ރިޔާސީ އިންތިޚާބުގެ ކޮންމެ ކެންޑިޑޭޓެއްގެ އިންތިޚާބާ ގުޅޭ އެންމެހައި ޚަރަދުތައް ކުރުމަށްޓަކައި، އެކަމަށް ޚާއްޞަކުރާ ބޭންކް އެކައުންޓެއް ހުޅުވަންޖެހޭނެކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއީލް ހަބީބް ވިދާޅުވެއްޖެއެވެ.
މިއަހަރު ބާއްވާ ރިޔާސީ އިންތިހާބަށް 2 މަސް ދުވަހަށްވެފައިވާއިރު، ހަބީބް ވިދާޅުވީ ރިޔާސީ އިންތިޚާބުގެ ކޮންމެ ކެންޑިޑޭޓެއްގެ އިންތިޚާބާ ގުޅޭ އެންމެހައި ޚަރަދުތައް ކުރުމަށްޓަކައި، އެކަމަށް ޚާއްޞަކުރާ ބޭންކް އެކައުންޓެއް ދިވެހިރާއްޖޭގައި ހިންގާ ބޭންކެއްގައި، ކެންޑިޑޭޓުގެ ނަމުގައި، ހުޅުވަންވާނެކަމަށެވެ. އަދި މިއީ އަލަށް ހުޅުވާ އެކައުންޓަކަށްވާންޖެހޭނެކަމަށް ވިދާޅުވިއެވެ،
ރިޔާސީ އިންތިޚާބުގެ ކޮންމެ ކެންޑިޑޭޓަކުވެސް، އިންތިޚާބާ ގުޅިގެން ކުރާ އެންމެހައި ޚަރަދެއް ކުރަންވާނީ، އަލަށް މި ހުޅުވާ ބޭންކް އެކައުންޓް މެދުވެރިކޮށްކަމަށް ހަބީބް ވަނީ ވިދާޅުވެފައެވެ. އަދި ކެންޑިޑޭޓަށް އިންތިޚާބާ ގުޅިގެން، ލިބޭ އެންމެހައި ފައިސާގެ އެހީވެސް ޖަމާކުރަންވާނީ، އަލަށް ހުޅުވާ އެކައުންޓަށްކަމަށް ހަބީބް ވިދާޅުވިއެވެ.
މިފަދަ އެކައުންޓެއް ކެންޑިޑޭޓުންނަށް ޚާއްޞަކޮށްގެން، ފަސޭހައިން ހުޅުވޭނޭ އިންތިޒާމް ހަމަޖެއްސުމަށްޓަކައި، އީސީ އިން ވަނީ މޯލްޑިވްސް މަނިޓަރީ އޮތޯރިޓީ އާ އެކީގައި މަޝްވަރާ ކުރައްވާފައިކަމަށާއި، އަދި ބޭންކްތަކާ ވާހަކަ ދައްކަވައިގެން، އެ އިންތިޒާމް ހަމަޖައްސަވައިދެއްވާނޭކަމުގައި ވެސް ވަނީ ވިދާޅުވެފައިވާކަން ހަބީބް ވަނީ ފާހަގަކުރައްވާފައެވެ.