މި ސަރުކާރުން ގެއްލުމުގެ ބަދަލުގެ އެއްވެސް ފައިސާއެއް ދީފައި ނުވާނެ: ފިނޭންސް

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު އުފެދުމަށް ފަހު ގެއްލުމުގެ ބަދަލެއްގެ ގޮތުގައި އެއްވެސް ފަރާތަކަށް ފައިސާ ދޫކޮށްފައި ނުވާނެކަމަށް ފިނޭންސް މިނިސްޓްރީން ބުނެފި އެވެ.

މި ސަރުކާރުގެ ފުރަތަމަ ދެ ހަފްތާގެ ތެރޭގައި ބަދަލެއްގެ ގޮތުގައި 101 މިލިއަން ދޫކުރިކަމަށް ފިނޭންސްގެ ވީކްލީ ފިކްސަލް ޑިވެލޮޕްމަންޓް ރިޕޯޓާއި ހަވާލާ ދީ މިއަދު މީޑިއާއަކުން ރިޕޯޓު ކުރި އެވެ. އެ ހަބަރުގައި ވާގޮތުން، ނޮވެމްބަރު 24 އާއި 30 ވަނަ ދުވަހުގެ ދެމެދު ބަދަލެއްގެ ގޮތުގައި 101.7 މިލިއަން ރުފިޔާ ދޫކޮށްފައި ވެއެވެ.

އެ ހަބަރު ދޮގުކޮށް ފިނޭންސް މިނިސްޓްރީން ބުނީ މި ސަރުކާރުން ބަދަލެއްގެ ގޮތުގައި އެއްވެސް ފަރާތަކަށް ފައިސާ ދީފައި ނުވާނެ ކަމަށެވެ. އަދި މިކަމާއި ގުޅޭ ތަފްސީލީ މައުލޫމާތު ބަޔާނެއްގެ ސިފައިގައި އާންމު ކުރާނެކަމަށް ވެސް ބުންޏެވެ.

https://t.co/XqIjEg5QoC
With reference to the article below, the ministry would like to clarify that no new payments have been made to compensate any such parties. A press release with details on this matter will be issued by the ministry soon

— Ministry of Finance (@MoFmv) December 12, 2023

މަދު ދުވަސްކޮޅެއްގެ ތެރޭގައި މިހާ ބޮޑު އަދަދަކުން ގެއްލުމުގެ ބަދަލު ނަގައިދިންކަމަށް ވާހަކަ ދެކެވުނު ނަމަވެސް، ރައީސް މުއިއްޒު ވަނީ ވެރިކަމާއި ހަވާލުވެވަޑައިގެންނެވުމަށް ފަހު ނޮވެމްބަރު 21 ގައި ސަރުކާރާއި އަމިއްލަ ފަރާތްތަކާއި ދެމެދު އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލު ދިނުމަށް ރައީސް އިބްރާހިމް މުހައްމަދު ސޯލިހުގެ ސަރުކާރުން އުފެއްދި ސެޓްލްމަންޓު ކޮމިޓީ އުވާލާފަ އެވެ. ރައީސް އެ ކޮމިޓީ އުވާލެއްވުމަށް ފަހު ވިދާޅުވީ ރައްޔިތުންގެ ފައިސާއިން ގަވާއިދާއި ހިލާފަށް ނަހަމަ ގޮތުގައި ބަދަލު ދިނުމަކީ އެއްގޮތަކަށްވެސް ކުރެވިގެންވާނޭ ކަމެއްނޫން ކަމަށެވެ.

މީގެއިތުރުން ހަމަ އެދުވަހު ރައީސް އޮފީހުން އާންމު ކުރި ބަޔާނުން އެނގޭ ގޮތުގައި ސެޓްލްމަންޓް ކޮމެޓީ އުވާލަން ރައީސް ނިންމެވިއިރު އެ ކޮމިޓީން ވަނީ އެކި ފަރާތްތަކަށް ބަދަލުގެ ގޮތުގައި 225 މިލިއަނަށްވުރެ ގިނަ ރުފިޔާ ދިނުމަށް ނިންމާފައެވެ. އަދި ފައިސާގެ އިތުރުން ދޭން ކަނޑައެޅި ހަރުމުދަލާ ރަށްރަށާ ފަޅުފަޅު ފަދަ ތަންތަން އަގުމަގުކުރުމުން، އެކި ފަރާތްތަކަށް ބަދަލުގެ ގޮތުގައި 1 ބިލިއަން ރުފިޔާގެ އަގުހުރި ހަރުމުދަލާއި ފައިސާ ދައުލަތުގެ މިލްކިއްޔާތުގެ ތެރެއިން ދޭން އެ ކޮމެޓީއިން ނިންމާފައިވާނެކަމަށް އަންދާޒާކުރެވޭ ކަމަށް ރައީސް އޮފީހުން ބުނެފައިވެއެވެ.