ރައީސް މުހައްމަދު ނަޝީދުގެ ވެރިކަން މަޖޫބޫރުން ނިމުމަކަށް ގެނައުމުގައި ބައިވެރިވިކަމަށް އެމަނިކުފާނު ތުހުމަތުކުރެއްވި ފަރާތްތަކާއިއެކު މަސައްކަތްކުރައްވަން ފެއްޓެވުމަކީ ދިވެހި ސިޔާސީ މައިދާނުގައި އެމަނިކުފާނުގެ ޖާގަ ކަށަވަރުކޮށްދެއްވުމަށް މަސައްކަތްތައްކޮށްދެއްވި ރައްޔިތުންގެ ”ކަންފަތް މަތީ“ ޖެއްސެވުމާއި އެއްފަދަ ކަމެއްކަމަށް މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ސިފަކުރައްވައިފިއެވެ.
ޑިމޮކްރެޓްސްގައި ހިމެނިވަޑައިގަންނަވާ މަޖިލީހުގެ ރައީސް މުހައްމަދު ނަޝީދު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި އެމްއެންޕީގެ ލީޑަރު މުހައްމަދު ނާޒިމް މަޝްވަރާކުރެއްވުމަށްފަހު ކުރިއަށް އޮތް ރިޔާސީ އިންތިހާބުގައި އެއް ކެނޑިޑޭޓަކު ނެރުމަށްވަނީ އިއްތިފާގުވެފައެވެ. އަދި ކުރިއަށް އޮތް ދުވަސްތަކުގެ ތެރޭގައި ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ޕީޕީއެމްގެ އިތުރުން ކުރީގެ ރައީސް މައުމޫން އަބްދުލްގައްޔޫމުގެ އެމްއާރްއެމްއާއިއެކުވެސް މަޝްވަރާތައް ކުރިއަށް ގެންދާނެކަމަށް ތިން ބޭފުޅުންވަނީ މީޑިއާތަކާއި މައުލޫމާތު ހިއްސާކުރައްވާފައެވެ.
ނާޒިމް އަދި ރައީސް ނަޝީދު އެކުގައި މަސައްކަތްކުރައްވަމުންދާކަން ހާމަވެގެންދިއުމާއިއެކު، ނިހާދުވަނީ އެކަމަށް ފާޑުވިދާޅުވެފައެވެ. އޭނާ ވިދާޅުވީ، ދެ އަހަރު ދުވަހު އެތައް ހިތްވަރުގަދަ ބަޔަކު ”ކޮބާ މަގޭ ވޯޓު“ ”ކާޅު ކާޅު“ އަދި ”ބާގީ ބާގީ“ އަށް ގޮވައި ހެދިކަމަށެވެ. އަދި އެކަމުގެ ސަބަބުން އެ މީހުންނަށް އެތައް އަނިޔާއަކާއި ކުރިމަތިލާންޖެހުނުކަމަށްވެސް ވިދާޅުވިއެވެ. އޭނާ ވިދާޅުވީ، ފަސް އަހަރު ދުވަހު ”ދޫކުރޭ“ ގޮވަން ތިބެ އެތައް ބަޔަކަށް އަނިޔާތައް ލިބިގެންދިޔަކަމަށެވެ. އަދި މަރުވެދާންވެސް ޖެހުނުކަމަށާއި އަދިވެސް އެ އަނިޔާތަކުގެ ވޭނުގެ ސަބަބުން ބޭސް ފަރުވާ ކުރަމުންދާ މީހުންވެސް ތިބިކަމަށް ނިހާދު ފާހަގަކުރެއްވިއެވެ.
Badi jassaigen majboor kuruvaigen isthiufaa dheyn jehunee kamah bune Nazim + Riyaz ai dhekolhah ethah jareemaa eh hinguvai adu ufuluvi!
Miadhu ehuirhai gurubaanee eh ve Majlis Raees kan hoadhai dhin Rayyithun kanFaih mathee e jehee baarah! Amilla edhumah nukuraane kameh neih! 😭— Feydhoo Meehaa (Mohamed Nihad) (@nihad_m) July 19, 2023
ނިހާދު ވިދާޅުވީ، ރައީސް ނަޝީދު އިސްތިއުފާ ދެއްވީ، އެމަނިކުފާނުގެ ބޮލުގައި ބަޑިޖައްސައި މަޖުބޫރުކުރުވުމުންކަމަށް އެމަނިކުފާނު ވިދާޅުވިކަމަށެވެ. އަދި ނާޒިމް އާއި މިހާރުގެ ތިމަރަފުށި ދާއިރާގެ މެމްބަރު އަބްދުﷲ ރިޔާޒްގެ މައްޗަށް އެ ތުހުމަތުތައްކުރައްވައި، އެ ބޭފުޅުންނާއި ދެކޮޅަށް ރައީސް ނަޝީދުވަނީ މީހުން ލައްވައި އެތައް ޖަރީމާއެއް ހިންގުވައި އަޑު އުފުލުވާފައިކަމަށްވެސް ވިދާޅުވިއެވެ. އެހެްނނަމަވެސް އެ ހުރިހާ ގުރުބާނީތަކެއްވެ މަޖލީހުގެ ރައީސް ކަން ހޯދައިދިނުމުން ގޮސް އެ ބޭފުޅުންނާއި މިއަދު ގުޅިވަޑައިގަތުމަކީ ބުރަ މަސައްކަތްތައް ކޮށްދެއްވި ރައްޔިތުންގެ ކަންފައި މަތީ ޖެއްސެވުންކަމަށާއި، ރައީސް ނަޝީދު އަމިއްލަ އެދުންތައް ފުއްދެވުމަށްޓަކައި ކޮންމެ ފަދަ ކަމެއްވެސް ކުރައްވަފާނެކަމަށް ވިދާޅުވިއެވެ.
