ރައްޔިތުންގެ މަޖިލީހަށް ޕްރޮގްރެސިވް ކޯލިޝަނުން މަދުވެގެން 20 އިންސައްތަ އަންހެނުން އިންތިހާބުކުރުމަށާއި، އެގޮތަށް ހޮވޭ މެމްބަރުންނަސް ޕާޓީން ހާއްސަ އެލަވަންސެއް ދިނުމަށް މަސައްކަތް ކުރައްވާނެކަމަށް އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މަޖިލީހުގެ ގޮނޑިތަކަށް ގާބިލު، އަދި އިލްމީ އަންހެނުން ކުރިމަތިލީ ނަމަވެސް އެ މީހުން އިންތިހާބު ނުވާކަމުގެ ޝަކުވާ ބޮޑެވެ. އަދި އެކަމަށް ހައްލު ގެނައުމަށް މަސައްކަތް ކުރުމަށް އެކި މީހުން އަބަދުވެސް ގޮވާލަ އެވެ.
ކައުންސިލްތަކުގެ ވަކި އިންސައްތައެއް އަންހެނުންނަށް ހާއްސަކޮށްފައިވާ ގޮތަށް، މަޖިލިސް ގޮނޑިތައް ވެސް ހާއްސަ ކުރުމަށް ބައެއް ފަރާތްތަކުން ލަފާ ދެ އެވެ. މި ދައުރުގައި ވެސް މަޖިލީހުގައި ތިއްބަވަނީ އަންހެން އެންމެ 04 މެމްބަރުންނެވެ.
ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވީހާވެސް ގިނަ އަންހެން ބޭފުޅުން ބައިވެރިވެ ހޮވިގެން ދިޔުމަކީ އަޅުގަޑު ވަރަށް އެދޭ ކަމެއް. މިގޮތުން، ޕީ.ޕީ.އެމް/ޕީ.އެން.ސީ އިން މަޖިލީހުގެ މަދުވެގެން %20 ގޮޑިއަށް އަންހެން ބޭފުޅުން ކުރިމަތިލާ ހޮވުމަށް މަސައްކަތްކުރުމަށް… pic.twitter.com/swsAyrXW89
— Dr Mohamed Muizzu (@MMuizzu) October 29, 2023
20 ވަނަ ރައްޔިތުންގެ މަޖިލީހަށް ގިނަ އަންހެނުން ކުރިމަތިލުމަށާއި، އެކަމަށް ހިތްވަރުދެއްވާނެކަމަށް މުއިއްޒު ވިދާޅުވެފައި ވެއެވެ
މުއިއްޒު މިއަދު ވިދާޅުވީ މަޖިލިސް އިންތިހާބުގައި ވީހާވެސް ގިނަ އަންހެނުން ހޮވުމަށް އެދޭ ކަމަށެވެ. އަދި ޕީޕިއެމް/ޕީއެންސީން މަދުވެގެން 20 އިންސައްތަ ގޮނޑިއަށް ކުރިމަތިލައި އިންތިހާބުވުމަށް އެދޭކަމަށް ވެސް ވިދާޅުވި އެވެ.
މުއިއްޒު ވިދާޅުވީ އެކަމަށް ހިތްވަރު ދެއްވުމުގެ ގޮތުން ޕީޕީއެމް/ޕީއެންސީން މަޖިލީހަށް ހޮވޭ ކޮންމެ އަންހެން މެމްބަރަކަށް މަޖިލީހުގެ މުސާރައާއި އިނާޔާތާއި އެކު ޕާޓީން އިތުރު އެލަވަންސެއް ދެއްވާނެކަމަށް މުއިއްޒު ވިދާޅުވި އެވެ.