައްސަލަތައް ހަލުކުރުމަށެވެ. އަދި މި އެއްބަސްވުމުގެ ދަށުން، މި ސަރަހައްދުގައި އަމަން އަމާންކަން ގާއިމުކުރުމަށް އިންޑިއާއިން ކުރަމުންދާ މަސައްކަތްތަކަށް ބޮޑު ކުރިއެރުންތަކެއް ލިބިގެންދާކަމަށްވެސް ބުނެފައިވެއެވެ.
މި އެއްބަސްވުން ގާއިމު ކުރެވިފައިވަނީ ރައީސް އިބްރާހިމް މުހައްމަދު ސާލިހުގެ އަރިހަށް ސޭޝެލްސްގެ ރައީސް ވޭވަލް ރާމްކަލާވަން ބައްދަލުކުރެއްވުމަށްފަހު، ދެ ގައުމުން ގުޅިގެން ނެރިފައިވާ ބަޔާނެއްގައެވެ. ސޭޝެލްސްގެ ރައީސް ރާއްޖެވަޑައިގެންފައިވަނީ ރަސްމީ ދަތުރުފުޅެއްގައެވެ.
ސޭޝެލްއަކީ ރާއްޖެއާއި އެއްފަދައިން އިންޑިއާ އާއިއެކު، ގާތް އަސްކަރީ ގުޅުންތަކެއް ބާއްވަމުންދާ ގައުމެކެވެ. ސޭޝެލްސްގެ އިތުރުން މޮރިޝަސް އަދި ލަންކާއަކީވެސް އިންޑިއާ ކަނޑުގެ ސަރަހައްދުގައި ގާއިމުކޮށްފައިވާ ސެކިއުރިޓީ ގްރިޑުގައި މުހިންމު ރޯލުތަކެއް އަދާކުރަމުންދާ ގައުމުތަކެވެ.