ދުވާފަރު ދާއިރާގެ ފޮށި އަލުން ގުނަންޖެހޭ ސަބަބެއް އަދި ނެތްކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އެ ދާއިރާގެ ގޮނޑި ޕީއެންސީގެ ކެންޑިޑޭޓަށް ކާމިޔާބުވީ 4 ވޯޓުގެ ފަރަގަކުންނެވެ. ވޯޓު ފޮށި އަލުން ގުނުމަށް އެދި އީސީގެ ކޮމްޕްލެއިންސް ބިއުރޯއަށް މައްސަލައެއް ވަނީ ހުށައަޅާފައެވެ.
ދުވާފަރު ދާއިރާގެ ވަގުތީ ނަތީޖާ ދައްކާ ގޮތް:
ޕިއެންސީގެ ކެންޑިޑޭޓު މުހައްމަދު އަލީ: 1،074 ވޯޓު
މިނިވަން ކެންޑިޑޭޓު އިބްރާހިމް އަބްދުއްރަހްމާން (އިބުއްކޮ): 1،070 ވޯޓު
އެމްޑީޕީގެ ކެންޑިޑޭޓު، މިހާރުގެ މެންބަރު އިސްމާއިލް އަހުމަދު (އިއްސޭ) 579 ވޯޓު
ޖުމްހޫރީ ޕާޓީގެ ކެންޑިޑޭޓު، ކުރީގެ ހޯމް މިނިސްޓަރު އަޒްލީން އަހުމަދު: 77 ވޯޓު
މި މައްސަލައާއި ގުޅިގެން އީސީގެ މެންބަރު ހަސަން ޒަކަރިއްޔާ ވިދާޅުވީ މިހާރު އެ މައްސަލަ ބަލަމުން އަންނަކަމަށެވެ. ނަމަވެސް މިހާތަނަށް ބެލި ބެލުމުން ދުވާފަރު ދާއިރާގެ ވޯޓު ފޮށިތަށް ގުނަންޖެހޭ ހާލަތެއް އޮތް ކަމަކަށް އަދި ފާހަގައެއް ނުކުރެވޭކަމަށެވެ.