އާރުޓީއެލްގެ ދެކުނުގެ އަތޮޅުތަކުގެ ދެމެދުގައި ދަތުރު ކުރުމަށް ކަނޑައަޅާފައިވާ ރޫޓުތަކުން އަގުތައް ނަގަން ފަށައި އެކަން އިއުލާނުކޮށްފި އެވެ.
މީޑިއާތަކަށް މައުލޫމާތު ދެމުން އެމްޓީސީސީން ބުނީ އާރުޓީއެލް ޒޯން 5، ގއ އަތޮޅާއި ގދ އަތޮޅު އަދި ޒޯން 6 ގެ ފުވައްމުލައް އަދި އައްޑޫގެ ދެމެދުގައި ކުރާ ހައިވޭ ލިންކުތަކުން އަގުތައް ނަގަން ފެށީ އާދީއްތަ ދުވަހުން ފެށިގެން ކަމަށެވެ.
އެގޮތުން ގއ، އިން ގދ، އާއި ހަމައަށް ދަތުރު ކުރާ އަގަކީ 100 ރުފިޔާ އާއި 150 ރުފިޔާ އާއި ދެމެދުގެ އަގެއްގަ އެވެ. އަދި އައްޑޫ އާއި ފުވައްމުލައް ދެމެދު ދަތުރު ކުރަނީ 250 ރުފިޔާ އަށެވެ.
'އިންޓަގްރޭޓަޑް ނޭޝަނަލް ޕަބްލިކް ފެރީ ނެޓްވަރކް' މަޝްރޫޢުގެ ދަށުން ޒޯން 6 (އައްޑޫ އަދި ފުވައްމުލަކު) އަދި ޒޯން 5 (ގދ. އަތޮޅު) އާއި ޒޯން 6އާ ދެމެދު ކުރާ ދަތުރުތަކުގެ އަގުތައް ގެޒެޓުކޮށްފި އެވެ. https://t.co/QDzujK1lyv
— Min.of National Planning, Housing & Infrastructure (@MoNPHImv) October 5, 2023
އެމްޓީސީސީން ބުނެފައި ވަނީ އާރުޓީއެލް ވެބްސައިޓު އަދި މޮބައިލްގެ އެޕް މެދުވެރިކޮށް ދަތުރު ކުރުމަށް ބޭނުންވާ މީހުންނަށް ޓިކެޓު ނެގޭނެ ކަމަށެވެ. އަދި ޓިކެޓު ނަގައިގެން ދަތުރު ކުރުމަށް ފެށި ނަމަވެސް އުމުރުން ތިން އަހަރުން ދަށުގެ ކުޑަކުދިންނައި، އެންސްޕާގައި ރެޖިސްޓްރީވެފައިވާ ހާއްސަ އެހީއަށް ބޭނުންވާ މީހުންނަށް ހިލޭ ދަތުރު ކުރެވޭނެ ކަމަށެވެ.