މަނީ ލޯންޑަރިންގް މައްސަލައެއްގައި ކޮލަމްބިއާގެ ރައީސްގެ ދަރިފުޅު ހައްޔަރުކޮށްފި

ހައި ޕްރޮފައިލް މަނީ ލޯންޑަރިންގް މައްސަލައެއް ތަހުގީގުގެ ތެރެއިން ތުހުމަތުތަކެއް ކުރެވި ކޮލަމްބިއާގެ ރައީސްގެ ފިރިހެން ދަރަފުޅު ހައްޔަރުކޮށްފިއެވެ.

ބައިނަލްއަގުވާމީ މީޑިއާތަކުން ރިޕޯޓުކޮށްފައިވާގޮތުން، ކޮލަމްބިއާގެ ރައީސްގެ ދަރިފުޅު ހައްޔަރުކޮށްފައިވަނީ މަސްތުވާތަކެތީގެ މައްސަލައިގައި ދައުވާ ކުރެވިފައިވާ ފަރާތްތަކެއްގެ އަތުން ކެމްޕެއިން ދުވަސްވަރެއްގައި ފައިސާތަކެއް ނެގިކަމުގެ ތުހުމަތުގައެވެ. މިހާރު އެގައުމުގެ ރައީސްގެ މަގާމުގައި ހުންނެވި ގުސްތާވޯ ޕެޓްރޯވަނީ އޭނާގެ ދަރިފުޅާއި ގުޅުވައި ބަލަމުންދާ މައްސަލައިގެ ތަހުގީގުތަކުގެ ތެރެއަށް ވަދެވަޑައިނުގަންނަވާނެކަމަށް މީޑިއާތަކާއި ހިއްސާކުރައްވާފައެވެ.

އޭނާ ވިދާޅުވެފައިވާގޮތުން، ބައްޕައެއް އަދި އަމިއްލަ ފަރުދެއްގެ ހައިސިއްޔަތުން ފެންނަމުންދާ ކަންކަމާއި އޭނާގެ ދަރިއަކު ޖަލަށް ދާ މަންޒަރު ބެލުމަކީ ދަތިކަމެކެވެ. އެހެންނަމަވެސް ގައުމެއްގެ ރައީސްއެއްގެ ހައިސިއްޔަތުން އޭނާވަނީ އެ ގައުމުގެ ޕްރޮސެކިއުޓާރ އޮފީހަށް މި މައްސަލަ ބެލުމުގައި ކުރިއަށް ދެވޭނެކަމުގެ ޔަގީންކަން ދީފައިކަމަށް ގުސްތާވޯވަނީ ހިއްސާކުރައްވާފައެވެ.

ކޮލަމްބިއާގެ މިހާރުގެ ރައީސްގެ ދަރިފުޅު ނިކޮލަސް ޕެޓްރޯ ހައްޔަރުކުރުމަކީ ސަރުކާރަށް ލިބިގެންދިޔަ ބޮޑު ސިހުމެއްކަމަށް މީޑިއާތަކުން ރިޕޯޓުކުރެއެވެ. އެ ގައުމުގެ ސަރުކާރަށްވަނީ އެމެރިކާގެ އެހީތެރިކަން ހޯދުމުގައި ނާކާމިޔާބީތަކާއި ކުރިމަތިލާންޖެހިފައިވުމުގެ ސަބަބުން އިދިކޮޅު ފަރާތްތަކުގެ ފާޑުކިޔުންތަކާއި ކުރިމަތިލާންޖެހިފައެވެ. މިހާރު ބަލަމުންދާ މައްސަލަ ފެށިގެން އައިސްފައިވަނީ ނިކޮލަސްގެ ކުރީގެ އަންހެނުން ޓީވީއަށް ދިން އިންޓަރވިއުއެއްގައި ދެއްކި ވާހަކަތަކަކާއި ގުޅިގެންނެވެ.

އެގޮތުން ނިކޮލަސްގެ އަންހެނުންވަނީ އެމެރިކާގައި މަސްތުވާތަކެތީގެ މައްސަލައެއްގެ ދައުވާ ކުރެވިފައިވާ ސިޔާސީ ފަރާތެއްގެ އަތުން ނިކޮލަސް ގިނަ އަދަދެއްގެ ފައިސާ ނެގިތަނެއްގައި ހާޒިރުވެ ހުރިކަމުގެ ވާހަކަތައް ހިއްސާކޮށްފައެވެ. އެހެންނަމަވެސް މިހާރުގެ ރައީސް އަށް އެކަންކަން އެނގިވަޑައިނުގަންނަވާކަމަށއި އެ ފައިސާތައްވެސް ބަހައްޓާފައި ހުރީ ދެމަފިރިންގެ ގެއެއްގައިކަމަށް ބުނެފައިވެއެވެ.