މިއީ އެތައް ރައްޔިތުންނެއް ނިކުމެ ކުރި ބުރަ މަސައްކަތުގެ ނަތީޖާއެއްގެ ގޮތުން ގެނެވުނު ވެރިކަމެއްކަމަށާއި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމަކީ ރައްޔިތުންނަށް ލާބައާއި މަންފާ ހުރި ނަފާވެރި ވެރިކަމަކަށް ހެދުމަށް ކުރާ މަސައްކަތުގައި ދެމި ހުންނަވާނެކަމަށް ނައިބު ރައީސް ހުސެއިން މުހައްމަދު ލަތީފް (ސެމްބެ) ވިދާޅުވެއްޖެ އެވެ.
ވެރިކަމަށް ވަޑައިގަތުމަށް ފަހު މަޝްވަރާ ނުހޯއްދަވާކަމަށް ވިދާޅުވެ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ދޫކުރައްވައި އައު ޕާޓީއެއް އުފެއްދެވުމުގެ މަސައްކަތް ރައީސް އަބްދުﷲ ޔާމީން އަބްދުލްގައްޔޫމް ވަނީ ފައްޓަވާފަ އެވެ. ރައީސް ޔާމީންގެ ވިސްނުން ހުރި ގޮތްކަމަށް ވިދާޅުވި މީޑިއާތަކުގައި ވާހަކަ ދައްކަވަނީ އެމަނިކުފާނު ސަރުކާރުގެ ފުރަތަމަ ނައިބު ރައީސް އަދި އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދާއި މިދިޔަ ސަރުކާރުގެ ކޮމިއުނިކޭޝަންސް މިނިސްޓަރު މުހައްމަދު މަލީހު ޖަމާލެވެ.
ރައީސް މުއިއްޒަށް އެކި ގޮތްގޮތުން ފާޑުކިއުން އަމާޒު ކުރިނަމަވެސް، އަދި މިހާތަނަށް ސަރުކާރުގެ ބޭފުޅުން އެކަމަށް މާބޮޑު ރައްދެއް ނުދެ އެވެ. އެކަމަކު ވަޒީރުން ވަނީ ފަސް އަހަރު ދުވަހަށް ގެނައި ވެރިކަމެއް ދެމެހެއްޓުމުގެ މުހިންމުކަން ފާހަގަކޮށް ސަރުކާރުގެ ދިފާއުގައި ތިއްބަވާނެކަން ހާމަކުރައްވާފަ އެވެ.
— Hussain Mohamed Latheef (@HucenSembe) November 25, 2023
ރައީސް މުއިއްޒުގެ ދިފާއުގައި ނައިބު ރައީސް ހުސެއިން ކުރެއްވި ޕޯސްޓުގައި ވިދާޅުވީ މިއީ އެމަނިކުފާނު ވެސް ހިމެނޭހެން އެތައް ރައްޔިތުންގެ ބައިވެރިވުމާއި އެކު ބުރަ މަސައްކަތުން ގެނައި ވެރިކަމެއް ކަމަށެވެ. އަދި މިއީ ރައްޔިތުންގެ ބުރަ މަސައްކަތުގެ ނަތީޖާކަމަށާއި، ރައްޔިތުންގެ އިހުތިޔާރު ކުރީ ރައީސް މުއިއްޒުގެ ތަސައްވުރުކަމަށް ނައިބު ރައީސް ވިދާޅުވި އެވެ.
އެމަނިކުފާނު ވިދާޅުވީ މި ވެރިކަމަކީ ރައްޔިތުންގެ ލާބައާއި، މަންފާ ހުރި ނަފާހުރި ވެރިކަމަކަށް ހެދުމަށް އެމަނިކުފާނު ސާބިތުކަމާއި އެކު ހުންނަވާނެ ކަމަށެވެ.